share this article

ما بين ألوان شفشاون الزرقاء والبيضاء اللي هتحسسك إنك في كارتون ملون مش بلد بجد، وجمال الدار البيضاء وشواطئها الجميلة، والرباط بناسها اللطاف، المغرب تجربة مش هتنساها وفيها أماكن هتعلم معاك طول عمرك. طب لو عايز تطلع بباسبورك المصري هتعمل إيه؟

بيانات السفارة

العنوان
10 شارع صلاح الدين، الزمالك، القاهرة

الفاكس
00 (20) 2 27 36 19 37

رقم التليفون

00(20)2  27 35 98 49/27 35 96 77/ 27 35 33 51

البريد الإلكتروني

morocemb@link.net  
ambmorocco-egypt@maec.gov.ma

خد بالك إن الطلبات مش بتتقدم في السفارة، بتتقدم في القسم القنصلي في العجوزة.

العنوان
18 شارع نوال، العجوزة

ساعات العمل
الطلبات بتتقدم من الأحد إلى الأربعاء من 9 ص إلى 12 م

*خد بالك إن القنصلية بتغير مواعيدها كتير من غير إعلانات، فيستحسن تسأل على المواعيد من بدري عشان متتأخرش

لأوراق المطلوبة للفيزا السياحية

  • استمارة التقديملازم تتملي بالكامل بالإنجليزي وتتمضي. ممكن تملاها بالعربي بس لازم الاسم والأهل ومكان الميلاد بالإنجليزي (الاستمارة دي بتاخدها من مكتب التقديم).
  • صورتين (4 x 3 cm)، وتبقى صورة باسبورت يعني جايبه الوش كله وخلفية بيضاء، وحديثة.
  • بطاقتك الشخصية
  • جواز سفر صالح لمدة 6 شهور وصورة منه - وصورة من أي فيزا خدتها قبل كده – ولازم يبقى فيه على الأقل صفحتين فاضيين.
  • HR Letter  من مكان شغلك ممضي وباين فيه شغال إيه ومن إمتى وآخر مُرتبات خدتها.
  • كشف حساب بتاع أخر 3 شهور ممضي من البنك.
  • حجز طيران مبدئي.
  • حجز فندق أو هوستيل مبدئي.
  • تأمين صحي يغطي مدة إقامتك وأي طوارىء ممكن تتعرضلها.
  • لو صاحب شغل، أوراق تسجيل الشركة، وكشف حساب الشركة أخر 6 شهور، وبطاقة ضريبية.
  • للطلبة، إثبات قيد.

*خد معاك نسخ من كل حاجة

تكاليف الفيزا و المدة

فيزا دخول مرة واحدة: 410 جنيه مصري

فيزا دخول كذا مرة: 605 جنيه مصري

الفيزا هتبقى حاجة من اتنين:

  • فيزا صلاحية قصيرة:
    الفيزا دي بتسمح للأجنبي يخش المغرب عشان أسباب غير الهجرة، لمدة معينة قصيرة (أو كذا مدة معينة قصيرة لو فيزا دخول كذا مرة). مدة الإقامة بتبقى من يوم ل90 يوم.
  • فيزا صلاحية طويلة:
    دي بتبقى أكتر من 3 شهور، وبتطلع بعد استشارة وزارة الخارجية المغربية. صلاحية الفيزا دي مبتبقاش أكتر من سنة ومدة كل إقامة من يوم ل90 يوم.

تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر  إنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك، هتحتاج تطلّع تصريح سفر من الجيش لكل سفرية.

في حالات تانية ممكن تحتاج فيها تصريح سفر من الجيش لو أنت لسه في سن التجنيد.

أسئلة مهمة

الفيزا بتاخد وقت قد إيه عشان تطلع؟
في العادي ممكن توصل لتلات أسابيع، بس بننصح تروح قبلها بشهر عشان ممكن تطول.

محتاج تصريح أمني من مجمع التحرير عشان أسافر المغرب؟
لأ، مش هتحتاج تصريح أمني من مجمع التحرير.

محتاج قيد عائلي عشان أسافر؟
لأ، مش مطلوب.

محتاج كشف حساب؟
آه، هتحتاج كشف حساب حديث وفيه كل العمليات اللي حصلت في أخر 3 شهور.

محتاج شهادة تحركات عشان أسافر المغرب؟
لأ مش محتاجها.

محتاج فيزا لو نازل ترانزيت في المغرب؟
لو مش هتسيب المطار، مش هتحتاج فيزا ترانزيت. بس لو هتسيبه، هتحتاج فيزا ترانزيت، ودي بتسمحلك لو مسافر بلد تاني ومعدي على المغرب تسيب المطار، مينفعش تقعد في كل مرة ترانزيت أكتر من 72 ساعة.

إيه إجراءات الفيزا للأطفال؟
الأطفال تحت 16 سنة مش محتاجين جواز منفصل طالما مسافرين مع واحد من الأهل أو الاتنين، ويكونوا متسجلين على جواز واحد منهم، وشهادة ميلاد الطفل هتبقى مطلوبة.

الأطفال اللي وصلوا السن القانوني أو لو مش مسافرين مع الأهل، لازم يبقى معاهم جواز سفرهم الشخصي المنفصل.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

في حاجة معينة تمنعني أخد الفيزا دي؟
لا مفيش.

إيه اللي هيحصل لو كسرت الفيزا؟
مبننصحش تعمل كده خالص، ممكن تلبس غرامة كبيرة، أو تبقى عرضة لعواقب قانونية. 

محتاج تطعيمات لو مسافر المغرب؟
مفيش تطعيمات إجبارية لو مسافر المغرب، بس مركز المكافحة والوقاية ضد الأمراض بينصح بالتطعيمات دي  من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟
ينفع تسافر مع كلب أو قطتك، لو محقق الشروط دي:

  • الرقاقة الإلكترونية اللي تحت الجلد.
  • متطعم ضد مرض الكلب –السعار- في مدة ما بين 30 يوم لسنة من قبل دخولك للبلد.
  • شهادة صحية بيطرية من طبيب بيطري مرخص في بلدك.
  • قبل أي رحلة حاول تعرف إجراءات المطارات في البلد اللي هتتحرك منها واللي هتتحرك لها (التطعيمات والحجر الصحي، إلخ.)

لو عندك أي معلومات زيادة عن إجراءات فيزا "المغرب"، ياريت تبعتلنا إيميل فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "المغرب" قبل كده؟ هننبسط جدًا لو شاركتنا قصتك وصور مغامراتك!