share this article

بمجرد ما تسمع اسم "شفشاون" بتلاقي نفسك بتبتسم بشكل تلقائي، احساس بالراحة والطمأنينة بتكتسبهم من تأثير اللون الأزرق بدرجاته على نفسك، المدينة اللي ألوانها بالكامل بالأزرق، البيوت المطاعم الشوارع، تحس فعلا أكنك بتتمشى جوه السعادة نفسها، تقدر تقول نفس الوصف على المدينة الزرقاء في الهند "چوديبور"، والمدينة الوردية "چايبور"، امتزاج الألوان بالذكريات الجميلة عن المناطق، والتأثير اللي بتعمله الألوان في البشر، حالة الصفاء والسعادة اللي باينة ع الوشوش بدون مجهود، ده اللي اتنقل عندنا أخيرا في مصر، وانت ماشي في شوارع "برج البرلس"


المصدر: فتحية السيسي

من سنتين كنت بحاول أدعبس واكتشف أماكن جديدة أسافرها في مصر، ورجلي خدتني لمحافظة كفر الشيخ، تحديدا قرية اسمها "برج البرلس"، سعادة ما تتوصفش وأنا ماشي في الشوارع شايف رسومات الجرافيتي الملونة بتزين جدران البيوت كلها، تصميمات مختلفة من ثقافات مختلفة، اتسمرت مكاني وما بقتش مصدق، القرية في النص بين البحر من ناحية وبحيرة البرلس من الناحية التانية، سألت أهل المدينة عن إيه سبب الرسومات الموجودة على البيوت قالولي إن في مهرجان بيتعمل كل سنة أول شهر أكتوبر بيجي فنانين من كل حته في العالم علشان يرسموا على الحيطان ويعبروا عن فنهم على البيوت كمان.


المصدر: فتحية السيسي

الجميل إنك ممكن تروح هناك تشارك كواحد من الفنانين وترسم بنفسك على الحيطان، حتى لو ما بتعرفش ترسم فتقدر تروح تشوف أكبر معرض فني مفتوح ممكن تشوفه في مصر، وتشوف الرسومات وهي بتتخلق، وتتكلم مع الفنانين اللي من أنحاء العالم ويمكن كمان تساعدهم، أنا شخصيا هحس بالذنب لو أنا على بعد ساعتين ونص مواصلات من الجمال ده كله، وما أروحش أشوفه.


المصدر: فتحية السيسي

برج البرلس.. معرض الجرافيتي المفتوح

السنة دي هتبقى السنة الخامسة للمهرجان اللي ابتدته مؤسسة الفنان عبدالوهاب عبد المحسن هي بتدعو كل فنانين العالم كل سنة علشان يرسموا على البيوت وينقلوا فنهم على جدران البيوت اللي نسبة الهجرة غير الشرعية فيها عالية جدا وفي كتير من شبابها بيموتوا بالطريقة دي، هيشارك فيه السنة دي 42 فنان من 18 دولة اللي بيرسموا على جدران البيوت والمراكب الخشب وبيتعمل معرض في القاهرة بعد 15 يوم من المهرجان.


المصدر: فتحية السيسي

ازاي توصل لقرية "برج البرلس"

علشان توصل من القاهرة بتروح موقف عبود جمب مترو المظلات وتركب مواصلة لبلطيم وسعرها 32.5 جنيه، وبعد ما توصل هتنزل وتاخد مواصله تانية لحد برج البرلس ب4.5 جنيه.

علشان توصل من الإسكندرية بتروح الموقف الجديد في محرم بك على الطريق الدولي وتركب لبلطيم مواصلة ب 21جنيه، وبعد ما توصل هتنزل وتاخد مواصله تانية لحد برج البرلس ب4.5جنيه.

المصدر: فتحية السيسي

خد بالك إن قرية برج البرلس مافيهاش خدمات كتير، لكن ده أوقات بيخلي التجربة ممتعة أكتر، يعني مثلا مفيش مطاعم هناك، بس ممكن لو عايز تتغدى هناك ممكن تروح حلقة السمك اللي على البحر، وتختار من السمك الطازة اللي بيلعب، وفي واحد عنده شواية جمب الحلقة بيشوي للناس، تاخد الغنيمة دي وتطلع على قهوة منصوبة على البحر، وتبقى بتاكل وقدامك الماء والخضرة والوجه الحسن، وكل ده ب ٤٠ جنيه، مين هيحتاج الشيراتون بعد كده؟


المصدر: فتحية السيسي

فكرة المهرجان فعلا هايله وبتنور أماكن جديدة على خريطة مصر السياحية، وبتنقلنا لعالم تاني ونوع سياحة جديد يضاف للمكان وطبعا دة هيزود فرص عمل كتير للفترة اللي جاية، والأهم فعلا هو اهتمامنا بالحاجات المشابهة لكده ونشجعها.