share this article

لما بسافر بلد ببقى مهتم أعرف لهجتها المحلية، بحاول كام كلمة ومعانيها، بمجرد ما بقولها المعاملة بتختلف 180 درجة، اللي مكشر وشه بيضحك لما يسمعني بحاول أتكلم لهجته، ومساحة الود بتزيد بينا، والناس بتبقى حابة تساعدك بكل طاقتها، في حاجة في البني آدم لما بتحسسه بأهمية بلده، بالتالي بيحس هو بأهميته في عين الشخص اللي بيكلمه. جربها وشوف قد إيه طريقة الاستقبال هتتغير. الموضوع مختلف شوية في النوبة لإن كده كده أهلها بيحبوك من ساعة ما عينهم بتقع عليك، وبيساعدوك بكل طاقتهم، بس ده ما يمنعش إن الكلام يزود المحبة وتكبر مساحة الود. هنا جمعنا لكم 8 كلمات نوبية باللهجة الكنزية، استعملهم في زيارتك الجاية للنوبة وأسوان.


1- اتفَضّلوس

المصدر Xavi Cobos

يعني اتفضل أو أهلاً أو مرحباً، تلاقيها ساعات مكتوبة في أماكن نوبية كتير هتزورها، مطاعم وفنادق وكافيهات، وبيوت النوبيين اللي بتستقبل سياح عايزين يتفرجوا على الثقافة النوبية. لما بتتنطق بسرعة أول حرفين بيتاكلوا، فبتبقى "فضّلوس" على طول.

2- إنَّافياتو

المصدر Rowan Abd El Meguid

غالباً هتسمعها في آخر رحلتك، ومعناها مع السلامة، حلو أوي لو حصل العكس، وإنت اللي قولتها لمضيفك في آخر يوم. كده ضمنت صداقة بالشخص هتدوم سنين، أهالي الأقاليم ودودين وبيحبوا الناس، صداقتهم مكسب.

3- أدِّيل ما

المصدر David Freid

دي هتستخدمها كتير في أسوان تحديداً، لأن معناها راجل لطيف، وفي أسوان أغلب اللي هتقابلهم من النوبيين ناس لطيفة، والقعدة معاهم تبهج، لأنهم ناس مش بتدي الهم مساحة واسعة في حياتها، دنيتهم كلها ضحك وفرح ومزيكا.

4- آشْري ما

المصدر Phil Carlton

يعني بنت حلوة، عموماً بتتقال من البنات للبنات، لو راجل هو اللي بيقولها فهيقولها لطفلة، إنما مانصحكش تجربها مع بنت كبيرة، لأنها هتتحسب معاكسة.

5- إسِّي جيلّه

المصدر Irumtje

دي بقى لكييفة الشاي، وهي جملة من مقطعين إسِّ يعني مياه، وجيلا يعني شاي، التعبير كله على بعضه يعني مياه حمرا. لو قولتها لويتر في أي كافيه هتشرب أحلى شاي في عمرك.

6- إتشي جيلّه

المصدر Clemens Grün

يعني شاي بلبن، ده الشاي المفضل للنوبيين، ولو سكنت في بيت نوبي فترة زيارتك، هتطلع من عندهم بتنقط شاي بلبن. ولأن النوبيين كُرمَة بزيادة، غالبًا لما هتستخدمها هتسبقها بـ"كفاية" إتشي جيله.



7- رايجْرى أو ميابو

المصدر Aida Laleian

خلاص بقالنا 3 أو 4 أيام هناك وبقينا من أهل البلد، نبدأ نسأل على الناس بقى اللي قابلناهم أول يوم. رايجْرِى يعني عامل إيه، وساعات بيتقال بدالها مينابو، بس الأشهر رايجْرِى، لدرجة إن غير النوبيين في أسوان عارفينها، وهتسمعها دايماً في كل حتة هتروحها في أسوان، سواء في النوبة أو برة منها.

8- إسِّى

المصدر I'tsElemental

شمس أسوان صيف شتا سخنة، هتحس إنك لو رفعت إيدك شوية ممكن تمسك الشمس من قربها، وهتعرق كتير، وهتشرب مياه أكتر، فخلي الكلمة إسَّى في مخك، معناها مياه، لو طلبتها بالنوبي هتجيلك ساقعة ومشبرة.

اللغة النوبية لغة جميلة وفيها دفا عجيب، وهي في الأصل مزيج بين العربي والسواحيلي، لهجة شرق أفريقيا، بيتكلم بيها جزء من شعوب السودان والصومال وأثيوبيا. في مجموعة من شاب النوبة عمل محاولة لتعليمها باللهجتين -اللهجة الفدجكية والكنزية- في أبليكيشن ممكن تحمله من بلاي ستور.

لو بتفكر تروح أسوان هتحتاج تعرف عن (4 أفكار عكس الحقيقة عن أسوان وأهلها)، وخد معاك بلاي ليست (سيدة المسافات الطويلة) تونسك في الطريق.