share this article

لو إنت من اللي الكيف بيذلهم وما تقدرش تبتدي يومك غير بـ٧ فناجين قهوة بن غامق وقررت تزور اليابان، اوعى اوعى تروح الكافيه ده إلا لو كنت من أغنى الأغنياء وأثرى الأثرياء، أو مستعد تنسى السبعة جنيه اللي بتدفعهم في قهوة سعيد حلاوة وتدفع في فنجان قهوة 900 دولار -يعني بتاع 14 ألف جنيه ونص وشوية كسور تاني بسعر النهاردة- من غير ضميرك ما يأنبك ويلا يجيلك أوفر ثينكنج بليل وفلوس الأقساط اللي عليك تطاردك في كوابيس.

كافيه "مونش" بيعتبر المكان الوحيد في العالم اللي بيقدم قهوة عمرها 22 سنة- يعني ممكن تكون أكبر منك أو أدك في العمر- وعشان كده سعرها غالي وتبذير أوفر أوفر يعني -بصوت دنيا سمير غانم- بس الحقيقة إن ده المكان الوحيد اللي بيقدم قهوة متعتقة ع الغالي كده والموضوع كله جه مع صاحب الكافيه by luck.

كانجي تاناكا صاحب الكافيه والموظف الوحيد فيه، في مرة من المرات زمان نسي كمية من القهوة في التلاجة لأكتر من 6 شهور، وقبل ما يرميها داقها لقاها إنها مباظتش لأ وكمان طعمها مختلف وحلو جدا، فقرر يعمل تجربة على كمية تانية واحتفظ بالقهوة في براميل لمدة 10 سنييين، واكتشف ساعتها إن نكهتها مختلفة وحاجة آخر حلاوة.

ومن ساعتها، وهو بدأ يستخدم التكنيك الرهيب ده وبقى يعتق حبوب القهوة لأكتر من 20 سنة، ويحمصها ويطحنها ويحضرها ويقدمها بنفسه للزباين، وبقى الكافيه ده من أشهر كافيهات القهوة مش بس في اليابان ولكن في العالم كله، ولكن زباينه من الأثرياء اللي أنت أكيد مش منهم، عشان كده متفكرش تجرب القهوة بتاعتهم واشتري مننا.

 المصدر: Odditycentral