share this article

من وقت ما الطيارات ركنت في المطارات، وكل بلد قفلت على نفسها؛ وكل بيت برضه قفل على الناس اللي جواه؛ وكلنا خلاص وصلنا لمرحلة إننا هنبتدي نكلم نفسنا، ابتدت تظهر بدائل كتير تحاول تعوضنا شوية عن عدم الخروج والفسح، متاحف بقت متاحة أونلاين من كل حتة في العالم تقدر تزورها وإنت قاعد في بيتك، حفلات وأوبرا وباليه من مسارح عالمية يمكن مكانش ييجي في بالك حتى إنك تروحها لو زرت البلد نفسها، وشوية أفلام حلوة تحسسك إنك سافرت البلاد اللي اتصورت فيها، أو حتى أفلام وثائقية تعيشك في موود الأماكن والناس وقصصهم الحقيقية.

العالم الإفتراضي اللي بقينا عايشين فيه مع الموبايل واللابتوب يمكن مايكونش بنفس جمال العالم الحقيقي اللي برة، بس لحد ما نقدر نعدّي المرحلة دي ونرجع تاني نشوف كل الأماكن اللي نفسنا فيها؛ مهم إنك تفصل وتتفرج على حاجات جديدة تغير موودك ونفسيتك، ومن ضمن الحاجات دي إنك تشوف أماكن طبيعية وبحر وجناين وجبال ومحميات، جمعنالك منهم شوية مايتفوتوش تتفرج عليهم دلوقتي أونلاين وإنت قاعد في بيتك، وتخلي الليستة في دماغك لبعدين عشان تروحهم بنفسك.

1- جزيرة هاوايالمصدر: Lonely Planet

أظن أقصى طموحنا في الوقت الحالي إننا نشوف بحر من بعيد؛ مش هنوديك أي بحر بقى؛ لأ ده إنت إنسان ملتزم بالحظر وتستاهل مكافأة، هتروح هاواي بجلالة قدرها، واللي طبعاً محدش عارف يروح يستمتع بيها دلوقتي؛ ف جوجل قرروا يتيحوا الفرصة للناس تتفرج على هاواي من بيتها أونلاين، بما فيها كمان الأماكن اللي الناس بتزورها بفلوس جوة هاواي زي حديقة براكين هاواي الوطنية، دي تعتبر من أضخم البراكين في العالم.

2- كهف هانج سونج دونج - فيتنام المصدر: inspirock

لو إنت من الناس اللي عندها فوبيا الأماكن المغلقة ممكن تتخض شوية لما تشوف كلمة كهف؛ بس على عكس الكهوف المتعارف عليها اللي بتبقى ضيقة ومقفولة؛ ده أكبر كهف في العالم؛ مساحته حوالي 4 كيلو وارتفاعه حوالي 100 متر؛ وجواه عالم كإنك دخلت مكان سحري، هتلاقي غابة في وسط الكهف ونهر جاري، بتحس إنك آه ماشي جوة كهف بس شايف نور الشمس والشعاع داخل من فوق أو من مكان أدامك، تقدر تاخد جولة جواه من خلال رحلة استكشافية كانت عملتها ناشيونال جيوجرافيك، وطول مانت ماشي هتبقى الخريطة على يمينك عشان تعرف إنت في أنهي جزء من الكهف، وبتعرف كمان معلومات وتفاصيل كتير عن كل جزء بتمشي فيه.

3- جراند كانيون - أريزوناالمصدر: National Geographic

واحد من عجائب الدنيا السبعة، والكلمة العربي الفصحى اللي بتتقال عليه هي "أخدود"، مكان بيتشكل على مدار ملايين أو مليارات السنين على كوكب الأرض عشان توصل للشكل المنحوت الملون اللي أكيد شفته في صور كتير أوي وشفته في أفلام كمان، بس دلوقتي عندك فرصة تاخد جولة فيه أونلاين من غير ما تخبط مشوار لحد أمريكا.

4- سنترال بارك - نيويوركالمصدر: Matador Network

برضه الجنينة دي شفناها في أفلام أمريكاني كتير جداً، ويمكن بسبب مساحتها الرهيبة بتشوفها في كل فيلم غير التاني، عشان كده الجولة الإفتراضية اللي ممكن تعملها أونلاين في سنترال بارك هتوريك كل موقع فيها وهتحكيلك على الأحداث المميزة أو الحاجات اللي حصلت في كل موقع من دول على مدار تاريخ الجنينة كله، شوف بقى جنينة مساحتها أكتر من 3 كيلو تخلص الجولة بتاعتها في أد ايه!

5- سور الصين العظيمالمصدر: Wikipedia

أكيد لو قالولك تعالى نروح الصين دلوقتي نتفسح ببلاش هتقولهم لأ، ولا حتى لو هتدوني فلوس مش عايز! بس ما يمنعش إننا نتفرج أونلاين على سور الصين العظيم، من بعيد عبر الإنترنت والبحار والقارات والمحيطات فرصة تشوف واحد من عجائب الدنيا السبعة الجديدة؛ ومن أهم مواقع التراث العالمي في قائمة اليونسكو، ودايماً بيدخل في تصنيفات وآراء ناس كتير إنه من أهم الأماكن اللي لازم تشوفها في حياتك.

6- قلعة ماتشو بيتشو - البيروالمصدر: Fabien Moliné

المكان اللي بيروحله السياح من كل حتة؛ واللي وصلت لدرجة إنهم كانوا بيفكروا طول شهور فاتت إزاي يقللوا من التأثير السلبي اللي بيحصل من كتر الزحمة وابتدى يضر بالمكان الأثري الجميل ده، آدي الدنيا قفلت خالص ومحدش ولا هيروح ولا هاييجي، بس تقدر من الموبايل اللي في إيدك تدخل تتفرج على المنظر البانورامي على القلعة والتلال الخضراء كإنك رحت تعمل هايك في السريع.

7- حديقة يوسيميتي الوطنية - كاليفورنياالمصدر: Tripsavvy

أظن مجرد صور بتشوفها من المكان ده هتكون كفيلة إنها تغير موودك وتخليك تمتع عينيك بحاجات محتاجها الفترة دي، حديقة يوسيميتي فيها شلالات وأشجار ونباتات نادرة، ونهر وصوت مياه بتجري، وهدوء طبعاً تحس معاه إنك قاعد وسط الطبيعة بجد، ممكن تاخد جولة أونلاين فيها قبل ما تنام مثلاً بحيث تدخل في عالم من الهدوء والاسترخاء يساعدك على النوم.

8- منحدرات موهير - أيرلنداالمصدر: Fodors

وقت الغروب ومع قرب معاد ساعات الحظر؛ الدنيا بتبتدي تهدى تماماً في الشارع، بس لو زهقت من منظر الغروب من شباك أوضتك؛ ممكن على سبيل التغيير تتفرج على منظر الغروب من فوق منحدرات موهير في أيرلندا، فيو بانورامي على المحيط الأطلسي؛ وجنبها هتلاقي قلعة بلارني، اللي الناس بتزورها مخصوص عشان يبوسوا أحجار معينة هناك؛ اعتقاداً منهم حسب أسطورة تناقلتها الأجيال إنه بيجلب الحظ السعيد، طبعاً البوس متوقف حالياً والزيارات كمان متوقفة، ومفيش قلعة بلارني ولا منحدرات موهير إلا من خلال الجولة المتاحة أونلاين.

9- الحدائق الملكية - لندنالمصدر: Wanderintwo

دول في الأصل كانوا 8 جناين محدش ييجي جنبهم غير العائلة الملكية، لكن بعد كده الحمد لله اتفتحوا لعامة الشعب وبقى أي حد يقدر يروح، يمكن أشهرهم وأحلاهم هي "هايد بارك"، اللي فيها كمان النصب التذكاري للأميرة الراحلة ديانا. تقدر تاخد جولة وسط الخضرة والشجر والزرع اللي في الحدائق الملكية دلوقتي، من غير ما تروح عند الراجل البومة بتاع "ودّعوا أهلكم وحبايبكم".

10- ديزني لاندالمصدر: ThePointsGuy

لو قاعد مع الأسرة الكريمة والأطفال أحباب الله وزهقتوا خلاص بعد ما خلصتوا كل الـpuzzles ولعبتوا كل الألعاب واتفرجتوا على كل الأفلام الأسرية اللذيذة، في منتصف يوم مشرق وجميل ممكن تتجمعوا حوالين اللابتوب وتاخدوا جولة أونلاين في ديزني لاند، مع وعد للأطفال -والكبار طبعاً- إنها أول ما ترجع تفتح تاني هنروح كلنا ونطبق الجولة دي على أرض الواقع. وفيه كمان أوبشن إنك تتفرج على فيديوهات لألعاب معينة في ديزني متصورة بتقنية 360 درجة كإنك قاعد معاهم في القطر، هتاخدك عالم Frozen وممكن شركة المرعبين المحدودة أو قراصنة الكاريبي كمان.

11- الحيّد المرجاني العظيم - أسترالياالمصدر: Fodors

فاكرين فيلم "Finding Nemo" والشعاب المرجانية اللي كانوا عايشين فيها في أستراليا؛ على أرض الواقع بقى اسمها "الحيّد المرجاني العظيم" أو Great Barrier Reef، وده أكبر نظام في العالم فيه أكتر من 2900 من الشعاب المرجانية و900 جزيرة على مساحة أكتر من 2300 كيلو متر، عاملين بقى فيديوهات جايبالك العالم ده كله بالتفصيل من خلال جولات بصوت "ديفيد أتينبورو" اللي اتعودنا على صوته في معظم الأفلام الوثائقية والرحلات الاستكشافية مع قناة بي بي سي. الرحلة معاه حقيقي ماتتفوتش ومليانة معلومات وحكايات عظيمة ومبهرة عن عالم بعيد جداً عننا بس يادوب تدوس على لينك وتقدر تبقى جواه.

12- ناساالمصدر: NASA

لو وصل الزهق معاك لآخره بقى؛ وخلصت كل الأنشطة البشرية وزرت كل الأماكن في كل البلاد يبقى إنت كده وصلت لمرحلة الفضاء الخارجي، وناسا مش هاتسيبك، عاملين جولات مجانية أونلاين في مركز أبحاث لانجلي في فيرجينيا -وده أقدم مركز بحث تابع لناسا- وكمان في مركز أبحاث جلين في أوهايو، هتقدر تتفرج على المكان وتعرف معلومات عن المهمات الفضائية اللي عملوها واللي لسه بتحصل دلوقتي، وكمان عندهم أبلكيشان ممكن تنزلها على موبايلك عشان تعيش أكتر في جولات الواقع الإفتراضي اللي عاملينها واللي من ضمنهم برضه إنك تشوف الكرة الأرضية من نقطة محطة الفضاء الدولية.