share this article

9 أديان، فوق ال100 لغة، وبليون وشوية بني آدم، ومناظر طبيعية متتعدش..دي الهند. مش هتلاقي بلد فيه كمية التنوع الغريب اللي في الهند، وهتقضي في البلد مغامرة مش هتقضي زيها في حتة تانية. هتشوف عجائب زي تاج محل والمعبد الذهبي في بنجاب، وهتزور حتت تانية كتير هتفتكرها طول حياتك. الجميل إن فيزا الهند تعتبر سهلة للمصريين.

بيانات السفارة:

العنوان
5 شارع عزيز أباظة، الزمالك، القاهرة

ساعات العمل
الأحد إلى الخميس من 9 ص إلي 5:30 م

رقم التليفون
02-0020-22736-3051

0020-22735-6053

0020-22736-0052

الفاكس
00-20-2-7364038

البريد الإلكتروني
embassy@indembcairo.com

*طلبات الفيزا مش بتتقدم في السفارة، بتتقدم في القنصلية.

بيانات القنصلية

العنوان
3 شارع أبو الفدا، الزمالك، القاهرة

ساعات العمل
الأحد إلى الخميس
تقديم الطلبات: 9 ص إلى 12 م

استلام الفيزا: 2 م إلى 3:30 م

رقم التليفون
02 2737-1993

البريد الإلكتروني
cons.cairo@mea.gov.in

لأوراق المطلوبة للفيزا السياحية

  • استمارة التقديم لازم تتملي بالكامل أونلاين (اختار فيزا عادية بعد كده كمل الخطوات)، اطبع الاستمارة وامضيها، وقدمها مع باقي المستندات.
  • صورتين ملونين، وتبقى صور باسبورت يعني جايبه الوش كله وخلفية بيضاء، وحديثة.
  • جواز سفر صالح لمدة 6 شهور ولازم يبقى فيه على الأقل صفحتين فاضيين.
  • HR Letter   من مكان شغلك ممضي وباين فيه شغال إيه ومن إمتى وآخر مُرتبات خدتها.   
  • كشف حساب بتاع أخر 6 شهور ممضي من البنك
  • نسخة من حجز طيران.

تكاليف الفيزا و المدة

فيزا سياحية: 2060 جنيه مصري

مدة الإقامة في الهند للفيزا السياحية بتبقى عادةً لمدة 3 شهور بس. والفيزا السياحية مينفعش تتمد.

تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر إنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك، هتحتاج تطلّع تصريح سفر من الجيش لكل سفرية.

 في حالات تانية ممكن تحتاج فيها تصريح سفر من الجيش لو أنت لسه في سن التجنيد.

أسئلة مهمة

الفيزا بتاخد وقت قد إيه عشان تطلع؟
بتاخد لحد 4 أيام عمل.

محتاج تصريح أمني من مجمع التحرير عشان أسافر الهند؟
لأ، مش هتحتاج تصريح أمني من مجمع التحرير للهند.

محتاج قيد عائلي عشان أسافر؟
لأ، مش مطلوب.

محتاج كشف حساب؟
آه، هتحتاج كشف حساب حديث وفيه كل العمليات اللي حصلت في أخر 6 شهور.

محتاج شهادة تحركات عشان أسافر الهند؟
لأ، مش محتاجها.

محتاج فيزا لو نازل ترانزيت في الهند؟
لو مش هتطلع من منطقة الترانزيت الدولية، مش هتحتاج فيزا ترانزيت. بس لو ناوي تسيب المطار، هتحتاج فيزا ترانزيت صالحة، ولازم يبقى معاك إثبات إنك ماشي (حجز طيارة) يتقدم مع استمارة الفيزا وصورتين.

إيه إجراءات الفيزا للأطفال؟
زي البالغين، لازم تملى استمارة منفصلة لكل طفل.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

في أي قيود تمنعني أخد الفيزا دي؟
لا مفيش.

إيه اللي هيحصل لو كسرت الفيزا؟
هتتعرض لغرامة وممكن تتمنع من دخول الهند تاني، وممكن كمان تبقى عرضة لعقاب قانوني وتتسجن.

محتاج تطعيمات لو مسافر الهند؟
مفيش تطعيمات إجبارية لو مسافر الهند، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟
عشان حيوانك الأليف يخش الهند، لازم يبقى معاه الرقاقة  ISO 11784/11785 اللي عبارة عن 15 رقم ومش متشفرة. لو الرقاقة بتاعته مش دي، ممكن تجيب معاك سكانر مخصوص للرقاقة.

لازم على الفيزا السياحية يبقى فيه رخصة استيراد من الوزارة العامة للتجارة الخارجية في الهند. ولازم أي حيوان أليف داخل الهند مع صاحبه يطلعله NO OBJECTION CERTIFICATE (NOC) من محطة الحجر الصحي في الهند، قبل ما يخش البلد.

لازم كمان الكلب أو القطة يبقى متطعم ضد مرض الكلب –السعار- في مدة ما بين 30 يوم لسنة من قبل دخول البلد. التطعيم بتاع ال3 سنين مش معترف بيه. لازم كمان الكلاب تطعم ضد Distemper, Hepatitis, Parvovirus, Leptospirosis, Parainfluenza والقطط ضد FVRCP من ضمنهم Feline Enteritis و Feline Pan Leukopenia. الكلاب لازم ميبقاش باين عليهم أي أعراض أمراض زي السعار، إلخ.

لازم في فترة متزيدش على 10 أيام قبل السفر، طبيب بيطري مرخص في بلدك يعمل شهادة صحية بتاعه الهند للحيوان، بالإنجليزي.

الحيوان لازم يوصل كجزء من حمولتك أو حمولة جوية. لازم يوصل مطار من دلهي، مومباي، بنجالور، تشيناي، حيدر أباد، أو كولكاتا. لازم يوصل خلال 30 يوم من وصول صاحبه.

مينفعش تجيب حيوان غير الكلب أو القطة.

لو عندك أي معلومات زيادة عن إجراءات فيزا "الهند"، ياريت تبعتلنا إيميل فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "الهند" قبل كده؟ هننبسط جدًا لو شاركتنا قصتك وصور مغامراتك!