share this article

المملكة المتحدة مشهورة بحاجات كتير جدًا – الشاي بتاعهم، والكورة، وحياة ليلية مسلية جدًا- ولو كل ده مش عاجبك، عندهم دافيد بيكهام كمان. مش هتتعب عشان تلاقي حاجة تعملها هناك، من المتاحف للنوادي الليلية. والجو كمان جميل، لو إنت حد بيكره الصيف زي حالاتي. الفيزا بتاعت المملكة المتحدة مش معقدة زي ما ناس كتير متخيلة، محتاجة بس شوية وقت وتخطيط.

التقديم أونلاين
عملية التقديم بتاعك بتبدأ بإنك تقدم أونلاين على فيزا لزيارة عادية.

  • إملأ الاستمارة اونلاين
  • احجز معاد مقابلة مع مركز تقديم الفيزا في مصر، اللي اسمه TLScontact.
  • ادفع فلوس الفيزا اونلاين

 بيانات مركز التقديم

العناوين

برج انفينيتى، 11B شارع الحجاز، من شارع جامعة الدول، دور الميزانين، المهندسين، الجيزة.

الدور الثالث، 2 شارع باتريس لومومبا، أمام استاد الإسكندرية، جنب بنك بلوم، مبني الديب، باب شرق، الإسكندرية.

ساعات العمل

فرع القاهرة: الأحد-الخميس من 8 صباحًا إلى 4 مساءً.
فرع الإسكندرية: أحد، ثلاثاء، أربع من 8:30 صباحًا إلى 4 مساءً.

البريد الإلكنروني

ممكن تتصل بالمركز على موقعهم.

 

الأوراق المطلوبة للفيزا السياحية

  • نسخة مطبوعة من الموافقة على ميعاد المقابلة
  • الإستمارة مطبوعة ومليانة بالكامل
  • جواز سفر صالح لمدة 6 شهور وفيه على الأقل صفحة فاضية.
  • إثبات دخل وبيان ضريبي
  • جواب من البنك يبين معاملات الحساب في أخر 6 شهور
  • HR letter من شركتك باين فيه المرتب وبقالك قد ايه شغال ومركزك ايه.
  • لو شغال حر يبقى لازم أوراق تسجيل الشركة اللي مثبت فيها اسم صاحب الشركة وتاريخ بدء المعاملات.
  • رسالة موافقة من الأهل لأي قاصر تحت 18 سنة وفيها تفاصيل مين مسافر معاك وتفاصيل إقامتك هناك وشهادة ميلادك، زائد صورة من الصفحة البيوجرافية في جواز سفر الأهل أو الوصي القانوني –اللي هي فيها توقيعهم ورقم الجواز. لو الأهل معهمش جواز سفر يبقى لازم يوفروا أي وثيقة رسمية عليها توقيعهم.
  • ممكن تضطر تعمل حجز فندق مبدئي عشان بيتطلب عنوان إقامتك هناك في استمارة التقديم.  
  • ممكن يبقى في أوراق زيادة مطلوبة في حالات خاصة، تقدر تشوفهم على موقع السفارة.



مدة وتكلفة التأشيرة

فيزا قصيرة المدة (دخول مرة واحدة أو متعددة الدخول)

  • 130$ في القاهرة
  • 190$ في الأسكندرية
  • أقصى مدة ممكن تقعدها هناك 6 شهور

تصاريح الجيش

حالة الإعفاء النهائي

لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر أنك معفي من الخدمة.

في سن التجنيد

لو أنت لسه في سن التجنيد -من 18 ل 30 سنة- حتي لو قضيت خدمتك بس في قوات الاحتياط، هتحتاج تطلّع تصريح سفر من الجيش لكل سفرية.

في حالات تانية ممكن تحتاج فيها تصريح سفر من الجيش لو أنت لسه في سن التجنيد.

أسئلة مهمة

الفيزا بتاخد وقت قد إيه عشان تطلع؟
موقع الحكومة بيقول 10 أيام، بس إحنا بننصح تعمل حسابك في كام يوم زيادة.

محتاج تصريح أمني من مجمع التحرير عشان أروح المملكة المتحدة؟
لا، مش محتاج تصريح أمني من مجمع التحرير.

محتاج فيزا لو نازل ترانزيت في المملكة المتحدة؟
لو نازل ترانزيت في المملكة المتحدة، هتحتاج فيزا ترانزيت، ولازم تقدم عليها من قبل ما تسافر. الأوراق اللي هتحتاجها هي جواز سفرك، وفيزا البلد اللي إنت رايح ليها أو تصريح إقامة، وحجز طيران يبين إنك ماشي في خلال 48 ساعة من وصولك للمملكة المتحدة. هتقدم أونلاين عادي على فيزا الترانزيت.

محتاج قيد عائلي عشان أسافر المملكة المتحدة؟
لا، مش محتاج قيد عائلي.

لازم أحجز تذكرة طيران قبل ما أقدم؟
لأ مش مطلوبة.

أعمل إيه لو شغال freelancer؟
المشكلة لو معرفتش توفر HR letter للسفارات اللي طالباها، إن بيبقى في خوف إنك تخلع وتكسر الفيزا ومترجعش، عشان كده عندك طريقتين تقدر تبين بيهم إنك راجع وتفهمهم إنك مكفي نفسك:

  • عندك إثبات إنك شغال freelancer مع شركة مثلًا، يعني تقدر تقدم كشف حساب من البنك باين فيه دفعات فلوس بتجيلك شهريًا من الشركة دي، يا كده يا تقدم العقد اللي بينك وما بينهم – لو في واحد. ممكن برضه تبقى شغال freelancer مع أفراد مش شركة ومفيش ما بينكم عقد، ساعتها هتقدم كشف حساب بدفعات الفلوس اللي بتجيلك شهريًا.
  • تقدر تقدم كشف حساب باين فيه فلوس كتير في حسابك كدليل إن عندك حاجة ترجعلها، أو تقدم بيانات بأي أصول عندك (أرض، عقارات، إلخ..) كدليل إنك ناوي ترجع.
  • ممكن تبقى عاطل ومعاك ألفين جنيه في البنك وجواز سفرك مكتوب فيه "حاصل على بكالوريوس كذا"، ساعتها هتقدم وتجرب حظك، بس ما تعشمش نفسك أوي.

إيه إجراءات الفيزا للأطفال؟
لو الطفل تحت سن 18 سنة، لازم يملأ الإستمارة ويعمل كل الإجرائات، بس كمان هيحتاج يثبت الحاجات دي:

  1. في ترتيبات معمولة لسفر والوقت اللي هيقعده في المملكة المتحدة.
  2. معه موافقة من الأهل أو الوصي القانوني بالسفر للمملكة المتحدة.
  3. قادر يدفع تكاليف إنه يرجع أو يمد الرحلة.
  4. معه فلوس تكفيه من غير مايشتغل أو يحتاج مساعدة، أو في حد من العيلة أو الأصدقاء هيكون بيتكفل بمصروفاته.
  5. لو مسافر لوحده لازم إذن مكتوب من الأهل أو الوصي القانوني، وكل معلومات وطرق التواصل معه، ولازم يقدم مايثبت إن في مكان مناسب هيقعد فيه وهو هناك وكمان :

-إسم وتاريخ ميلاد الشخص اللي هيقعد معاه
-العنوان اللي هيقعد فيه
-علاقته بالشخص اللي هيقعد معاه
-موافقة مكتوبة إن الشخص دا هيقدر ياخد باله من الطفل وهو هناك

  1. لو الطفل مسافر مع حد لازم يقول مسافر مع مين في الإستمارة. لو الشخص دا مش من أهله، لازم يوفر معلومات محددة عن الشخص دا في الإستمارة. ممكن يضيف لحد فردين راشدين في الإستمار. الفيزا هتكون صالحة بس لو واحد بس من الراشدين اللي مذكورين في الإستمارة يكون مع الطقل لما يوصل المملكة المتحدة وإلا الطفل هيتمنع من الدخول.

ايه اللي يحصل لو كسرت الفيزا؟
ممكن تقعد لحد 90 يوم بعد نهاية الفيزا، بس لازم تثبت سبب مقنع جدًا لده ومش بننصح تعمل كده.

محتاج تطعيمات لو مسافر المملكة المتحدة؟
مفيش تطعيمات إلزامية قبل ما تسافر المملكة المتحدة.

إيه الإجراءات المطلوبة لو عايز اسافر مع حيواني الأليف؟

بعيدًا عن استمارة نقديم متعبة شوية، مش صعب تاخد فيزا للمملكة المتحدة. مستني ايه؟ روح اعمل سائح واتصور جنب ساعة بيج بن.

لو عندك أي معلومات زيادة عن إجراءات فيزا "المملكة المتحدة"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "المملكة المتحدة" قبل كده؟ هننبسط جدًا لو شاركتنا قصتك وصور مغامراتك!

آخر تحديث 8 أغسطس 2018