share this article

بوجود 50 ولاية، ومقاطعة، ومناطق كبيرة، وشوية جزر، مفيش نقص في الأماكن اللي ممكن تروحها في أمريكا. من ألاسكا بثلجها لكاليفورنيا بشمسها، أمريكا فيها كل حاجة ممكن تتخيلها. بس عشان توصل لكل ده وتروح الحتت دي، الموضوع محتاج تخطيط عشان فيزا أمريكا مش سهلة اوي، بس بشوية تخطيط مظبوط والأوراق اللي تحت دي، الدنيا هتمشي كويس.

بيانات السفارة

العنوان
5 شارع توفيق دياب، جاردن سيتي، القاهرة.

ساعات العمل
السبت-الخميس من 7 صباحًا إلى 4 مساءً.

رقم التليفون
(20-2) 2797 3300

رقم الفاكس
(20-2) 2797 3200

البريد الإلكنروني
consularcaironiv@state.gov 

بيانات القنصلية

العنوان
فندق هلنان فلسطين، المنتزه، الأسكندرية.

ساعات العمل
السبت-الخميس من 8 صباحًا إلى 4:30 مساءً

رقم التليفون
538 5800 (203)

البريد الإلكتروني
alexpa@state.gov

 

خطوات التقديم:

  • املأ الاستمارة DS-160، علشان تطلع فيزا  B2 السياحية. في شوية حاجات تساعدك DS-160 guidelines
  • اعمل لنفسك حساب على ويب سايت التقديم
  • ادفع رسوم التقديم 160$ في أقرب فرع لبنك CIB. إحتفظ بإيصال الدفع عشان لو ضاع مفيش غيره، وهتحتاج CGI reference number اللي على الوصل عشان تحدد ميعاد المقابلة.
  • حدد معاد المقابلة. هتدخل على الويب سايت وتدوس على حدد ميعاد في القائمة اللي على إيدك الشمال. هتحتاج رقم جواز السفر، CGI reference number من وصل الدفع، والكود ال10 أرقام من صفحة تأكيد ملأ الاستمارة (DS-160).
  • روح للسفارة في معادك للمقابلة وخد معاك الأورق اللي هنقولك عليها

ملحوظة: لو جواز السفر يشمل كذا شخص، كل واحد منهم عايز ياخد الفيزا لازم يقدم طلب لوحده.

الأوراق المطلوبة للفيزا السياحية

  • جواز سفر صالح لمدة 6 شهور من بعد الفترة اللي أنت ناوي تقضيها في أمريكا، وتاخد كمان كل باسبوراتاك القديمة.
  • الاستمارة اللي هتملاها من موقع السفارة اسمها DS-160 .
  • صورتين (5cmX5cm) وبمواصفات معينة.
  • الوصل بتاع رسوم الفيزا، اللي مبترجعش تحت أي ظرف.
  • جواب بمعادك للمقابلة، يؤكد إنك حجزت معاد.

أوراق إضافية

السفارة الأمريكية بتطلب أوراق إضافية جنب الأساسية ولازم يبقوا معاك في المقابلة (ويفضل الأصول منهم مش الصور) لأن الورق دا من العوامل اللي هتتاخد في الإعتبار أثناء المقابلة.

  • إثبات دخل وبيان ضريبي وبيان بأي عقارات مملوكة أو أصول.
  • HR letter من الشركة اللي شغال فيها تبين مرتبك، وشغال هناك بقالك قد ايه، ومركزك، ومرتبات أخر 3 شهور.
  • جواب من البنك يبين معاملات الحساب في أخر 6 شهور
  • خط سير رحلتك
  • بيانات أي اعتقالات سابقة أو إدانات.
  • لو كنت في أمريكا قبل كده، خد معاك أي مستندات ليها علاقة بالفيزا السابقة.
  • إثبات إن رحلتك مؤقتة
  • إثبات إنك هتقعد فترة محددة
  • إثبات إنك مقيم خارج أمريكا وليك روابط إجتماعية ومالية تلزمك بالرجوع في نهاية زيارتك.
  • بالنسبة للطلبة، مطلوب النتائج الدراسية وبيان درجات والشهادات، وكمان مطلوب إثبات إن في دعم مالي زي كشف حساب بنكي أو إيداعات ثابتة في البنوك.

تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر أنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك بس في قوات الاحتياط، هتحتاج تطلّع تصريح سفر من الجيش لكل سفرية.

في حالات تانية ممكن تحتاج فيها تصريح سفر من الجيش لو أنت لسه في سن التجنيد. 

أسئلة مهمة

أقدم قبل الفيزا بوقت قد ايه؟
بننصح بشدة اللي هيقدم يبتدي عملية التقديم قبل معاد السفر ب3 شهور عشان المواعيد بتبقى محجوزة شهرين ثلاثة مقدمًا، وعملية التقديم ممكن تاخد من 90-120 يوم في بعض الحالات.

محتاج تصريح أمني من مجمع التحرير عشان أسافر أمريكا؟
لأ، مش محتاج تصريح أمني عشان تسافر أمريكا.

محتاج قيد عائلي عشان أسافر أمريكا؟
لأ، مش مطلوب.

إيه إجراءات الفيزا للأطفال؟
الطفل هيحتاج فيزا عشان يسافر لأمريكا وهتحتاج تدفعله الرسوم، بس لو الطفل أقل من 14 سنة مش هيحتاج يحضر المقابلة.

ممكن أسافر مع عائلتي؟
اه، بس كل واحد باستماراته ورسوم تقديمه.

ايه رقم CGI reference number؟
ده رقم على الوصل بتاع مصاريف الفيزا، فلازم تحتفظ بيه.

ممكن أقعد في البلد قد ايه بفيزا سياحة؟
دي هتعتمد على ظابط الجمارك والجوازات. فيزا السياحة لغير المهاجرين بتديك إذن تخش أمريكا من الجو أو البحر، ولما توصل ظابط الجمارك هو اللي بيحدد الفنرة اللي ممكن تقعدها في البلد والسلطة دي معاه بس بغض النظر عن المدة اللي مكتوبة في الفيزا.

محتاج فيزا لو نازل ترانزيت في أمريكا؟
لو نازل ترانزيت في أمريكا، هتحتاج فيزا ترانزيت وإجراءاتها زي الفيزا السياحية بالظبط، مغ إثبات طبعًا إنك مش هتقعد في أمريكا ومكمل لدولة تانية.

أعمل إيه لو شغال freelancer ؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

ايه اللي يحصل لو كسرت الفيزا؟
ممكن تتعرض لعواقب شديدة زي إن تأشيرتك تتلغي ومتقدرش تقدم على تأشيرة جديدة من خارج بلدك. في بعض الحالات  تتمنع من دخول أمريكا لعدد من السنين، حسب قعدت قد ايه زيادة، أو ينطبق عليك حالة إستثنائية ولا وجودك غير قانوني ودا بيفرق تحت تصنيفات القانون.

محتاج تطعيمات لو مسافر الولايات المتحدة؟
مفيش تطعيمات إجبارية مطلوبة لو مسافر الولايات المتحدة.

إيه الإجراءات المطلوبة لو عايز اسافر مع حيواني الأليف؟

هتحناج الأوراق دي عشان تسافر مع حيوانك الأليف  

  • شهادة صحية طالعة من دكتور بيطري مترخص في بلدك.
  • إثبات إن الحيوان الأليف واخد تطعيم ضد داء الكلب -السُعار- قبل وصوله أمريكا ب30 يوم (القطط الصغيرة مش لازم).

دلوقتي بما إنك مستعد تسافر إحنا عندنا شوية نصايح هتساعدك وأنت مسافر.

بعيدًا عن العملية المرهقة دي، مش صعب تاخد فيزا لأمريكا وتستكشف كل اللي نفسك فيه.

لو عندك أي معلومات زيادة عن إجراءات فيزا "الولايات المتحدة"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "أمريكا" قبل كده؟ هننبسط جدًا لو شاركتنا قصتك وصور مغامراتك!

آخر تحديث 14 أغسطس 2018