share this article

المطبخ المغربي علامة مميزة جدًا في الشرق الأوسط كله علشان المزج بين الغرب والشرق هتشوفه في أكلاتهم، الكسكس والطاجين تقريبًا دول أهم أطباق ومن خلال المقال ده هقولكم على أحلى الأكلات المغربية اللي جربتها في خلال شهر تقريبًا قضيته هناك.

1- البطبوط أكلة كل يوم مصدر الصورة: cuisinechaimae
البطبوط والحرشة عرفتهم أول يوم ليا في المغرب، وقتها دخلت محل لبيع الألبان والجبن علشان أجيب جبنة وبعدين أجيب عيش وأفطر. البياع سألني إذا كان ده أول يوم ليا هنا في المغرب، يبقى لازم تعرف الإفطار المغربي اللي هو البطبوط والحرشة أبطاله. البطبوط المغربي يعتبر العيش بتاعهم وهتلاقيه تقريبًا في كل بيت مغربي أو مطعم، وبيتقدم مع زيت الزيتون والجبنة أو العسل جنب كوباية الشاي المغربي.

2- الحرشةمصدر الصورة: themoroccanrecipes
الحرشة هو الطبق الثاني اللي هتشوفه جنب طبق البطبوط في أي فطار في المغرب، بيتعمل من السميد -نوع من أنواع القمح النقي بنستعمله في البسبوسة عندنا في مصر- والزيت والملح، طعمه مميز جدا خصوصا لو كان محشي جبنة ولو سادة جرب تفرد عليه الجبنة من فوق واحبس بالشاي وراها على طول.

3- الحريرةمصدر الصورة: dimasharif
كنت محظوظ جدًا إني حضرت بداية شهر رمضان في المغرب علشان عرفني على أهم طبق شوربة في المغرب، الحريرة هي الشوربة الرئيسية تقريبًا في الشتاء ومنتشرة جدًا في المغرب والجزائر بس بيختلفوا في طريقة التحضير. الشوربة تعتبر وجبة كاملة لإنك هتلاقى جواها كل حاجة زي الشعرية والبهارات واللحمة، بتتقدم مع الشباكية -هنقولك ايه الشباكية دي في النقطة اللي جايه- والتمر، الوجبة دي هي الراعي الرسمي لرمضان في المغرب.

4- الشباكية المغربي
مصدر الصورة: themoroccanrecipes
الشباكية هي الطعم الحلو المميز من حلويات المغرب وهي شبة المشبك عندنا في مصر في المكونات بس مش دسمة وبيحطوا عليها سمسم وينسون، في الأساس هي نوع من الحلويات مخصوصة لرمضان ومفيش بيت مغربي بيخلى من الشباكية اللي بتتقدم مع شوربة الحريرة ووراها على طول الشاي المنعنع المغربي.

5- الكسكس المغربيمصدر الصورة: blu
زي في مصر مينفعش الوجبة من غير الرز، في المغرب الوجبة متنفعش من غير الكسكس اللي بيتعاملوا معاه زي ما إحنا بنتعامل مع الرز، بيبقى جنب الخضار أو بيكون هو الطبق الرئيسي ومطبوخ عليه لحمة أو خضار.
أشهر أطباق الكسكس هو الكسكس بالفاكهة الجافة زي البرقوق وبيتعمل معاه البندق والكاجو واللوز، أو طبق الكسكس بالخضار واللحمة.

7- الطاجينمصدر الصورة: taste
الطاجين هو الطبق اللي بيجمع المغرب العربي كله بس الأشهر هو الطاجين المغربي. أولًا الإسم جه من الطاجن أو الإناء الفخار اللي بيتحط فيه الأكل وبيتسوى على النار لفترة طويلة، هتلاقي الطاجين تقريبًا في كل حتة في المغرب وأشهر أنواعه طاجين السمك، طاجين الفراخ بالزيتون، طاجين لحمة أو فراخ بالبرقوق، وأطلب كمان يزودلك من فوق سمسم وكاجو هتنبسط جدًا.

7- البسطيلةمصدر الصورة:pinterest
البسطيلة الطبق اللي بعد ما تجربه هتبقي مغربي أصيل، لأن تعتبر الوجبة دي من الجذور ومش منتشرة بين الأجانب عن البلد، الوجبة تعتبر من المعجنات اللي بيتم حشوها بأي نوع من اللحم أو السمك أو الفراخ وممكن الخضار كمان. العجينة اللي بتتعمل بيها بيكون فيها الميكس بين الطعم الحلو والحادق مع القرفة، أشهر أنواعه خصوصا في المناطق الساحلية بسطيلة السمك.

 8- الرفيسةمصدر الصورة:flicker
بما إننا توغلنا جامد جوا المطبخ المغربي، مينفعش تطلع وأيدك مفيهاش رفيسة، هي وجبة دسمة جدًا جدًا، عبارة عن حاجة اسمها المسمن (الفطير يعني) أو العيش الجاف بيتقطع حتت صغيرة وبيستوي بالبخار وبعدها يتحط عليه الفراخ والخضار والعدس.

9- الطنجيةمصدر الصورة: zineb el morhir
طبق الطنجية غالبًا مش هتشوفه غير في مراكش الحمرا، وده تقريبا الطبق الرسمي لمراكش واللي هتلاقي المطاعم والعربيات الشعبية في ساحة جامع الفناء بتقدمه. هو عبارة عن لحمة وزعفران وليمون بيتحطوا في وعاء فخار كبير كده ويتدفن في الأفران التقليدية القديمة وبيتقدم في طبق بعد ما يستوي على نار هادية بعد مدة.

10- البريواتمصدر الصورة:marmiton
بما إن دي أخر أكلة فلازم نختم بالحلو، البريوات هو زي الجلاش عندنا في مصر بيختلف بس في طريقة تحضيره، هو نوع من أنواع الحلويات المشهور جدًا هناك وبيبقى محشي مكسرات من جوه وعلى وشه لوز، بالمناسبة ممكن يتعمل منه حادق برضه وبيكون الحشو لحمة مفرومة.