share this article

تايلاند؛ ما فيش أجمل من دي بلد لو بتحب الطبيعة. جزر وبحر وخضرة هتفصلك عن روتين الحياة وضغط الشغل. هنا جمعنا لك كل المعلومات اللي محتاجها عشان تاخد فيزا لتايلاند. 

بيانات السفارة

العنوان
فيلا 19، شارع عبد الله الكاتب، جنب مستشفى الكاتب، الدقي، الجيزة.

ساعات العمل
من الحد إلى الخميس من 9 صباحًا إلى 4:30 مساءً

التقديم على تأشيرة: من 9:30-11:30 صبحًا.
استلام التأشيرة: من 3- 4 مساءً.

 أرقام التليفون
0233367005/ 0237603554/ 0237603553

الفاكس
+(202) 3760-5076 | +(202) 3760-0137 

البريد الإلكتروني
thaiemh.cairo@gmail.com

وللإستفسارات عن الفيزا
thaiconsular.cairo@gmail.com


الأوراق المطلوبة للفيزا السياحية

  • استمارة تقديم، تملاها أونلاين وتطبعها.
  • باسبور صالح لمدة 6 شهور، ويكون فيه صفحتين على الأقل فاضيين، وصورة منه.
  • صورة جديدة مقاس 4*6، خلفية بيضا.
  • كشف حساب بنكي على معاملات 3 شهور، ما يكونش فات على تاريخ إصدار كشف الحساب شهر، ورصيدك في الحساب ما يقلش عن 10 آلاف جنيه للفرد، و30 ألف جنيه لو أسرة مسافرة.
  • نسخة من حجز طيران مبدئي ذهاب وعودة. وحجز أوتيل مبدئي.
  • الموظف محتاج خطاب من جهة عمله.
  • رجل الأعمال محتاج رخصة عمل و فيها إسمه.
  • الطالب محتاج شهادة قيد من الجامعة.
  • لو متجوز هتقدم عقد جواز. والأطفال لازم يقدموا على الفيزا بجوازاتهم الخاصة، لو قدموا على جواز سفر أهلهم مش هياخدوا الفيزا.

*كل الأوراق تكون مترجمة للإنجليزية


مدة التأشيرة وتكلفة كل واحدة

التأشيرة صالحة لمدة 3 شهور من تاريخ صدورها، بتسمح لك تقعد في البلد 60 يوم، ممكن تمدها هناك 30 يوم كمان. تكلفة التأشيرة 700 جنيه.

تصريح السفر من الجيش

لو واخد إعفاء نهائي من الجيش اطلع على المطار بقلب جامد، أهم حاجة تكون ثابت دا في الجواز.

لو في سن التجنيد –من 18 لـ30- حتي لو قضيت خدمتك برضه هتحتاج تطلّع تصريح سفر من الجيش لكل سفرية.

أسئلة مهمة

الفيزا بتاخد وقت قد إيه عشان تطلع؟
بتطلع خلال يومين عمل.

محتاج تصريح أمني من مجمع التحرير عشان أسافر تايلاند؟
تايلاند من الدول اللي بقيت مؤخرًا محتاجة تصريح أمني، بس مش في كل الحالات. احنا بننصح تروح المجمع تطلعه احتياطي ولو مش هتحتاج هيقولوا لك هناك.

محتاج قيد عائلي عشان أسافر تايلاند؟
لا مش محتاج قيد عائلي.

محتاج فيزا لو نازل ترانزيت في تايلاند؟
لو هتقعد في المطار مش محتاج، لو شايفها فرصة تشوف البلد الجميلة دي، هتحتاج فيزا.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

إيه إجراءات الفيزا للأطفال؟
الأطفال لازم يقدموا على الفيزا بجوازاتهم الخاصة، لو قدموا على جواز سفر أهلهم مش هياخدوا الفيزا.

إيه اللي هيحصل لو كسرت الفيزا؟
يفضل بلاش، القوانين هناك مش بتتفاهم في الحاجات دي، عموماً لو كسرت مدة الإقامة هتدفع غرامة عن كل يوم زيادة 500 بات، وتوصل لغايت 20,000 بات كحد أقصى، لو زودت يوم واحد ممكن تعدي. وأنت خارج هيختموا جواز السفر إنك كسرت الفيزا عشان يسجلوا دا لكن مش هتتمنع من دخول البلد، بس لو كسرت الفيزا مرة تانية هتكون العقوبة أشد.

العقوبات دي لما بيكتشفوا إنك كاسر الفيزا في المطار وأنت خارج، لكن لو إتمسكت جوا البلد هيتقبض عليك وتاخد حبس من يوم لإتنين قبل ما تترحل.

محتاج تطعيمات لو مسافر تايلاند؟
مفيش تطعيمات إجبارية لو مسافر تايلاند، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز أسافر مع حيواني الأليف؟
تقدر تسافر مع حيوانك الأليف بس محتاج الحاجات دي:

  1. جواز سفر الحيوانات الأليفة
  2. شهادة صحية صادرة عن دكتور بيطري مرخص في بلدك.
  3. تطعيم ضد داء الكلب –السعار.
  4. الشريحة الإلكترونية (بتبقى تحت الجلد) وتكون متوثقة في جواز السفر.

 

خد نفس عميق إنت خلصت كل الإجراءات المملة، وفي رحلة جميلة مستنياك.

لو عندك أي معلومات زيادة عن إجراءات فيزا "تايلاند"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "تايلاند" قبل كده؟ هننبسط جدًا لو شاركتنا قصتك وصور مغامراتك!