share this article

خلينا متفقين إن الفيزا الشنجن مش أسهل فيزا في الدنيا، مش مستحيلة يعني بس مش زي فيزا نيبال مثلًا هتروحلهم بصورة بطاقتك واسمك وشكرًأ. في شوية إجراءات وأوراق لازم تظبطهم على مهلك، ولازم أهم حاجة تفهمهم إنك مش هتعمل حزلقوم وناوي على هجرة غير شرعية، يعني عامل حسابك إنك راجع ولازم يقتنعوا بده.

منطقة الشنجن متكونة من 26 بلد بيسمحوا بالحركة الحرة ما بين المنطقة دي لكل مواطنيهم، كأنها بلد واحدة. من ال26 بلد دول في 22 جزء من الإتحاد الأوروبي و4 جزء من رابطة التجارة الحرة الأوروبية. دول أعضاء منطقة الشنجن:

النمسا، بلجيكا، التشيك، الدنمارك، إستونيا، فنلندا، اليونان، فرنسا، ألمانيا، المجر، آيسلندا، إيطاليا، لاتفيا، ليختنشتاين، ليتوانيا، لوكسمبورغ، مالطا، هولندا، النرويج، بولندا، البرتغال، سلوفاكيا، سلوفينيا، إسبانيا، السويد، سويسرا.

لاتفيا هي الدولة رقم واحد في الموافقة على فيزا الشنجن، بنسبة 99.3%، يعني معدل رفض الفيزا للسفارة اللاتفية 0.7% بس من كل الطلبات اللي بتجيلهم. وراها علطول في آيسلندا وليتوانيا، الاتنين بنسبة 99.1%. وراهم في إستونيا بنسبة 99%، سلوفاكيا 98.4%، بولندا 98.3%، اليونان 98%، ولوكسمبورغ 97.9%. ورا كل دول مش بعيد اوي التشيك بنسبة 97.8%.

اليونان هي أسهل دولة تاخد منها فيزا شنجن لو مصري، وسويسرا أصعب واحدة، ولازم تبقى مجهز جدول هتعمل إيه في البلد من قبل ما تسافر عشان غالبًا هتتسأل عنه.

الفيزا الشنجن بتسمحلك تقعد 90 يوم كحد أقصى في فترة 180 يوم. الفيزا هتبقى صالحة لمدى معينة – ممكن جدًا تبقى أقل من 90 يوم. تقدر تسافر براحتك ما بين ال26 دولة شنجن طول ما الفيزا صالحة، ولو عايز تمشي وترجع تاني منطقة الشنجن في فترة ال180 يوم، ابقى اختار فيزا دخول متعدد وإنت بتعمل الإستمارة.

أنواع الفيزا

(Uniform Schengen Visas (USV

الفيزا دي كأنها تصريح من دولة من دول الشنجن إنك تعمل ترانزيت أو تقعد في منطقة الشنجن لمدة معينة لحد 90 يوم في كل 6 شهور بداية من يوم الدخول.

حسب هدف الزيارة، الفيزا دي بتتقسم نوعين:

A” دي فيزا ترانزيت في المطار وبتسمحلك إنك تسافر من مطار لمطار في منطقة الشنجن بس من غير ما تدخل منطقة الشنجن في البلد نفسها (مش هتسيب المطار يعني). دي إجباري للي هيسافروا من بلد مش شنجن لبلد تاني مش شنجن بس هتعمل ترانزيت في مطار بلد شنجن.

C” دي فيزا إقامة محدوة وبتسمحلك تقعد في بلد شنجن مدة معينة حسب الفيزا طالعة لك بمدة إيه. نوع الفيزا ده حسب مسافر ليه، بتطلع في 3 أشكال:

فيزا دخول مرة واحدة: دي بتسمحلك تدخل بلد الشنجن مرة واحدة بس لمدة معينة. مجرد ما تسيب منطقة الشنجن اللي دخلت منها، الفيزا صلاحيها بتنتهي حتى لو الوقت المسموح لك تقعد في منطقة الشنجن فيه لسه مخلصش.

فيزا دخول مرتين: دي زي الي فوق، بس ممكن تخش منطقة الشنجن مرتين، يعني حسب مدة الفيزا بتاعتك تقدر تدخل الشنجن وتطلع وتخش تاني من غير مشاكل. بس مجرد ما تمشي للمرة التانية، الفيزا صلاحيتها بتنتهي.

فيزا دخول متعدد: دي بتسمحلك تخش وتطلع منطقة الشنجن براحتك. بس ميتفعش تقعد أكتر من 90 يوم في ال180 يوم برضه، بداية من اليوم اللي دخلت فيه منطقة الشنجن.

لأوراق المطلوبة للفيزا السياحية

لما تيجي تقدم على فيزا شنجن عشان تسافر بلد أو أكتر في منطقة الشنجن، في شوية حاجات لازم تبقى معاك قبل ما تقدم. لو ناوي تسافر أكتر من بلد، يفضل تقدم في سفارة البلد اللي هتقعد فيه أكتر وقت، يا كده يا سفارة البلد اللي هتخش منه. لو خدت فيزا دخول متعدد، هتعرف تخش وتطلع دول الشنجن براحتك في المدة اللي مكتوبة لك على التأشيرة.

  • استمارة التقديم لازم تتملي بالكامل وتتمضي.
  • لازم يبقى في صورة، وتبقى صورة باسبورت يعني جايبه الوش كله وخلفية بيضاء، وحديثة.
  • جواز سفر صالح لمدة 3 شهور وصورة منه - وصورة من أي فيزا خدتها قبل كده – ولازك يبقى فيه على الأقل صفحتين فاضيين.
  • HR Letter من مكان شغلك ممضي وباين فيه شغال إيه ومن إمتى وآخر مُرتبات خدتها، وإذن إنك واخد إجازة.          
  • كشف حساب بتاع أخر 6 شهور ممضي من البنك وفيه مثلًا 1000 يورو أو ما يعادلها كإثبات إنك هتعرف تغطي مصاريفك هناك. لو معكش كشف حساب، وطالع عند صحابك أو قرايبك، لازم يمضوا استمارة رسمية في المكتب المختص هناك إنهم هيغطوا مصاريفك ويبعتوا كمان دعوة ليك. خد معاك أصول الحاجات دي وإنت رايح تقدم على الفيزا.
  • حجز طيران أو خط سير، وحجز فندق أو هوستيل.
  • تأمين صحي يغطي مدة إقامتك وأي طوارىء ممكن تتعرضلها، ولازم يغطي 30 ألف يورو ويبقى صالح في كل دول الشنجن، وده لازم تطلعه قبل الفيزا.
  • اكتب ناوي تعمل إيه هناك ومسافر ليه وهتقعد في كل حته قد إيه، وكل بياناتك الشخصية في ورقة.
  • لو صاحب شغل، أوراق تسجيل الشركة، وكشف حساب الشركة أخر 6 شهور، وبطاقة ضريبية.
  • للطلبة، إثبات قيد وجواب موافقة من الجامعة أو المدرسة على السفر.
  • لو قاصر، لازم شهادة ميلاد القاصر، واستمارة تقديم متوقعة من الوالدين، و نسخ من بطاقات الأهل، وموافقة من الأهل ممضية من الاتنين أو الوصي لو القاصر مسافر لوحده.

بيانات مركز تقديم الفيزا (اليونان):

العنوان

44، مكتب G، Giza Residence Tower، شارع الجيزة، الجيزة

ساعات العمل

تقديم الأوراق

الأحد-الخميس من 8:30 صباحًا إلى 12:00 مساءً.

استلام الفيزا

الأحد-الخميس من 2:00 مساءً إلى 4:00 مساءً.

رقم التليفون

02-33323001  (اتصل من الأحد للخميس، من 8:30 ص – 4:30 م)

البريد الإلكتروني

Infogreece@vfshelpline.com

*أي حد ممكن يقدم في مركز تقديم الفيزا اللي في القاهرة، ما عادا الناس اللي جوازاتهم طالعة من المكاتب دي 18, 19, 20, 21, 36 و 37، دول لازم يقدموا في القنصلية اليونانية في الإسكندرية.

القنصلية اليونانية في الإسكندرية

العنوان
63، شارع الإسكندر الأكبر، الشاطبي.

رقم التليفون
(00203) 4878454, 4878455, 4802088, 4802099  (اتصل من الإتنين للجمعة، من 10:00 ص – 1:30 م)

البريد الإلكتروني
grgencon.ale@mfa.gr  

الخطوات (فيزا اليونان)

  • املأ استمارة التقديم، وجهز معاها الأوراق اللي مكتوبة فوق.
  • احجز معاد في مركز تقديم الفيزا
  • اتأكد إن كل ورقك بالإنجليزي
  • لو معاكش فيزا شنجن في جواز سفرك الحالي، لازم تجيب باسبورت قديم بيغطي أخر 7 سنين (والفراغ بين الجوازين ميكونش أكتر من 15 يوم)، لو مفيهوش برضه يبقى لازم تجيب شهادة تحركات من مجمع التحرير لأخر 7 سنين وكل الجوازات اللي معاها مترجمة.
  • لو قاصر، غير الورق اللي فوق، لو القاصر هيقدم من غير واحد من الأهل أو الاتنين، لازم ييجوا الاتنين لمركز تقديم الفيزا يمضوا على الاستمارة قدام موظف المركز. لو حد من الأهل مسافر بره، لازم يعملوا الموافقة دي في السفارة اليونانية في البلد اللي هم فيها، ولازم الأصل يروح لمركز تقديم الفيزا ومعاه نسخة من جوازتهم.
  • للمتزوجون، قسيمة الجواز أساسية لو هيقدموا سوا أو لو حد منهم هيقدم بورق ليه علاقة بالتاني.

*الإجراءات دي ممكن تفرق من سفارة دولة من دول الشنجن للتانية

ملاحظات

  • كل اللي بيقدم على فيزا لازم يحضر بنفسه، كبير أو صغير
  • رسوم الفيزا مش بترجع ولازم تدفع كاش في وقت التقديم
  • في حالة وجود أي مستندات ناقصة، ممكن تقدم تاني في خلال 5 أيام عمل من 12 م إلى 1 م، من غير ما تحجز معاد تاني
  • جهز كل الورق اللي ليه علاقة بمواعيد سفرك عشان متتأخرش في التقديم
  • كل الورق لازم مترجم، ما عدا الأوراق دي لازم تترجم في Greek community بس (17 شارع سليمان الحلبي، وسط البلد):
  1. سجل تجاري
  2. بطاقة ضريبية
  3. شهادة التحركات

تكاليف مركز تقديم الفيزا و المدة

فيزا شنجن إقامة قصيرة، أقل من 90 يوم: 60 يورو

فيزا شنجن إقامة قصيرة، أكتر من 90 يوم: 99 يورو

أطفال ما بين 6 و 12 سنة: 35 يورو (بس اليونان بتدي فيزا بلاش لأي طفل تحت 12 سنة)

تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر إنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك، هتحتاج تطلّع تصريح سفر من الجيش لكل سفرية.

 في حالات تانية ممكن تحتاج فيها تصريح سفر من الجيش لو أنت لسه في سن التجنيد.

أسئلة مهمة

الفيزا بتاخد وقت قد إيه عشان تطلع؟
في العادي أسبوعين – تلاتة، بس بننصح تروح قبلها ب 3 شهور عشان كتير بيبقى مواعيد الإنتيرفيو محجوزة مقدمًا.

محتاج تصريح أمني من مجمع التحرير عشان أسافر دول الشنجن؟
لأ، مش هتحتاج تصريح أمني من مجمع التحرير لأي دولة من دول الشنجن.

محتاج قيد عائلي عشان أسافر؟
لأ، مش مطلوب.

محتاج كشف حساب؟
آه، هتحتاج كشف حساب حديث وفيه كل العمليات اللي حصلت في أخر 6 شهور، وكل صفحة تبقى مختومة والبيانات كلها بالإنجليزي.

محتاج شهادة تحركات عشان أسافر اليونان؟
حسب الحالة، لو معاكش فيزا شنجن في جوازك الجديد أو القديم اللي مغطي أخر7 سنين، هتحتاج شهادة تحركات من مجمع التحرير لأخر 7 سنين.

محتاج فيزا لو نازل ترانزيت في دول الشنجن؟
لو إنت رايح دولة شنجن ونازل ترانزيت في دولة شنجن مش هتحتاج فيزا ترانزيت عشان هيبقى معاك فيزا شنجن صالحة كده كده.

بس لو جاي من دولة مش شنجن ورايح دولة مش شنجن وهتعمل ترانزيت في دولة شنجن، هتحتاج فيزا ترازيت في المطار، غير لو محقق حاجة من الشروط دي:

  • معاك فيزا شنجن صالحة
  • معاك فيزا صالحة لدولة في الإتحاد الأوروبي أو في المنطقة الإقتصادية الأوروبية، أو كندا، اليابان، أمريكا
  • معاك تصريح إقامة صالح لدولة في الإتحاد الأوروبي أو في المنطقة الإقتصادية الأوروبية
  • معاك تصريح إقامة صالح من أندورا، كندا، اليابان، جمهورية سان مارينو، أمريكا، ويكون بيضمنلك حق رجوع غير مشروط.
  • إنت من عائلة مواطن في الإتحاد الأوروبي أو رابطة التجارة الحرة الأوروبية أو سويسرا.

إيه إجراءات الفيزا للأطفال؟
تحت 6 سنين معفيين من رسوم الفيزا، فوق 6 سنين ليهم رسوم مكتوبة فوق. وفي جميع الأحوال هيحتاجوا الأوراق اللي مكتوبة فوق للقاصر.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

لو الفيزا اترفضت، أقدر أقدم تاني امتى؟
بعد 90 يوم من تاريخ الرفض.

إيه اللي هيحصل لو كسرت الفيزا؟
إنك تكسر الفيزا الشنجن ليه عواقب مش مضمونة. لو عديت المدة المكتوبة في التأشيرة ممكن تدفع غرامة كبيرة في المطار وأنت راجع مقابل كل يوم زيادة قضيته، وممكن يبقى مكتوب في ملفك إنك طولت وتتكدر المرة الجاية في الإنتيرفيو وإنت جاي تقدم على شنجن. وممكن كمان تتمنع من دخول دول الشنجن لفترة من سنة ل3.

محتاج تطعيمات لو مسافر اليونان؟
مفيش تطعيمات إجبارية لو مسافر اليونان، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟
ينفع تسافر مع كلبك، قطتك، لو محقق الشروط دي:

  • الرقاقة الإلكترونية اللي تحت الجلد.
  • متطعم ضد مرض الكلب –السعار- في مدة ما بين 30 يوم لسنة من قبل دخولك للبلد (ولازم عمره يكون على الأقل 12 أسبوع وقت التطعيم).
  • إختبار السعار
  • شهادة صحية بيطرية من طبيب بيطري مرخص في بلدك.
  • علاج ضد Echinococcus multilocularis للكلاب.

لو عندك أي معلومات زيادة عن إجراءات فيزا "الشنجن"، ياريت تبعتلنا إيميل فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "اليونان" قبل كده؟ هننبسط جدًا لو شاركتنا قصتك وصور مغامراتك!