share this article

فيزا الإمارات ممكن أي حد يجيبهالك، مثلًا شركات الطيران زي Fly Emirate وEtihad Airways أو خطوط جوية تانية كتير، أو من شركات سياحة تحت السلم ملهاش اسم حتي، في الأخر ده إختيارك. أيًا كان هتقدم ازاي، في شوية حاجات هتحتاجها معاك، ووزارة الداخلية الإماراتية عاملة خدمة تأكد من صحة الفيزا أونلاين علشان تتأكد إن الفيزا بتاعتك دي مش مضروبة.

أنت مش هتحتاج حاجة من السفارة, بس لو إحتجت...


بيانات السفارة

العنوان

4 شارع بن سينا- متفرع من شارع شارل دي جول- الجيزة.
ساعات العمل

من 8 ص- 3م
 أرقام التليفون
0237766101/ 0237766102/ 0237766103

فاكس
0235700844
البريد الإلكتروني
CairoEMB@mofaic.gov.ae



الأوراق المطلوبة للفيزا السياحية

1-جواز سفر ساري لمدة 6 شهور
2- استمارة تقديم. (متاحة عند أي مكان أنت قدمت فيه)
3- صورة من الباسبور، صفحة المعلومات الشخصية، وتاريخ إصدار وإنتهاء الباسبور.
4- صورة شخصية 4*6، خلفية بيضاء.
5-حجز طيران مؤكد ذهاب وعودة.
6- أوراق تانية زي إثبات سفر للإمارات أوي أي مكان تاني، أوراق إثبات إستثمار بقيمة 8,000$ أو أكتر، إقرار ضريبي يثبت إن دخلك السنوي 8,000$ أو أكتر، ممكن يكون إيصالات أو كشف حساب.



مدة التأشيرة وتكلفة كل واحدة

تأشيرة السياحة دخول مرة واحدة: 30 يوم من الوصول 69$
تأشيرة السياحة (دخول متعدد): 30 يوم من أول دخول 151$
تأشيرة السياحة طويلة الأجل: 90 يوم من الوصول 165$
تأشيرة السياحة طويلة الأجل (دخول متعدد): 90 يوم من أول دخول 425$

كل أنواع الفيزا صالحة للإستخدام لمدة 60 يوم من تاريخ إصدارها. وجميع التأشيرات لا تصدر للقاصر أو الطلاب أو كبار السن –أكبر من 60 سنة- بدون مرافق. أي شركة سياحة أو طيران طلعتلك الفيزا هتاخد رسوم إضافية.

تصريح السفر من الجيش

لو واخد إعفاء نهائي من التجنيد، ومُثبت في الباسبور، مش محتاج تصريح للسفر. لو مش مثبت في الباسبورت ممكن تجدد الجواز وتثبت إنك معفي من الجيش فيه.

لو كنت في سن التجنيد (18-30)، حتى لو واخد إعفاء مؤقت لأي سبب، لازم تطلع تصريح سفر.

أسئلة مهمة

الفيزا بتاخد وقت قد إيه عشان تطلع؟
الفيزا بتاخد وقت لحد إسبوع وتبقى في إيدك، بس من تجارب ناس كتير أحياناً بتوصل  لـ 14 يوم لو مقدم عن طريق شركة سياحة أو طيران. وزارة الداخلية الإماراتية بتسمحلك تتابع طلبك على الويب سايت بتاعها.


محتاج تصريح أمني من مجمع التحرير عشان أسافر الإمارات؟
لأ، مش محتاج.

محتاج قيد عائلي عشان أسافر الإمارات؟
لأ، مش محتاج، بس لو المسافرين اتنين متجوزين هتحتاجوا قسيمة الجواز.

محتاج كشف حساب من البنك للتأشيرة؟
لا، مش هتحتاج.

محتاج فيزا لو نازل ترانزيت في الإمارات؟
لو هتقعد أكتر من 8 ساعات هتحتاج فيزا ترانزيت ودي بتكون 14 يوم من تاريخ الوصول وبتسمحلك تقعد مدة 4 أيام في الإمارات، وتكلفتها 44$ ولازم تطلعها قبل ماتروح. لكن من يونيو 2018، المسافرين هيكونوا معفيين من رسوم الدخول لمدة 48 ساعة وممكن تمد التأشيرة ل96 ساعة بس دا هيكلفك 50 درهم إماراتي. وزي أي فيزا إماراتية بتاخد إسبوع عشان تطلع.

هل ينفع أخرج وأدخل البلد من أي مطار في الإمارات؟
تقدر تدخل وتخرج بس من المطار اللي مرتبط بالشركة اللي قدمت فيها على الفيزا. لو انت مقدم عن طريق طيران الإمارات هتستخدم بس مطار دبي. لو مقدم عن طريق خطوط الإتحاد هتستخدم بس مطار أبوظبي. لو مقدم من أي حاجة تانية هتتأكد من الفيزا اللي انت مقدم عليها تقدر تسافر وأنت راجع بس من المطار اللي أنت جيت فيه.

إيه إجراءات الفيزا للأطفال؟
لو الأطفال مش معاهم مرافق، لازم موافقة ولي الأمر، لو عائلة لازم يبقى موجود ما يثبت صلة القرابة، شهادة ميلاد مثلاً. لو الطفل مسافر مع واحد بس من الأهل، وكانوا منفصلين، لازم موافقة كتابية من الطرف الثاني علشان يخرجوا من المطار.
من 15 يوليو إلى 15 سبتمبر في كل سنة الأطفال تحت سن 18 سنة (مسافرين مع الأهل) بياخدوا فيزا ببلاش.

إيه اللي هيحصل لو كسرت الفيزا؟
هتدفع غرامة 200 درهم عن أول يوم زيادة و100 درهم عن كل يوم بعد كدا، بالإضافة إلى 100 درهم كمصاريف خدمة في مكتب الهجرة أو في المطار وأنت مسافر.

لو الفيزا اترفضت ينفع أقدم إمتى تاني؟
لو بتقدم من خلال شركة طيران واترفضت، مينفعش تقدم من خلال نفس الشركة تاني.

إيه الإجراءات المطلوبة لو عايز أسافر مع حيواني الأليف؟
تقدر تسافر مع كلبك أو قطتك بس لازم يكون معاك الأوراق دي:

  1. جواز سفر الحيوانات الأليفة
  2. شهادة صحية صادرة عن دكتور بيطري مرخص في بلدك.
  3. الحيوان الأليف لابد أن يحمل شريحة إلكترونية (تحت الجلد) وتكون موثقة في جواز السفر.
  4. أخذ تطعيم ضد داء الكلب -السُعار.
  5. تحليل داء الكلب –السعار.
  6. تصريح إستيراد
  7. تطعيم ضد الطفيليات داخلي وخارجي.

حاول تفادي تغيير الطيارات، أو نزول ترانزيت في الهند لأنهم يمنعون دخول الحيوانات لغير المقيمين.

 

خد نفس عميق إنت خلصت كل الإجراءات المملة، وفي رحلة جميلة مستنياك.

لو عندك أي معلومات زيادة عن إجراءات فيزا "الإمارات"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "الإمارات" قبل كده؟ هننبسط جدًا لو شاركتنا قصتك وصور مغامراتك!

آخر تحديث 10 أغسطس 2018