share this article

طول الوقت بنحاول ندور على مؤتمرات أو أي إيفنتس بره البلد نحضرها وتكون بتغطي تكاليف السفر والإقامة، عشان نسافر ببلاش، بس تخيل لو دي بقت وظيفتك أصلاً؟ تسافر وتلف الدنيا وكمان تاخد مرتب على كده!

موقع Wowcher البريطاني أعلن عن فرصة شغل لواحد محظوظ من محبي السفر، هيلف 40 بلد حوالين العالم ويكتب عن الأماكن اللي بيزورها على السوشيال ميديا، متخيل؟ أنت أول حاجة بتفكر تعملها لما تسافر إنك تعمل Check in متخيل لما ده يبقى شغلك كمان، ثانية واحدة هروح أقدم قبل ما أكمل الخبر..

الرحلة اللي هتستمر لمدة سنة هيلف فيها سعيد الحظ لدول زي أمريكا وتايلاند والإمارات وإيطاليا وأيسلندا وبالي ودول تانية كتير، اللطيف في الحوار إن الموقع بيديك فرصة إنك تاخد حد من صحابك معاك، وممكن تغيره عادي خلال الرحلة، يعني هتتفسح إنت وصحابك ببلاش.

إيه المطلوب منك بقى لو كنت سعيد الحظ؟ المطلوب إنك تكتب عن الأماكن اللي هتروحها، وتصور فيديوهات مدتها متزدش عن 30 ثانية وتنشرها على الأكونتس بتاعتك، ورغم كل الحاجات اللي إحنا مستعدين نعملها ببلاش دي، الموقع هيديك مرتب حوالي 25 ألف جنيه إسترليني، يعني حوالي 520 ألف جنيه مصري.

حتى الشروط اللي حاطينها للوظيفة مش صعبة، كل المطلوب إنك تكون عديت 18 سنة، وعندك جواز سفر ساري، وتبعتلهم فيديو 30 ثانية تقول فيه "ليه ممكن تكون إنت الشخص المناسب للوظيفة دي أو ليه لازم يقبلوك؟"، بس كده؟ آه أمال أنت فاكر إيه!

للتقديم على وظيفة الأحلام من هنا: Wowcher 

المصدر: Lonely Planet