share this article

لو أنت مسافر المانيا سياحة أو شغل، فدي شويه حاجات لازم تخلي بالك منها، علشان هتنفعك وتسهل عليك الدنيا وانت مسافر. هتكلم بالتحديد علي برلين العاصمة علشان دي من أهم الأماكن في ألمانيا وكمان تاني أكبر مدينة في المساحة في أوروبا بعد لندن، فقيسوا عليها بقية مدن ألمانيا. وكمان برلين تعتبر أرخص عاصمة أوروبية، وفيها جنسيات كتيرة وثقافات وأنشطة مختلفة..فهتعيشوا فيها.
ألمانيا دلوقتي فاتحه باباها للأجانب علشان يشتغلوا فيها، لإن في المستقبل القريب ألمان كتير هيتحالوعلي المعاش، وفوق كده هم مش بيخلفوا كتير فمحتاجين ناس كفائات يسدوا الفجوة دي.
دي شوية نصايح وTips علشان تعرف الدماغ والثقافة الألمانية وتقدر تتفسح كويس.

1-الطيران:
في منه الغالي من القاهره عن طريق شركتي مصر للطيران ولوفتهانزا، وفيه منه الرخيص اللي مش هيقطم وسطك اللي هو Easy Jet، وده بيطلع من الغردقة لبرلين مباشرة، وده طيران منخفض التكاليف وبيبدأ من حاجة وتلاتين يورو. في ناس بتفتي وتقول انها مش مسموحه للمصريين، هقولك ده كدب علشان أنا طلعت عليها بباسبوري المصري من غير ما حد يقولي تلت التلاتة كام.الناس عندهم خلط بين الطيران الشارتر والطيران المجدول، طاب إيه الفرق بين الإتنين؟ هقولك: الطيران الشارتر ده بتبقي شركة سياحة مأجره طيارة من شركة طيران، وبتنزل السعر فيها علشان هي بتعمل باكدج للأجانب علشان يجوا مصر، وده ممنوع علي المصريين علشان كده هيملوا الطياره ومش هيسيبوا فرصة للأجانب إنها تيجي. بس easy jet  ديه محدش بيأجر طيارتها وهي شركة رخيصة وهتلاقوا كل الخطوط علي الويب سايت بتاعهاتصوير بيشوي فايز
شويه نصايح وانت بتحجز أي طياره:
1 - احجز قبلها بفتره علشان تبقي أرخص، يعني في رينج 81 يوم قبل معاد السفر
2 - لما تيجي تدور علي الطيران المناسب لك خلي ال browser يبقي private! طب ليه؟ علشان تديك سعر التذكره الحقيقي بس، لو معملتش كده كل شويه هتلاقيها بتعلى علشان الويب سايت بيرمي عندك cookies، والشركة بتعرف أنك عاوز تحجز التذكره دي، فبتقعد تعليها عليك علشان تجبرك تحجزها بسرعة. عموما استخدم الاستراتيجية دي لما تحجز أي تذكرة طيران.

2- المواصلات:
أولا المواصلات جوه المدينة في كذا حاجة:

1 - U-bahn وده بيمشي تحت الأرض (Underground)
2 - S-bahn وده بيمشي فوق الأرض (Overground)
3 - الترام
4 - الأتوبيسات

تصوير بيشوي فايز
ودول كلهم خطوطهم كتير أوي، وبيغطوا كل برلين، فعلشان تروح من مكان لمكان فممكن تغير المترو مرتين أو تلاته فعلشان متتلغبطش، نزل الأبلكيشين ديه: DB Navigator من على أندرويد جوجل بلاي، أو من على آيفون ستور، بتختار المكا اللي أنت فيه، وعاوز تروح فين، وهي بتقولك تركب كام وبيروح فين وهتبدل فين وهياخد وقت قد أيه، وكمان تمن التذكره وهتوصل كام بالظبط. والحلو اللي فيها لو في أي اصلاحات ولاغيين محطات فهي بتعرفك، ومش بس كده دي كمان بتقولك البديل بتاعها.

شوية Tricks وأنت بتركب:تصوير بيشوي فايز
1- مفيش شبابيك تذاكر، كله مكن اللي بتشتري منه (صورة 1)
2- خلي بالك وانت بتشتري التذكره، تختار التذكره اللي بتغطي الزون اللي أنت رايحها علشان في تلاته زون في برلين A-B-C (صورة 2)
3- في تذكره لليوم تركب بيها المترو والأتوبيس والترام ودي ب 7 يورو وتعتبر أحسن حل، كمان فيه تذكره لمده أسبوع ب 30 يورو ودي موفره جدا.
4- مفيش بوابات تذاكر علشان تدخل المحطة فهي سداح مداح كده، ثقه بقي نعمل أيه.
5- بعد ما تشتري التذكره لازم تختمها من المحطة اللي أنت هتركب منها. (صورة 3)
6- باب المترو مش بيفتح لوحده حتي لو أستنيت للصبح لازم تدوس علي الزرار او تلف الأوكره اللي موجوده في كل باب (صورة 4 - 5)
7- المفتشين بيطلعوا كتير لو معكش تذكره أو مختمتهاش أو مش مغطية الزون للأسف هتدفع غرامة وبتبقي 60 يورو.

تصوير بيشوي فايز
ولو أنت مقيم في ألمانيا تقدر تقدر تأجر عجل من كذا شركة. المميز في العجل ده أنك تقدر تاخده من أي مكان موجود في الشارع وتحطها في أي مكان في الشارع، بتنزل الابلكيشن وتعمل سكان للعجلة وتركبها، وتكلفتها في المتوسط 15 يورو في الشهر.

ثانيا المواصلات بين مدن ألمانيا:

1-Flixbus 
ده أتوبيس بيلف مدن أوروبا بأسعار رخيصة جدا بتبدأ من 5 يورو وفي ألمانيا نضيف جدا ومميز وكراسية مريحه وفيه wifi وحمام.تصوير بيشوي فايز
2-القطار: طبعا ده أغلي من الأتوبيس بيبقي سريع وكمان فيه نت وفي قطارات نوم لو حابب تسافر وانت نايم.

3- الأقامة:

1 - لو أنت قاعد فترة طويلة فمن الافضل تأجر شقة أو أوضة في شقة (ده طبيعي في أوروبا والكل بيعمل كده وبيحترم خصوصيات الأخرين) متوسط تأجير أوضة في شقة من 250 الي 400 يورو في الشهر. بتعرف عن الشقق ديه عن طريق مواقع زي Only Apartments أو عن طريق الإعلانات في الشوارع، وبتتصل بالناس اللي معاك في الشقة وبيعملولك أنترفيو ولو بيشفوك مناسب بيقبلوك.
2 - طبعا في فنادق كتير تقدر تشوف اللي يناسبك من حيث قربه من وسط البلد أو سعره عن طريق Booking.com
3 - أو لو عايزتشوف حاجة أرخص فتقعد في هوستيل، وده بيبقي كذا حد في نفس الأوضة وكل واحد ليه السرير بتاعه، واللوكر بتاعه، وبيبقي أمان جدا علشان كل الناس اللي فيه بيبقوا نفس دماغك، وبتتعرف علي ناس كتيرة وجنسيات مختلفة، تقدر تحجز السرير بتاعك من Hostelworld.com
4 - أو تأجر أوضه في شقة لفترة صغيرة، عن طريق موقع Airbnb.com وده بيبقي رخيص وميزة كمان أنك بتقعد مع ناس من أهل البلد فهيحكولك عن البلد.

4-الأكل:
ألمانيا من الدول اللي فيها الأكل الحلال متوفر جدا علشان الأتراك والسوريين موجودين في كل حته فيها، فما تقلقش مش هتجوع فيها

محلات الأكل التركي:

تصوير بيشوي فايز
بعد الحرب العالمية التانية، أستقطبت ألمانيا كتير من الاتراك علشان يبنوا البلد بعد الدمار فاستقروا فيها، وكونوا كذا جيل لدرجة أن برلين تاني مدينة بعد أسطنبول فيها أتراك! وعلشان كده هتلاقي محلات أتراك كتير في كل حته، وعندهم حاجة زي الشاورما وبيتعمل منها دونر، دوروم وبيبقي تمن الساندوتش الواحد من 3 الي 4 يورو. وكمان عندهم بيتزا تركي طعمها حلو اوي.
محلات الأكل السوري:
دلوقتي في سوريين كتير أوي في ألمانيا، وطبعا أنتو عارفين قد إيه هما شاطرين في الأكل، ووجبه الشاورما الكومبو بتبقي في حدور الـ 5 يورو.

طبعا في بعض المطاعم الألماني بيبقي فيها أكل حلال وبيبقي معاهم شهاده بده، لكن من ناحية تانية من أشهر الحاجات في ألمانيا هو العيش، عندهم مئات الأنواع من العيش اللي بالمكسرات، وانواع مختلفه من البقوليات واللي بالياميش، وحاجات متنوعة كتير، فأرشحلكم بقوة تجربوا الأنواع دي.

5- اشتري إيه منين:
كلنا بنحب الشوبينج وبنحب نجيب حاجات من أوروبا، علشان الديزاين بتاعها مختلف وكمان سعرها أرخص، فكل الماركات العالمية موجوده والمختلف كمان في أوربا إن عندهم تخفيضات بجد وحقيقية، تخفيضات الشتاء في يناير وتخفيضات الصيف في يوليو، بس كمان في كام محل أسعارهم رخيصة طول السنة زي:

Primark

ده محل ملابس أصله إنجليزي، وبقاله تلات سنين عمال ينتشر في أوروبا بسرعة الصاروخ، وأسعاره خرافيه، موجود في ميدان ألكسيندر.

DM
تصوير بيشوي فايز
ده بقي محل ألماني، وهو متخصص بالصحة والعناية بالبشرة، هتلاقوا فيه كل الكريمات وأدوات الحمام بجوده عالية جدا وبأسعار رخيصة جدا.

Euro Shopتصوير بيشوي فايز
محل للحاجات الصغيره ولوازم البيت والمكتب، وعنده كل حاجة بـ 1 يورو، عامل زي باتنين ونص وآخر العنقود كده، منتشر جدا وعنده حاجات لقطة.

6- إشارة المرور والطرق السريعة:تصوير بيشوي فايز
طبعا الألمان بيحترموا الإشارة جدا ومحدش بيكسرها ولو كسرتها الغرامة حراقة شوية.. في الشوارع الجانبية خلي بالكم الأشارة الخضرا مفتوحة علي طول للعربيات بس لو عاوز تعدي الشارع لازم تلمس الجهاز اللي علي عامود الأشارة علشان تقفل الاشارة وتقدر تعدي وطبعا عاملين كده علشان يوفروا في الوقت ، والعربيات متقفش علي الفاضي.ألمانيا هي الدولة الوحيده في أوروبا اللي الطرق السريعة اللي فيها غير محدده السرعة يعني هتلاقي العربيات معدية ال 200 وبتعيش.

7- تروح فين في برلين:

قصر شارلوتنبورغ:تصوير بيشوي فايز
هو القصر الملكي، وتم بناءه في نهاية القرن السابع عشر، والجميل اللي فيه أنه قصر رائع الجمال من جوه، وبيتميز بالصالات الواسعه اللي ليها أسقف مرسومه، وكمان فيه جنانين جميلة وبحيرة، وفيه تمثال أعلي القصر بيلف مع الرياح. بيعتبر رمز لروعه القصور التي تم بناءها في العصور الوسطي.

بوابة براندنبورغ:تصوير بيشوي فايز
من أشهر معالم برلين، وكمان مطبوعة عليه بعض الطوابع والعملات، اتسمت كده نسبة لولاية براندنبورغ التي تتبع ليها، واتبنت في القرن الثامن عشر. وكانت البوابة الفاصلة بين ألمانيا الشرقية والغربية في برلين.

عمود النصر:تصوير بيشوي فايز
اتبنى في القرن الثامن عشر وطوله 69 متر، علشان يكون رمز للانتصارات اللي حققتها ألمانيا في حروبها علي فرنسا والدنمارك والنمسا، وكمان تقدر تطلع فوق يا إما سلالم أو أسانسير، علشان تتفرج علي برلين من فوق.

برج برلين:تصوير بيشوي فايز
ده برج التليفزيون، بس تقدر تطلع فوق للبانوراما وتستمتع بمنظر برلين كلها من فوق، وكمان فيه فوق مطعم دوار بيلف 360 درجة. طولة 368 متر ويتكون من 147 دور، وبكده يعتبر أطول برج في ألمانيا، وتاني أول برج في الاتحاد الاوروبي.

جزيرة المتاحف:تصوير بيشوي فايز
دي منطقة في وسط البلد، اسمها جزيره المتاحف علشان فيهم 5 متاحف (متحف بيرغامونمتحف بودهالمعرض الوطني للتراثالمتحف القديم (متحف ألتيس)متحف برلين الجديد ) بس أهمهم متحف بيرغامون، علشان بيضم أثار وفنون وتراث وتاريخ من كل أنحاء العالم، وكمان متحف برلين الجديد مهم أوي لينا علشان فيه رأس نفرتيتي.

حديقة الحيوان ببرلين:تصوير بيشوي فايز
مناسبة جدا للأطفال والعائلات، وهي أقدم واحده في ألمانيا والتاسعة في العالم، اتبنت سنه 1844 علي إيد الملك فريدريك وليام التالت، بسبب شغفه الكبير بالحيوانات الغريبة. فيها أكتر من 17 ألف نوع مختلف من الحيوانات، ده غير أن فيها حديقة للأسماك وفيها حوض مائي ضخم.

- حديقة وغابة تيرغارتن:تصوير بيشوي فايز
موجوده في قلب برلين وهي رئة برلين، التي بتتنفس بيها، دي ابتدوا فيها سنة 1527، وتعتبر مناسبة جدا للتنزه والتمشية وكمان للعب، لما بتمشي فيها كأنك دخلت غابة من غابات الأمازون.

معرض الجانب الشرقي لجدار برلين:تصوير بيشوي فايز
ده جدار برلين اللي كان بيفصل بين ألمانيا الشرقية والغربية، ولسه الألمان سايبين حته منه لإحياء ذكراه، الميزه اللي فيه أن الحكومة الألمانية سابت الفنانين يرسموا عليه جرافيتي ويعبروا عن فنهم عليه، وبذلك يعتبر معرض فني كبير في الهواء الطلق.

برلنير دوم:

تصوير بيشوي فايز
هي كنيسة بروستانتية بتقع في وسط جزيرة المتاحف، اتبنت في الوقت ما بين 1895 و1905، لكنها تضررت بعد الحرب العالمية، واترممت عشان تاخد شكلها الحالي. هي كنيسة ضخمة ومميزه بلونها الأخضر.