share this article

"نيبال" من الدول اللي السفر ليها سهل جدًا للمصريين، لإنك تقدر بسهولة تاخد الفيزا في المطار لما توصل هناك، لكن طبعا هتحتاج تبقى مستوفي كل الأوراق المطلوبة واللي هنقولهالك بالتفصيل، بس عموما احنا بننصحك إنك تاخد التأشيرة من السفارة قبل ما تسافر عشان توفر على نفسك طوابير طويلة في المطار.

بيانات السفارة

العنوان
23 شارع محمد مظهر، الزمالك.

ساعات العمل
الأحد- الخميس من 10 صباحًا إلى 2 مساءً.

أرقام التليفون
0020227369482
0020227369483

البريد الإلكتروني
eoncairo@mofa.gov.np
eg.nepalembassy@gmail.com

 

الأوراق المطلوبة للفيزا السياحية

  • استمارة التقديم تملاها أونلاين وتطبعها وتمضيها قبل ما تقدمها في السفارة.
  • جواز سفر صالح لمدة 6 شهور وفيه على الأقل صفحتين فاضيين.
  • صورة حديثة بأبعاد (4.5 سم * 3.5 سم)، شرط تكون الخلفية بيضاء؛ هتروح للراجل بتاع كوداك تطلب صورة للفيزا بالأبعاد دي وهو هيتصرف.


مدة التأشيرة وتكلفة كل واحدة

  • فيزا لمدة 15 يوم: 25$
  • فيزا لمدة 30 يوم: 40$
  • فيزا لمدة 90 يوم: 100$

تصريح السفر من الجيش

-لو واخد إعفاء نهائي من الجيش مش هتحتاج تصريح سفر، بس المفروض تثبت في جواز السفر أنك معفي من الخدمة.

-لو أنت لسه في سن التجنيد -من 18 ل 30 سنة- حتي لو قضيت خدمتك برضه هتحتاج تطلّع تصريح سفر من الجيش لكل سفرية.

أسئلة مهمة

الفيزا بتاخد وقت قد إيه عشان تطلع؟
الطلبات بيتوافق عليها في خلال يوم عمل.

محتاج تصريح أمني من مجمع التحرير عشان أسافر نيبال؟
لأ، نيبال مش بتطلب تصريح أمني.

محتاج قيد عائلي عشان أسافر نيبال؟
لأ، مش مطلوب.

محتاج كشف حساب من البنك للتأشيرة؟
لأ، كشف الحساب مش مطلوب.

محتاج فيزا لو نازل ترانزيت في نيبال؟
مش مطلوب تأشيرة لو هتقضي الترانزيت في المطار، بس خد مخدتك معاك عشان النوم في صالة الانتظار مش هتبقى تجربة ممتعة.

لو ناوي تطلع بره المطار هتحتاج تاخد فيزا ترانزيت مقابل 5$ ومدتها يوم، بس لازم تثبت إنك ماشي بعد اليوم ده عن طريق تذكرة الطيران بتاعتك.

إيه إجراءات الفيزا للأطفال؟
مفيش اختلاف في الإجراءات، غير إن الأطفال تحت سن 10 سنين ممكن ياخدوا فيزا سياحية ببلاش.

إيه اللي هيحصل لو كسرت الفيزا؟
لو عديت المدة المكتوبة في التأشيرة هتدفع غرامة في المطار وأنت راجع مقابل كل يوم زيادة قضيته.

محتاج تطعيمات لو مسافر نيبال؟
مفيش تطعيمات إجبارية لو مسافر نيبال، بس مركز المكافحة والوقاية ضد الأمراض بينصح بالتطعيمات دي من باب الوقاية. بصفة عامة يُفضل اتباع قواعد النظافة العامة - تغسل ايدك كويس قبل الأكل، وتاكل الحاجات الطازة، وماتشربش من الحنفية، اشرب مياه معدنية أفضل، إلخ.

إيه الإجراءات المطلوبة لو عايز اسافر مع حيواني الأليف؟

  • أي حيوان أليف محتاج "جواز سفر الحيوانات الأليفة"، واللي هو عبارة عن الحاجات دي:
  • شهادة صحية طالعة من دكتور بيطري مترخص في بلدك، مُثبت فيها أن الحيوان الأليف بتاعك سليم، ودي بتتقدم في المطار.
  • إثبات إن الحيوان الأليف واخد تطعيم ضد داء الكلب -السُعار- خلال مدة لا تقل عن شهر، ولا تزيد عن 12 شهر.
  • الحيوان الأليف لازم يكون معاه الشريحة الإلكترونية (بتبقى تحت الجلد) وتكون متوثقة في جواز السفر.
  • خلي بالك نيبال بتفرض ضريبة عالية على إدخال الحيوانات، وحاول كمان تتفادى تغيير الطيارات، أو إنك تنزل ترانزيت في الهند عشان بيمنعوا دخول الحيوانات لغير المقيمين.

خد نفس عميق إنت خلصت كل الإجراءات المملة، وفي رحلة جميلة مستنياك.

لو عندك أي معلومات زيادة عن إجراءات فيزا "نيبال"، ياريت تبعتلنا إيميل، فيه كل اقتراحاتك. احنا بنحاول طول الوقت نحدث بياناتنا من خلال السفارات والمؤسسات الحكومية، وتجاربنا الشخصية.

رحت "نيبال" قبل كده؟ هننبسط جدًا لو شاركتنا قصتك وصور مغامراتك!

آخر تحديث 27 أغسطس 2018