share this article

لبنان بلد جميلة ومتنوعة جدًا لدرجة إنك هتحتاج تقضي وقت كتير اوي عشان تستوعب كل اللي البلد ممكن تقدمهولك. ما بين المناظر الطبيعية الجميلة والتاريخ العريق والحياة بليل هناك، لبنان عندها كتير تقدمه للمسافرين. الجميل بقى إن فيزا لبنان من مصر مش صعبة وممكن كمان تتاخد من المطار هناك، وإنه لشىء لو تعلمون عظيم.

فيزا لبنان ممكن تاخدها عن طريق سكتين، إنك تقدم من مصر وتاخدها من السفارة في القاهرة أو القنصلية في الإسكندرية، أو إنك تاخدها عند الوصول في مطار لبنان.

 

بيانات السفارة

العنوان

22 شارع منصور محمد، الزمالك، القاهرة.

ساعات العمل

الأحد-الخميس من 9 صباحًا إلى 12 مساءً لتقديم الطلبات ومن 12 مساءً ألى 3 مساء لإستلام الفيزا.

رقم التليفون

+20-2- 27382823/4/5

الفاكس

034801902

 

بيانات القنصلية

العنوان

64 شارع الحرية، الإسكندرية.

ساعات العمل

الأحد-الخميس من 9 صباحًا إلى 12 مساءً لتقديم الطلبات ومن 12 مساءً ألى 3 مساء لإستلام الفيزا.

رقم التليفون

(+20) 3 484 6589

البريد الإلكتروني

lebanon.cg.alex@gmail.com

lebconalex@hotmail.com

 

 

الأوراق المطلوبة للفيزا السياحية

عشان تاخد الفيزا السياحية من مصر قبل ما تسافر، هتحتاج  نسختين من الأوراق دي:

  • استمارة التقديم
  • جواز سفر صالح لمدة 6 شهور ونسخه منه
  • صورة حديثة مقاس باسبور
  • HR letter من مكان شغلك ممضي وباين فيه شغال ايه ومرتبك
  • لو شغال شغل حر، بطاقة ضريبية، وأوراق تأسيس الشركة
  • كشف حساب ممضي من البنك
  • حجز طيران وحجز فندق، أو دعوة من صديق لبناني وصورة من جواز سفره وعنوانه بالكامل
  • لو الخادمة مسافرة معاك، لازم تقدم تعهد إنها راجعة

الأوراق المطلوبة لفيزا عند الوصول

  • استمارة التقديم
  • جواز سفر وصورة منه
  • حجز طيران
  • حجز فندق، أو دعوة من صديق لبناني وصورة من جواز سفره وعنوانه بالكامل
  • مبلغ 2000 دولار أو شيك بقيمة المبلغ ده
  • تكاليف الفيزا
  • صورة حديثة مقاس باسبور
  • تصريح سفر أو إثبات إنك حاصل على إعفاء طبقا لموقفك من الخدمة العسكرية

 التكاليف والمدة

تأشيرة دخول مرة واحدة: 615 ج.م

تأشيرة دخول مرتين : 875 ج.م

تأشيرة دخول عدة مرات:1225 ج.م

فيزا عند الوصول: 20 دولار

تأشيرة الدخول إلى لبنان صالحة لمدة 90 يوم إبتداء من تاريخ الإصدار، لمدة 15 يوم أو شهر أو ثلاثة أشهر أو ستة أشهر ومدة الإقامة تبتدي من تاريخ الدخول إلى لبنان. أما بالنسبة للفيزا عند الوصول فصالحة لمدة شهر وممكن تتمد إلى 3 شهور.

 تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر أنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك بس في قوات الاحتياط، هتحتاج تطلّع تصريح سفر من الجيش لكل سفرية.

في حالات تانية ممكن تحتاج فيها تصريح سفر من الجيش لو أنت لسه في سن التجنيد.

 

أسئلة مهمة

الفيزا بتاخد وقت قد إيه عشان تطلع؟
وفقًا لموقع السفارة شهر.

محتاج تصريح أمني من مجمع التحرير عشان أسافر لبنان؟
على حسب، في حالات ممكن تحتاج تصريح أمني من مجمع التحرير. خصوصًا لو شغلك مش مثبت في جواز السفر.

محتاج قيد عائلي عشان أسافر لبنان؟
لأ، مش مطلوب.

محتاج كشف حساب وأنا بقدم على الفيزا؟
لا, مش لازم تجيب كشف حساب.

في أي حاجة تمنع إنك تاخد الفيزا؟
السفارة اللبنانية مش بتدي الفيزا لأي حد واخد فيزا إسرائيل.

محتاج فيزا لو نازل ترانزيت في لبنان؟
اه، لو معدي على لبنان وعندك فرصة تقعد شوية هتحتاج فيزا ترانزيت، هي ببلاش أول 48 ساعة وبحوالي 300 جنيه لحد 15 يوم.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

إيه إجراءات الفيزا للأطفال؟
هتحتاج بس توفر شهادة ميلاد للأطفال.

محتاج تطعيمات لو مسافر لبنان؟
مفيش تطعيمات إجبارية لو مسافر لبنان، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟
الحيوان الأليف ممكن يسافر معاك بس لازم يكون معاك الأوراق دي:

-الرقاقة الإلكترونية اللي تحت الجلد.
-متطعم ضد مرض الكلب –السعار-.
- شهادة صحية بيطرية من طبيب بيطري مرخص في بلدك

 

خد نفس عميق إنت خلصت كل الإجراءات، وفي رحلة جميلة مستنياك، اقرأ عن أحلى حتت تزورها في بيروت.

لو عندك أي معلومات زيادة عن إجراءات فيزا "لبنان"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "لبنان" قبل كده؟ هننبسط جدًا لو شاركتنا قصتك وصور مغامراتك!

آخر تحديث 12 أغسطس 2018