share this article

أعرف ناس تكره القهوة، لكن عمري ما قابلت حد ما بيحبش الشاي، صديق العمال والفلاحين والطلبة، والمسافرين أكيد، ماينفعش تبقى في أي بيت عربي ومايعزمش عليكي بنوع من أنواع الشاي، ممكن وراه إيفيه سمير غانم في المتزوجون، ويلح عليك تشرب شاي؟ الموضوع بيوصل إن في أماكن رفض دعوة الشاي فيها بيبقى فعل غير لائق وغير مستحب، وممكن يتقال عليك بخيل عشان مش عايز تشرب، احنا جايبنلك أشهر أنواع الشاي وأفضلها، الموضوع يستاهل تجربهم كلهم كل ما تسافر.


1- المغرب.. شاي للفرجة
المصدر Diego

 أتاي، أو الشاي المغربي، شاي تتصور جنبه قبل ما يتشرب. عدة الشاي، براد وصينية مصنوعة من الفضة المنقوشة يدوي، وكاسات ملونة، بيقولوا عليهم الربايع، تحس الموضوع كله لوحة فنية، مش مجرد مشروب.
بسبب جمال حفلات الشاي في المغرب اليونيسكو عملت مسابقة عالمية للشاي هناك، فاز بيها الحاج عبد العاطي الجوهري، واتنقش اسمه على أكبر مصنع شاي في الصين، الدولة اللي صدرت المشروب العظيم ده للعالم ضربت للمغرب تعظيم سلام.

انتشر كمان في البلاد اللي حولينها، المعروفة بالمغرب العربي، وهو عبارة عن شاي أخضر مخلوط بالنعناع والسكر. وحتى بره المغرب العربي لو سافرت السعودية قبل كده هتلاقي في أكشاك بتبيع الشاي (To Go)، والناس قدامه طوابير ما بيطلبوش تقريبا غير الشاي المغربي والشاي كرك.


2- المرمرية.. الكونياك العربي


شاي المرمرية، أو الحطاب، أو البدوي، لأنه منتشر بين البدو في كل الشرق الأوسط تقريباً، وكمان بين كل المهن اللي بتتطلب السهر في مكان بارد بالليل، الغفر تحديداً اللي بيسهروا يحرسوا الأماكن، لأن مفعوله مفعول الكونياك مع البرد. المرمرية شاي أحمر عادي مع سكر، وأحياناً بيتحط له نعناع، وبيتعمل على نار الحطب، منه يسويه ومنه يدفي اللي قاعدين حولين النار. فالمهم يعني إنه حلو اشربوه، شرب المرمرية والدفا بنارها في ليل الصحرا يستحق تيجي لها من آخر الدنيا.

3- الكرك.. شاي الخليج

المصدر videoblocks

شاي الكرك هندي في الأصل، بس الخلايجة حطوا التاتش بتاعهم عليه، فبقى مستحيل تمسك نفسك قدام ريحته. بيضيفوا للشاي الهيل والزعفران وعليه حليب. مفيش مكان في الخليج تقريبا ما أدمنوش، كل الكافيهات تلاقي العربيات قدامها طوابيرأياً كان مودك لازم يتظبط بعد ما تسقط في الكرك.

4- موريتانيا.. شاي بـ3 أرواح

المصدر القدس العربي

موريتانيا والمغرب في منافسة دايمة بينهم على الشاي. الشاي الموريتاني ميختلفش كتير عن المغربي، بس يفرق في إن البراد اللي بيتعمل فيه بيطلع منه 3 نكهات مختلفة. أوله خفيف ساده، ووسطه مظبوط، وآخره تقيل ومسكر.

5- ليبيا.. الشاهي وحكاية الرغوة


الشاي أو الشاهي الليبي ارتباطه بالصحرا خلى محبيه يزودوا عليه حاجة غريبة. غير الفول السوداني المسلوق واللوز اللي بيبقى جنبه، الشاي نفسه بيتعمل بنوعين، الأحمر العادي، أو الأخضر المخلوط بالنعناع. الغريب بقى هي لمسة الليبيين في صب الشاي، بيصبوا الشاي في براد تاني غير اللي اتعمل فيه، ويرجعوه للبراد اللي اتعمل فيه تاني، ويعيدوا الحكاية كذا مرة لغاية ما يبقى للشاهي رغوة، فيقوموا صبينه في الكوبايات، النتيجة تلت الكوباية شاي وتلتينها رغوة. الرغوة دي بتحميه من التراب والهوا الشديد في الصحرا، التجربة كلها تستاهل المغامرة. 

6- الشاي التركي.. قبل الأكل وبعده

المصدر mediatani

الأتراك أعلى استهلاك للشاي في العالم، وبيعملوا الشاي في برادين برضو، ورغم إنه شاي أحمر عادي إنما بتلت نكهات، أولها الظلام، وفي النص دم الأرنب، وآخرها الضوء، ده اللي بيخلي الدماغ تنور في الآخر. وغالباً بيتحط جنبه بسكوت مملح. وساعات بيضيفوا للشاي التفاح أو الزيزفون.

7- مصر.. عاصمة مملكة الشاي المتحدة

المصدر Matthew Toy

ميزة وكشري وعجمي وصعيدي وبربري وبوستة وطيارة وبنور وخمسينة، كل دي أسامي للشاي في مصر، عاصمة مملكة الشاي المتحدة. عشان مصر دولة عايش فيها خليط ثقافات، كل منطقة لها الشاي بتاعها، وكلها موجودة على قهاويها.

شاي الكشري: بتحط الشاي والسكر في الكوباية وتضيف ليهم المياه المغلية من البراد.
شاي فريسكا: بيتقال عليه برضه "شاي خفيف سكر زيادة"، بيبقى شاي كشري بس مقدار الشاي قليل بالقياس للسكر.
شاي بوسطه: الشاي بس في الكوباية وبيتصب عليه المياه المغلية، ويديك السكرية جمب الكوباية ع الصينية، بيتقال عليه برضه "سكر بره".
شاي طيارة: شاي فتلة ليبتون أو العروسة


شاي على مياه بيضا: بيتحط الشاي الأول بعديه السكر فوقيه، وبعدين تتصب المياه بالراحة على المعلقة، فالمياه تملا الكوباية من غير ما يختلط الشاي بيه، بيتساب دقيقة وبعدين يتقلب، الشاي ده بالنعناع إدمان، مرارة الشاي كلها بتروح وبيبقى طعم النعناع بيور
شاي أمريكاني: شاي كشري في شوب المياه الكبير
شاي عجمي: شاي كشري في كوباية صغيرة بيبقى اسمها استكانة، شبه كوباية الشاي التركي
شاي خمسينة: شاي كشري في كوباية كبيرة بس مملي نصها بس 
شاي بنور: ده بتسيب براد المياه لحد ما تغلي بعدين تضيف الشاي

بعدين بقى فيه الشاي اللي مرتبط بكل منطقة:

الشاي الصعيدي: ده بيبقى براد كبير محطوط ع الحطب، والشاي والسكر جوه البراد، يتصب أول دور الناس تشربه، والشاي يرجع ع النار، ويفضل كده لحد ما يبقى حبر مطين بطين


الشاي الفلاحي: نفس الصعيدي بالظبط بس بدل الحطب بيتحط مكانه "آلقوالح" اللي هي بواقي الدرة، الشاي بيبقى أخف والسكر أقل.


الشاي السيوي: الشاي حاجة مقدسة عند السيويين بيعملوه من ورق الشاي الأخضر ع الطريقة السنوسية، بيعتبر فن حقيقي، براد الشاي ممكن يقعد يتعمل ٣ ساعات وبيبقى ليه نسب دقيقة، وبيخلطوه بحاجات كتير زي ال "لويزا" وده اسم الدلع لعشب الليمون، والنعناع الجبلي والنعناع الفلفلي (لازم تجربه)، بيبقى لونه فاتح لكنه تقيل كده وبيتصب في كوبايات صغيرة (استكانة)


الشاي السيناوي: الشاي في سيناء بيتعمل شاي زردة (بيتقدم في البراد) وبيتضاف عليه حاجات كتير زي المرمية 

شاي ميزة: ده شاي بلبن، بيتحط الشاي والسكر في الكوباية ويتضاف ليهم نص الكوباية مياه والنص التاني لبن
شاي بربري/نوبي: هو نفسه الشاي الميزة بس الشاي أكتر من اللبن
شاي جمعية: هو نفسه الشاي الميزة بس اللبن أكتر من الشاي
شاي منه فيه: ده شاي بلبن بس ما بيتحطش مياه خالص، بتبقى الكوباية كلها لبن

الشاي يعتبر مياه الشرق الأوسط، أعتقد إن ده المشروب الوحيد اللي اتعمل عليه أغنية أطفال (أبريق الشاي) للفنان سيد الملاح، واختلط بثقافة الشرقيين فبقى له جو خاص به، تجربته مثيرة، جميل إنك تعيشها، وتسمع الحكايات اللي بتدور بين اللي قاعدين حولين صنية الشاي، وتكسب دفا ومودة أهل البلد.