share this article

الهند بلد عجيبة في كل حاجة، مش بس تاج محل اللي يعتبر من عجايب الدنيا لا ده البلد كلها عجيبة، كل حاجة وعكسها واللي عايش فيها أكثر من مليار بني آدم بيتكلموا أكثر من ألف لغة، وفي المقال ده جمعنالك أكثر 10 حاجات عجيبة هتشوفها في الهند.

1- السنة عندهم 6 فصولمصدر الصورة:avanya shivkumar

أيوة بالظبط كدة زي ماسمعت؛ السنة في الهند متقسمة 6 فصول؛ الفصول الأربعة العاديين (صيف شتاء ربيع خريف) وفيه فصلين كمان زيادة في الهند هو فصل المونسون، وده اللي المطر تقريبًا مش بتقف فيه وبيكون من شهر يونيو لحد شهر سبتمبر، وننصحك متسافرش في الوقت ده للهند لأن تقريباً المطر ممكن يفضل متواصل لمدة ساعات وأحيانا طول اليوم، والموسم الأخير هو ما بعد المونسون وده بيكون من سبتمبر لديسمبر.

2- متحاولش تخرج بعملة من المطار مصدر الصورة: TheCultureTrip

لو إنت من هواة الإحتفاظ بعملة الدولة كتذاكر فخد بالك وإنت بتحاول تخرج بفلوس من الهند علشان عندهم قانون يجرم الخروج بعملة البلد خارج الحدود، العقوبة تعتبر رقمها صغير ومش بتتطبق غير على المبالغ الكبيرة يعني ورقة ولا اتنين أكيد هيعدوا.

3- آه يعني لا

أول ما تنزل الهند لما تسأل أي حد من الهنود عن الطريق مثلًا أو حاجة مش عارفها وقبل ما تخلص كلامك تلاقيه بيهز دماغه يمين وشمال كإنه بيقولك لا، بس في الحقيقة هز الدماغ يمين وشمال عند الهنود مش معناه لأ، معناه أنه بيسمعك ومركز في كلامك، ولو حب يقولك لأ هيهز دماغه مرتين ناحية الشمال.

4- الشرطة بتربي شنبها علشان مرتبهم يزيدمصدر الصورة:pinterest

من ضمن الحاجات اللي هتلاحظها في الهند إن أغلب أفراد الشرطة مربين شنبهم والظاهرة دي منتشرة هناك لأن فيه قانون عندهم بيقول إن الشرطي اللي يربي شنبه يزيد جزء بسيط من راتبه الشهري، وده بعد شوية دراسات أثبتت أن الشنب بيزيد من هيبة رجل الشرطة.

5- مش بيعبدوا البقر"مفاجأة"مصدر الصورة: Independent

من ضمن الحاجات الغريبة اللي ممكن تقابلك وإنت ماشي في أي طريق سريع في الهند إنك تلاقي كل العربيات بتهدي فجأة ولما تقرب تكتشف إن اللي كان معطل الدنيا بقرة واقفة في نص الطريق، وبما إنها مقدسة محدش يقدر يمشيها أو يجبرها على التحرك، ومن ضمن المعلومات الغلط اللي عندنا إن الهنود بيعبدوا البقرة؛ والحقيقة أنهم بيقدسوها لدرجة أن فيه بعض المسلمين مش بتضحي بالبقر في عيد الأضحى احتراماً لمشاعرهم.

6- الناس بترقص في الشارع عادي
مصدر الصورة:travelpress

بما إن الهنود عددهم فوق المليار تقريبًا هما أكثر شعوب العالم عندهم احتفالات ومهرجانات بين الأعياد الدينية والمهرجانات المختلفة زي مهرجان دخول الربيع وغيره، الجميل إن الهنود في أي عيد أو مهرجان بينزلوا يحتفلوا ويرقصوا في الشارع وتقريبًا كل اللي في الشارع يشاركهم الرقص والغنا، هتبقى فرصة حلوة أوي لو بتزور الهند في التوقيت دة لأن تقريبًا أغلب الهنود هيطلبوا منك تشارك وترقص معاهم.

7- بتشرب سجاير غصب عنكمصدر الصورة: QZ

فيه مدن كتيرة نسبة التلوث فيها عالية جدًا، وده بسبب عوادم السيارات وعوادم المصانع وغيرها من الحاجات اللي بتلوث الجو، مومباي المدينة اللي في شرق الهند تعتبر أكثر المدن تلوثاً، حسب الإحصائية المنشورة في موقع Indiatimes لما تقضي يوم واحد في المدينة كأنك دخنت أكثر من ١٠٠ سيجارة، علشان كده بننصحك تخلى بالك لما تكون هناك وأفضل وقت تزورها بعد موسم المونسون علشان المطرة بتكون نظفت نسبة كبيرة من التلوث. 

8- العروسة هي اللي تدفع المهر للعريسمصدر الصورة:weddingz

من ضمن قوانين الهند إن العروسة هي اللي بتدفع المهر للعريس مش العكس، وكان فيه بحث لطيف نشره موقع Vox بيحدد سعر كل عريس عندك، مثلًا لو بنتك عايزة تتجوز موظف بنك هتدفع 15 ألف دولار، وثمن رجل الأعمال اللي معاه ماجستير بيكون سعره 22 ألف دولار، والأسعار بتزيد وتقل حسب المستوي الإجتماعي، أما بالنسبة للعريس فمطلوب منه إنه يجيب وزن العروسة كله دهب وتلبسه يوم الفرح وتبقي مغطيه بيه نفسها.

9- الهند فيها 1600 لغةمصدر الصورة:medium

بسبب التنوع الرهيب الموجود في شعبها؛ فيه مناطق بالكامل بتتكلم لغة مختلفة، وآخر احصائية اتعملت عن تعداد اللغة؛ قالت إن الهند فيها أكثر من 1600 لغة، وفيه لغتين رسميتين هما الهندي والبنغالي، 
علشان كده خد بالك وإنت مسافر في الهند في بعض المناطق مش بتتكلم انجليزي وهتعاني علشان تتواصل مع أهل البلد.

10- كومبه ميلامصدر الصورة:Getty Images

كومبه ميلا هو مهرجان ديني هندوسي ويعتبر أكبر تجمع بشري في العالم واللي شارك فيه آخر سنة أكثر من 70 مليون شخص، 
العيد ده بيحصل 4 مرات كل 12 سنة والسنة الأخيرة ليه كانت 2013 يعني لو زيارتك اللي جاية للهند في 2025 متستغربش لما تلاقي الهند فاضيه هتلاقيهم في مدينة الله آباد.