share this article

عارف الجملة اللي بنسمعها كتير بتاعة الكنز في الرحلة مش في الوجهة اللي بتوصلها؟ الجملة دي غالباً كانوا يقصدوا بيها المواصلات! يعني لو سافرت أوروبا مثلاً هتلاقي من ضمن المتع هي إنك تسافر من مدينة لمدينة بقطار أو بأتوبيس وتتفرج على الطبيعة والطريق اللي إنت ماشي فيه، فيه طريقة تانية بقى بنشوفها في الأفلام الأمريكاني اللي هي "الـڤـان" .. العربية اللي بتبقى عبارة عن بيت متنقّل بتاخده الأسرة أو شلة الأصدقاء وينطلقوا بيه يعملوا رحلة على كذا مدينة أو حتى بين كذا دولة.

عندك الفرصة دلوقتي إنك تطبق اللي بتشوفه في الأفلام الأمريكاني لو رحت أسبانيا، ومش هتحتاج تشتري الفان وتسافر بيها وبعد كده تدوّر لها على بيعة، لأ فيه شركة اسمها "Camplify" تعتبر من الشركات الأشهر في بريطانيا وأستراليا اللي بتقدملك فرصة السفر في عربيات زي دي -حاجة كده زي airbnb بس بدل تأجير الشقق العادية هتبقى تأجير الشقق المتحركة على عربية- وساعتها هتبقى دي طريقة حلوة عشان تنطلق بيها لأماكن وحتت مش كل الناس بتروحلها، أو بمعنى أصح بعيدة عن الأماكن السياحية والزحمة بتاعة المزارات المعتادة.

الشركة كمان بتساعد الناس في إنها ترشحلهم أماكن حلوة لازم يعدّوا عليها ويشوفوها، وطبعاً اختيارهم لأسبانيا كان بسبب كمية التنوع اللي في المدن بتاعتها واختلاف الثقافة والتاريخ اللي فيها، وكمان بيقولولك إزاي تتعامل خلال الرحلة نفسها؛ يعني إزاي تختار المكان اللي هتركن فيه الفان وتعسكر فيه، وإزاي تتخلص من المخلفات اللي معاك طول الطريق، لأن الهدف دايماً بيكون السفر المستدام وإن السياح والمسافرين ميسببوش ضرر للبيئة والأماكن اللي بيعدّوا عليها، وأكيد بيفهموك عوامل الأمان والسلامة اللي لازم تمشي عليها.

المصدر: Lonely Planet