share this article

لما حركة الطيران بين دول العالم وقفت؛ و المطارات قفلت والطيارات ركنت على جنب؛ بالتبعية طبعاً كل الشركات والأنشطة اللي كانت ليها علاقة بالسفر هي كمان عطلت، وبدأ كل اللي عنده سكة تانية يغير بيها نظام شغله أو فكرة شركته يحاول يلاقي حلول بديلة، من ضمن الناس دي Airbnb، اللي موضوعهم كله قايم على إنك تسافر وتأجر شقة أو أوضة في المدينة اللي إنت بتزورها، والكلام ده حالياً مش شغال وفيه شكوك أصلاً إن الناس تفضل تعتمد على الطريقة دي في السفر حتى بعد ما الحظر ينتهي وحركة الطيران ترجع.

عشان كده Airbnb ابتدوا فكرة جديدة من خلال الموقع بتاعهم بتعتمد أكتر على التجارب والخبرات المتبادلة بين الناس وبعضها، الفكرة دي معتمدة على Airbnb Experiences اللي كانوا بدأوها في 2016؛ وبتعتمد إنك مش بس بتروح مدينة أو بلد وتأجر مكان وخلاص؛ لأ بيقترحوا عليك حاجات تعملها في المكان ده مع السكان المحليين، أهو تبقى شفت البلد من منظور أقرب واتعرفت على الناس وعشت تجربة مختلفة، وده بالظبط اللي بيعلموه دلوقتي بس أونلاين.

وإنت قاعد في بيتك؛ تقدر تفتح موقع Airbnb؛ تختار المكان اللي يعجبك في العالم ضمن أكتر من 30 بلد، وتختار الحاجة اللي نفسك تعملها، تلعب رياضة مع حد أو حتى مع جروب في أي مكان صوت وصورة من خلال Zoom، تعمل يوجا مع ممارس يوجا في اليابان، تخبز حلويات سويدية مع طباخ محترف، تتعلم تعزف آلة موسيقية، حتى ممكن تتعلم إزاي تعمل فنجان قهوة مظبوط مع حد وظيفته إنه "ذوّاقة محترف قهوة"، أو تقرأ ورق التاروت أو تعرف شوية أسرار عن عالم السحر والخدع وخفة الإيد.

لو اتحمست للموضوع؛ افتح اللينك ده وابتدي استكشف كل أنواع الأنشطة المتاحة، وهتلاقي حاجات منهم مجانية من غير فلوس، وحاجات تانية بأسعار متفاوتة من أول 5 دولار في الساعة وإنت طالع.

المصدر: Airbnb