share this article

نيبال من أحلى الأماكن اللي ممكن تزورها في العالم، طبيعة مش هتشوف زيها كتير وشعب من أطيب الناس اللي ممكن تتعامل معاهم. الأجمل من كل ده إن فيزا نيبال من أسهل ما يكون، حاملي جواز السفر اللبناني يقدروا ياخدوا فيزا نيبال عند الوصول، بس حاول تبتدي إجراءات الفيزا قبل ما توصل عشان متقفش في طوابير كتير في المطار.

بيانات السفارة

العنوان
شارع بدارو، مبنى نديم كومير، بيروت

أرقام التليفون
00961-1-386-690

البريد الإلكتروني
jissaelkhoury@ieklaw.com | elkouryj@dm.net.lb

الإجراءات والأوراق المطلوبة للفيزا السياحية

  • املأ بطاقة وصول لما توصل
  • املأ استمارة التقديم للفيزا السياحية (تقدر تملاها أونلاين أو من الاكشاك اللي في المطار). لو مليتها من  الموقع، هتاخد وصل فيه باركود، لازم تطبعه وتروح بيه وإنت بتطلع الفيزا. الوصل ده شغال 15 يوم وبعد كده بيبقى مش صالح، لو ده حصل هتضطر تملى أبليكشن من أول وجديد.
  • ادفع في البنك تكاليف الفيزا حسب نوعها، وخد الوصل.
  • لازم يبقى معاك جواز سفر صالح لمدة 6 شهور وفيه على الأقل صفحتين فاضيين.
  • لازم يبقى معاك صورة حديثة بأبعاد (4.5 سم * 3.5 سم)، شرط تكون الخلفية بيضاء.
  • روح مكتب الهجرة والجوازات في المطار ومعاك الإستمارة اللي مليتها، ووصولات الدفع، وجوازك.

*ينفع تستعمل كذا طريقة دفع عند الكاونتر بتاع تحصيل رسوم الفيزا، بس خلي معاك كاش احتياطي.


مدة التأشيرة وتكلفة كل واحدة

  • فيزا لمدة 15 يوم: 25$
  • فيزا لمدة 30 يوم: 40$
  • فيزا لمدة 90 يوم: 100$

أسئلة مهمة

محتاج كشف حساب من البنك للتأشيرة؟
لأ، كشف الحساب مش مطلوب.

محتاج فيزا لو نازل ترانزيت في نيبال؟
مش مطلوب تأشيرة لو هتقضي الترانزيت في المطار، بس خد مخدتك معاك عشان النوم في صالة الانتظار مش هتبقى تجربة ممتعة.

لو ناوي تطلع بره المطار هتحتاج تاخد فيزا ترانزيت مقابل 5$ ومدتها يوم، بس لازم تثبت إنك ماشي بعد اليوم ده عن طريق تذكرة الطيران بتاعتك.

إيه إجراءات الفيزا للأطفال؟
مفيش اختلاف في الإجراءات، غير إن الأطفال تحت سن 10 سنين ممكن ياخدوا فيزا سياحية ببلاش.

إيه اللي هيحصل لو كسرت الفيزا؟
لو عديت المدة المكتوبة في التأشيرة بأقل من أسبوع، هتدفع غرامة 2 دولار في المطار وأنت راجع مقابل كل يوم زيادة قضيته. لو قعدت أكتر من كده، ممكن تتمنع من طلوع طيارتك وإنت راجع، لحد ما تروح مكتب الجوازات والهجرة وتحل المشكلة.

محتاج تطعيمات لو مسافر نيبال؟
مفيش تطعيمات إجبارية لو مسافر نيبال، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟

  • أي حيوان أليف محتاج "جواز سفر الحيوانات الأليفة"، واللي هو عبارة عن الحاجات دي:
  • شهادة صحية طالعة من دكتور بيطري مترخص في بلدك، مُثبت فيها أن الحيوان الأليف بتاعك سليم، ودي بتتقدم في المطار.
  • إثبات إن الحيوان الأليف واخد تطعيم ضد داء الكلب -السُعار- خلال مدة لا تقل عن شهر، ولا تزيد عن 12 شهر.
  • الحيوان الأليف لازم يكون معاه الشريحة الإلكترونية (بتبقى تحت الجلد) وتكون متوثقة في جواز السفر.
  • خلي بالك نيبال بتفرض ضريبة عالية على إدخال الحيوانات، وحاول كمان تتفادى تغيير الطيارات، أو إنك تنزل ترانزيت في الهند عشان بيمنعوا دخول الحيوانات لغير المقيمين.
  • لما تبقى مسافر دولة أجنبية زي نيبال، يُفضل يكون معاك أي أوراق تثبت ملكيتك للحيوان اللي معاك. ممكن تخش نيبال ومعاك حيوانين من غير ما تحتاج إذن استيراد.
  • الطيور، الزواحف، السمك، والقوارض، مش محتاجين تطعيمات ضد السعار، بس ممكن يحتاجوا حاجات تانية أو شهادات صحية. لازم تستفسر عن ده.

خد نفس عميق إنت خلصت كل الإجراءات المملة، وفي رحلة جميلة مستنياك.

لو عندك أي معلومات زيادة عن إجراءات فيزا "نيبال"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "نيبال" قبل كده؟ هننبسط جدًا لو شاركتنا قصتك وصور مغامراتك!