share this article

ناس كتير بتسافر تركيا كل سنة سواء بغرض السياحة أو الدراسة، بالتالي بيسألوا أسئلة كتير تخص الفيزا خصوصا وإن إجراءاتها فيها تفاصيل كتير، وغالبا هتلاقي نفسك اتخضيت(ي) واتلخمت لو حاولت تجمع المعلومات المطلوبة عنها من المصادر المختلفة الموجودة على الانترنت. بعض المصريين مؤهلين إنهم يقدموا على الفيزا أونلاين، والغير مؤهلين هيقدموا من خلال مكتب MZ Global  والتعامل مع المكتب مصرح من قبل الحكومة التركية للتعامل الإداري مع طلبات الفيزا. واحدة واحدة كده جمعنالك كل المعلومات والخطوات من طقطق لسلام عليكم.

(e-visa) شروط الفيزا الإلكترونية

لو عمرك  أقل من 20 أو أكتر من 45 سنة أو معاك فيزا شينجن صالحة، ممكن تاخد الفيزا الإلكترونية.

  • معاك حجز طيران، وحجز فندق، وإثبات إن معاك على الأقل 50 دولار لكل يوم هتقعده في تركيا، وده ممكن يتطلب منك في المطار.
  • تذكرة الطيران بتاعتك تكون مع واحدة من الشركات دي : مصر للطيران، الخطوط التركية، خطوط طيران بيجاسوس، أو أونور أير.
  • جواز سفر صالح لمدة 6 شهور على الأقل من تاريخ دخولك لتركيا.

مدة التأشيرة والتكلفة

دخول مرة واحدة : 20$

المدة : ستة شهور، تقعد في تركيا 30 يوم كحد أقصى.

لما الفيزا تخلص، مينفعش تقدم على واحدة تانية غير لما تسيب تركيا.

بيانات مركز تقديم الفيزا (MZ Global):

العنوان

فيلا 21 شارع محمد الغزالي من مصدق، الدقي، الجيزة.

88 شارع فؤاد، باب شرق، الإسكندرية.

ساعات العمل

الأحد-الخميس من 10 صباحًا إلى 4 مساءً.

رقم التليفون

0155 122 4206

البريد الإلكتروني

info@mzvize.com

الأوراق المطلوبة للفيزا السياحية

مش محتاج معاد عشان تروح لمركز تقديم الفيزا، بس لازم تملا استمارة التقديم أونلاين وتروح معاك الأوراق دي:

  • استمارة التقديم.
  • صورتين جداد ( 4x6 بخلفية بيضاء).
  • جواز سفر صالح لمدة 6 شهور وصورة منه - وصورة من أي فيزا خدتها قبل كده-
  • HR Letter من مكان شغلك ممضي وباين فيه شغال إيه وآخر مُرتبات خدتها.
  • كشف حساب بتاع أخر 6 شهور ممضي من البنك وميتعملش قبل معاد التقديم بأكتر من أسبوع، وفيه فلوس تغطي على الأقل 50 دولار لكل يوم هتقضيه في البلد.
  • حجز طيران وحجز فندق، وتأمين صحي يغطي مدة إقامتك. كل الحاجات دي مركز تقديم الفيزا بيقدمهم بمقابل هنكتبه تحت.

1)  لو شغال شغل حر، هتجيب إثبات بده متوثق من وزارة الخارجية وبطاقة ضريبية، وأوراق تأسيس الشركة.

2) لو عامل (نجار، طباخ، سواق،..) هتحتاج إذن شغل من وزارة القوى العاملة.

  • لو اتنين متجوزين ومسافرين مع بعض هيحتاجوا يقدموا قسيمة الجواز وصورة منها.
  • لو طالب هتحتاج تقدم إثبات قيد من الجامعة.
  • لو تحت 18 سنة ومسافر من غير أهلك هتحتاج موافقة مكتوبة منهم -أو الوصي عليك- عليها توقيعهم وتوقيعك. 

تكاليف مركز تقديم الفيزا و المدة

  • الفيزا 60 دولار
  • مركز تقديم الفيزا 30 دولار
  • التأمين الصحي 15 دولار
  • حجز الطيران والفندق 5 دولار
  • المدة : 180 يوم، لكن مينفعش تقعد في تركيا أكتر من 90 يوم.

جنب الأوراق اللي فوق دي، في شوية نقط لازم تبقى في دماغك:

  • التأمين الصحي لازم يتجاب من مركز تقديم الفيزا بس حجز الطيران والفندق مش لازم.
  • الفيزا صالحة لمدة 180 يوم بس أقصى مدة ممكن تقعدها 90 يوم.
  • المصريون مينفعش ياخدوا فيزا عند الوصول هناك، لازم من بلدك.
  • لو الفيزا اترفضت، ممكن تقدم تاني بعد 60 يوم من تاريخ الرفض.
  • فلوس الفيزا مبترجعش لو الفيزا اترفضت.
  • اللي معاه جواز سفر ديبلوماسي معفي من الفيزا لمدة 90 يوم، أكتر من كده هيحتاج فيزا.
  • لازم تقدم بنفسك على الفيزا.

تصاريح الجيش

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر إنك معفي من الخدمة.

لو أنت لسه في سن التجنيد -من 18 ل 30 سنة- حتي لو قضيت خدمتك، هتحتاج تطلّع تصريح سفر من الجيش لكل سفرية. خد بالك أن عشان تركيا من الدول اللي محتاجة تصريح أمني من مجمع التحرير، تصريح سفر الجيش بياخد أكتر من العادي، ممكن يوصل إلى 21 يوم.

 في حالات تانية ممكن تحتاج فيها تصريح سفر من الجيش لو أنت لسه في سن التجنيد.

أسئلة مهمة

الفيزا بتاخد وقت قد إيه عشان تطلع؟
الفيزا الإلكترونية بتطلع على طول، بس لو هتقدم عن طريق مركز تقديم الفيزا بتاخد عادةً أسبوع، بس ممكن تطول عن كده فالأفضل تقدم قبلها بشهر.

محتاج تصريح أمني من مجمع التحرير؟
اه، تركيا محتاجة تصريح أمني من مجمع التحرير. ولو مش مثبت شغلك في جواز السفر هتحتاج دعوة من حد في تركيا عشان تطلع الفيزا.

محتاج قيد عائلي عشان أسافر تركيا؟
لأ، مش مطلوب.

محتاج فيزا لو نازل ترانزيت في تركيا؟
لأ، مش هتحتاج فيزا طالما مش هتطلع بره المطار، بس خد مخدة ولبس مريح.

إيه إجراءات الفيزا للأطفال؟
لو قاصر تحت 20 سنة ومحقق الشروط، ممكن تاخد فيزا إلكترونية زي ما مكتوب فوق.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

إيه اللي هيحصل لو كسرت الفيزا؟
لو عديت المدة المكتوبة في التأشيرة هتدفع غرامة في المطار وأنت راجع مقابل كل يوم زيادة قضيته، وممكن كمان تتمنع من دخول تركيا لفترة حسب قعدت قد ايه بعد نهاية الفيزا-بتوصل إلي 5 سنين.

محتاج تطعيمات لو مسافر تركيا؟
مفيش تطعيمات إجبارية لو مسافر تركيا، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟
ينفع تسافر مع كلبك، قطتك، أو نوع من القوارض لو محقق الشروط دي:

-الرقاقة الإلكترونية اللي تحت الجلد.
-متطعم ضد مرض الكلب –السعار- في مدة ما بين 30 يوم لسنة من قبل دخولك تركيا.
-إختبار السعار
- شهادة صحية بيطرية من طبيب بيطري مرخص في بلدك.

لو أي حيوان تاني هتحتاج حاجات تانية.

خد نفس عميق إنت خلصت كل الإجراءات المملة، وفي رحلة جميلة مستنياك.

لو عندك أي معلومات زيادة عن إجراءات فيزا "تركيا"، ياريت تبعتلنا إيميل فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "تركيا" قبل كده؟ هننبسط جدًا لو شاركتنا قصتك وصور مغامراتك!