share this article

الموضوع ده اتنشر أول مرة على موقع "مشروع سفر"، ويعاد نشره في "سفرية" بالإتفاق مع إدارة الويب سايت.

مواعيد الأكل في أسبانيا مقدسة بمعنى الكلمة؛ بياكلوا ثلاث وجبات أساسية في اليوم؛ وجبة الساعة 9 الصبح والوجبة التانية الساعة 2 الظهر؛ وآخر وجبة الساعة 10 بالليل، وبقول مقدسة لأن الموضوع وصل لدرجة إني مرة كنت بذاكر مع واحد صاحبي والوقت سرقنا والساعة بقت 2 الظهر استأذن مني إنه يمشي عشان لازم يروح ياكل مع إننا كنا في وسط المذاكرة؛ بس بالنسبالهم ماينفعش يفوت معاد الأكل، الأسبان عموماً بياكلوا أكل كتير جداً وكلهم بيلقطوا في الأكل على مدار اليوم طول الوقت.

الأكلة الشعبية

أشهر أكلة في أسبانيا وشوفتها في كل حتة هي باييا أو بايلا Paella؛ أصل الأكلة دي جاي من مدينة فالينسيا ويعتبر الطبق الرئيسي في أسبانيا والأكلة الشعبية في البلد؛ ومكوناتها عبارة عن رز وفاصوليا ولحمة أو فراخ أو أرانب وفاصوليا بيضاء، لكن فيه ثلاث أنواع للأكل دي: Valencian Paella, Seafood Paella, Mixed Paella والثلاثة لازم يتجربوا عموماً، 

سي فوود وTapas

من الأكلات المشهورة اللي هتاخد بالك منها كتير هي الـTapas، ده جزء أساسي من ثقافة أسبانيا، والـTapas هي مقبلات خفيفة وبسيطة تقدر تاكلها تصبيرة قبل الوجبة الرئيسية أو لو هتقابل حد في مكان لفترة قليلة، المقبلات نفسها ممكن تكون معمولة من أي حاجة ممكن تتخيلها لكن بأحجام صغيرة وكتير منها بيبقى سي فوود.

أكلات السي فوود مميزة جداً في أسبانيا بس مش رخيصة، لازم تجرب تشتري ساندوتشات الكاليماري لأنها أساسية في محلات كتير، وأشهر أكلة ممكن تاكلها كمقبلات هي Patatas Bravas، مش حاجة رهيبة هي عبارة عن بطاطس عليها صوص بس طعمها رائع وتعتبر حاجة لذيذة تسخن بيها وتاكلها كأكلة سريعة، وبرضه أخدت بالي أد ايه الفراخ المشوية طعمها مش طبيعي هناك.

أكلات مشهورة تجربها

في أكلة كمان مشهورة اسمها Salchipapas وهي حاجة سهلة وأي حد يقدر يعملها بس المطاعم والمحلات بيعملوها حلو أوي، مكوناتها عبارة عن سوسيس على بطاطس محمرة وعليها مايونيز وكاتشب؛ بتلاقيها في الحفلات والمهرجانات وهي أكلة تعتبر ليها أصل ديني؛ هتاخد بالك من حاجة ليها علاقة بالأكل اسمها Juepincho دي حاجة المدن في أسبانيا واخدينها من مدن إقليم الباسك زي سان سيباستيان وبلباو وهي إنك تاكل Tapas وتشرب معاها حاجة بحوالي اتنين يورو، في زاراجوزا في منطقة كاملة للـJuepincho، الناس بتروح تاكلها يوم الخميس.

الفترة اللي كل حاجة بتقف فيها عشان الأكل

حاجة مهمة في الثقافة الأسبانية وليها علاقة بالأكل هي ال،Siesta، لو مش عارف ايه ال_Siesta فهي من الآخر تعسيلة صغيرة الأسبان بياخدوها من الساعة 2 الظهر للساعة 5 العصر عشان يروحوا ياكلوا ويريحوا شوية؛ بعد كده يرجعوا للشغل، مفيش حاجة بتبقى فاتحة تقريباً غير مطاعم الأكل والمحلات اللي في الأماكن السياحية؛ حتى فيه بنوك بتقفل عادي في نص اليوم عشان الموظفين ياخدوا Siesta.

لازم تاخد بالك إن أماكن كتير بتكون قافلة يوم الأحد في المدن الصغيرة ومن الأماكن دي السوبر ماركت عشان لو عايز تشتري حاجات بسيطة تاكلها تكون عامل حسابك، لكن لو حصلك الموقف ده ومش عامل حسابك يبقى تسأل على أي سوبرماركت من بتوع الصينيين لأنهم موجودين في مدن كتير وبيفتحوا كل الأيام.

عموماً؛ الأكل في أسبانيا خرافي، ولازم تجرب أنواع مختلفة وتقضيها Tapas طول الوقت، الأسبان بياكلوا كتير جداً، وده بالنسبة لواحد بياكل أكل كتير زي حالاتي جنبهم ولا حاجة.