share this article

تخيل كده إن البحر يبقى فيه بلاستيك أكتر من السمك، الكلام ده مش خيال علمي، ده تقارير بتقول إنه هيحصل على 2050 لو البني آدمين مغيروش من أنماط استهلاكهم للبلاستيك، اللي بيمثل خطر شديد على المخلوقات البحرية وبقاله أكتر من 50 سنة بيأثر علي استمراريتهم. عشان كده منظمة الحفاظ على البيئة بنمطقة البحر الأحمر HEPCA بقالها سنين بتحاول تكافح ضد استخدام البلاستيك واستهلاكه الغير مسؤول، وجهودهم جابت نتيجة لما الحكومة أعلنت انهارده إنهم وافقوا على الاقتراح المتقدم من المنظمة.

محافظ البحر الأحمر أعلن عن قرار بمنع استخدام البلاستيك في المحافظة بداية من 1 يونيو، القرار صدر لحماية المخلوقات البحرية اللي بتعاني بسبب استعمال البلاستيك لإنهم بياكلوه وبيموتوا، وده خطر برضه جدًا على البشر عشان ساعات السمك اللي بناكله بيبقى هو نفسه واكل بلاستيك، اللي بيبقى ليه تأثير سام علينا. الحظر هيبقى علي الأكياس اللي بتستعمل مرة واحدة، وهيتطبق على المطاعم، كافيهات، أي سوبرماركت، صيدليات، محلات البقالة، الجزارين، بياعين الخضار والفاكهة، إلخ. هيتطبق كمان على استعمال الأدوات البلاستيك زي المعالق والشوك والأطباق، في المطاعم ومحلات الأكل والشرب عامةً، وكمان أثناء رحلات السفاري، والمراكب في المياه. بس القرار مش هيتطبق على الأكياس التقيلة بتاعت الزبالة. برضه من ضمن الحاجات اللي هتحصل إنه هيتمنع تصنيع الأكياس البلاستيك في المدينة.

من ناحيتهم، HEPCA أعلنوا إنهم هيكملوا شغل على الأرض، وهيعملوا ورش، حملات توعية بأضرار البلاستيك، حملات تنضيف، وحاجات تانية كتير عشان المحافظة تقضي على استهلاك البلاستيك. هيركزوا شغلهم على الهوتيلات والمنتجعات في المنطقة، ومؤخرًا إدوا اعتماد لفندق جراند سيفا في الغردقة كأول فندق يلتزم بالمعايير دي.

المصدر: أخبار اليوم