share this article

"اللي سمع مش زي اللي شاف" ده أكثر مثل ممكن ينطبق على الصين. من بداية تخطيطي للسفر وفي حاجات كتير متناقضة بسمع عنها، من أول الفيزا وازاي تطلعها، والقرود والكلاب اللي الصينيين بياكلوهم، وإنك مش هتعرف تتواصل معاهم علشان اللغة. بس كل ده حاجة ووقت الجد حمادة تاني خالص، علشان كده قررت انقلكم تجربتي في السفر للصين، البلد اللي هتلاقي فيها كل حاجة في الدنيا، وهتستغرب ازاي حولوا المشكلة السكانية بتاعتهم، علشان يبقوا ثاني أقوى بلد في العالم.

امتى تسافر الصين
الصين في الشتاء برد جدا وتلج، في الصيف حر جدا ورطوبة، علشان كده أفضل وقت لزيارة الصين في الربيع أو الخريف، الجو بيكون كويس وتقدر تتبسط في السفرية، علشان كده بنرشحلك تسافر بين شهر مارس لمايو أو من نهاية أغسطس لأكتوبر، أنا سافرت في شهر سبتمبر ومدة السفرية كانت 15 يوم.

تذكرة الطيران
الطيران من مصر للصين تعتبر مشكلة كبيرة، لأن المسافة كبيرة جدا، وعدد ساعات السفر كبير، شركات الطيران المباشرة من مصر للصين هما مصر للطيران، وطيران الصين. وبيروحوا من مطار القاهرة لجوانزوا في الجنوب، أو بكين اللي هي العاصمة، مدة الرحلة ذهاب 9 ساعات، وعودة 11 ساعة، والأسعار بين 600 - 900 دولار.
ممكن تسافر برضه في رحلات مش مباشرة - فيها ترانزيت - وده في اختيارات كتير في شركات الطيران والمطارات، والأسعار أقل نسبيا، أنا سافرت من مصر للإمارات على فلاي دبي ومن الإمارات لبكين على طيران الإمارات، اللي يعتبر أفضل طيران سافرت عليه وارشحها جدا في السفر خصوصا المسافات الطويلة. اللفه دي وفرت لي حوالي 200 دولار بس ساعات الطيران زادت لـ 15 ساعة، وأنا راجع خليت الترانزيت يومين قدرت أزور فيهم الإمارات.   

فيزا الصين
تأشيرة الصين تعتبر سهلة جدا وتقدر تطلعها في حدود 900 جنيه من شركات السياحة المعتمدة من سفارة الصين، ودول تقدر تشوفهم على موقع السفارة، بيحتاجوا كشف حساب بنكي، وحجز طيران مبدأي، وصورتين خلفية بيضاء، الموضوع بياخد 4 أيام عمل، في بعض شركات الطيران بتطلعها من غير ورق في حدود 1500 جنيه.

  

الإقامة
أغلب السفريات بتاعتي بعتمد فيها على موقع Couchsurfing، اللي بيقوم على فكرة إن حد من أهل البلد يستضيفك كنوع من أنواع التبادل الثقافي بدون مقابل، وده بيخليك تقدر تتعرف على ثقافات أي بلد تسافر لها، وتقدر تقرأ كل حاجة عن الموقع من المقال ده، أما الإقامة في أوتيل أو هوستيل سهلة جدا والاختيارات كتيرة، وفي منها كل المستويات، تقدر تلاقي كل ده على Booking.com أو ممكن تحجز غرفة في بيت على موقع Airbnb.

الأكلات 

الأكل يعتبر مشكلة كبيرة في الصين نظرا لاختلاف الثقافة الكبير بين الشرق الأوسط والصين، وفي ناس كتير بتقع في المشكلة دي وأنا كنت واحد منهم. اللي قدرت أعمله أول يومين إني أكلت سندوتشات سمك، بس بعد كده قدرت اكتشف كل الأكلات اللي ممكن ناكلها هناك ونكون مبسوطين وهتلاقيها في المقال ده، وبرضه في المقال ده تقدر تلاقي كل الأبليكشنز اللي هتدلك على المطاعم الحلال القريبة منك.

أول يوم في الصين "بيفكر بالصيني"
من أول ما توصل الصين صدام الحضارات هيبدأ يقابلك خصوصا لما تعرف أن تقريبا مفيش حد بيتكلم انجليزي، بس كل حاجة ماشية بنظام وهتلاقي نفسك بتوصل بسهولة. بعد ما وصلت المطار وكان بالليل، رحت خلصت إجراءات الدخول وختمت الباسبور بعدها غيرت مبلغ صغير من جوه المطار علشان أقدر أوصل للبلد، مطار بكين كبير جدا والانتقال من صالة الوصول لباب الخروج محتاج تاخد القطار الداخلي، وبعدها كان في محطة أتوبيس من المطار بتوصل تقريبا لكل حتة في الصين.
الولد اللي كان مستضيفني بعت لي كل التفاصيل من وقت الوصول لحد بيته وأسماء المحطات بالصيني وهتدفع كام وتقريبا كل حاجة، وبصراحة ده كان مسهل عليا جدا وقدرت أوصله من غير ما حتى أكلمه في الموبايل. وصلت بالليل ومكنتش نمت في الطيارة علشان أقدر أتغلب على الإرهاق بسبب فرق التوقيت، وبالتالي بعد ما نمت، تاني يوم الدنيا ظبطت.

الأنشطة
الصين فيها حاجات كتير جدا تتعمل وبلد كبيرة بشكل مش هتتخيله، محتاجه سنين علشان تقدر تزورها كلها، علشان كده لازم تكون مخطط كويس وعارف هتزور وهتعمل إيه هناك، ولازم تكون محدد المدن اللي هتزورها وعامل خطة مبدئية.

وقت الليل
في الصين يومهم بيدأ من 6 الصبح وتقريبا على الساعة 7 مساءً بيكون يومهم خلص، في حدود 8 كده كل حاجة بتقفل وبالتالي اختيارات الخروجات مش بتبقى كتيرة، بس بيكون في بعض الأماكن اللي ممكن تسهر فيها وبيكون في مواصلات عامة بتعدي تقريبا كل ساعة، ده غير التاكسيات، وطبعا لازم تحضر العرض المسرحي بتاع الأوبرا اللي بيتعمل في أماكن كتيرة.

مصدر الصورة: hollywoodreporter

بكين

بكين عاصمة الصين وتعتبر مدينة كبيرة جدا والحاجات اللي تقدر تزورها كتير، أهمها:

سور الصين العظيم مصدر الصورة: flickr

واحد من عجايب الدنيا السبع وأشهر حاجة تقريبا في معالم الصين، هو موجود في شمال بكين وبتحتاج حوالي ساعة علشان تقدر توصله، في منطقتين لزيارة السور بس أفضلهم منطقة Mutianyu لأنها مجهزة وفيها تلفريك.
السور طوله حوالي ٨٨٠٠ كم يعني تقريبا كأنك أخذت المسافة من الأسكندرية لأسوان 7 مرات.
علشان توصل لقمة السور في طريقتين، عن طريق المشي ودي معاك ربنا فيها لأنها بتحتاج وقت طويل أو عن طريق ركوب التلفريك اللي هتشوف منها أحلى مناظر للسور العظيم واللون الأخضر بيحاوطه من كل ناحية.
وأنت نازل بقي بتبقي متعة تانية خالص لانك بتنزل على زحلقة مسار مايل كده بياخذك من البرج الشمالي لحد الوادي اللي ركبت منه التلفريك.
بعد ما تنزل لازم تزور متحف السور وهو متحف صغير بيرسم تاريخ السور في لمحات سريعة وكمان شكله لطيف جدا لأنه بيستمد شكله من تصميم الصور الأصلي.
سعر تذكرة السور 45 يوان بس لما تضيف التلفريك والزحلقة بيوصل حوالي 140 يوان.


المدينة المحرمة
المدينة المحرمة في بكين عبارة عن قصر تاريخي في المدينة وده كان بمثابة قصر لإمبراطور الصين، المدينة المحرمة موجودة في وسط بكين وسهل توصلها جدا بالمترو أو الباصات وسعر التذكرة 60 يوان.

برج الطبول والجرس 

برج الطبل والجرس في بكين عبارة عن برجين قصاد بعد، بينهم ممر وساحة كبيرة بتكون تقريبا كاشفة المنطقة اللي حواليك كلها، بيتكلموا عن أستخدام الطبول والجرس كأشياء مقدسة وقت الإمبراطور، سعر التذكرة 10 يوان للبرج الواحد ولو أخدت 2 مره واحدة بتكون بـ 15 يوان.

معبد السماء 

معبد السماء في بكين تصميمه جميل جدا و هتنبهر بيه، وتقريبا أكتر حاجة بترسم جزء من حضارة الصينيين، المعبد عبارة عن مجمع إمبراطوري بيضم مباني دينية كتير، وسعر التذكرة 10 يوان.

حديقة بيهاي
حديقة بيهاي عبارة عن حديقة عامة وكانت حديقة الامبراطور زمان، الوصول ليها سهل وهي في الجزء الشمالي الغربي من بكين، الحديقة فيها قصر وجزيرة في النص وتقدر تاخد زي مركب كده وتزورها، هتقضي فيها وقت طويل ولطيف جدا، سعر التذكرة 10 يوان.

حديقة حيوانات بكينمصدر الصورة: flickr 

الحديقة هتتبسط بيها جدا علشان هتشوف فيها أول باندا في حياتك وهما كائنات جميلة، هتقف قدامهم مش أقل من ساعتين بتتفرج عليهم وهما بيتحركوا وبياكلوا، الحاجة الثانية هتشوف بطاريق كمان، الحديقة تصميمها حلو أوي ومتقسمة ومنظمة جدا وممكن تاخد يوم في الزيارة، سعر التذكرة ١٥ يوان.

القصر الصيفي
القصر قريب من حديقة بيهاي وتقدر تزورهم في نفس اليوم، هو مميز لأنه يعتبر أكبر قصر في الصين كلها، وسعر التذكرة 15 يوان.

ملعب بكين
الملعب كان معمول علشان يستضيف الألعاب الأولمبية واتعمل على شكل عش عصافير وتصميمه حلو أوي وننصحك تزوره بالليل علشان بيكون فيه عروض بالضوء على المباني وفيه ساحة كبيرة جدا.

تيانجينمصدر الصورة: Maxxelli Blog 

المدينة تعتبر أكبر مركز تجاري وصناعي وثقافي قريب من بكين، هي بالضبط على مسافة 24 دقيقة بالقطار الطلقة اللي بياخد مسافة 250 كم -يعني تقريبا من القاهرة للإسكندرية- في 24 دقيقة، متعة ركوب القطار لوحده أصلا شئ مبهر.

القطار الطلقة
أول لما قررت أخرج بره العاصمة شفت أقرب مدينة ليا وتكون فعلا تستاهل الزيارة وكانت تيانجين، روحتها بالقطار الطلقة، بعد ما حجزت تذكرة القطار واللي تعتبر غالية نسبيا وقريبة من أسعار الطيران بس المسافات في الصين مكوكية والقطارات العادية ممكن توصل لـ40 ساعة ويمكن أكثر، هما تقريبا بيتعاملوا مع القطار كأنه طيارة، في مضيفة والأبواب بتتفتح وتتقفل بنفس الطريقة وحتى تقسيمه الكراسي هي هي، وقت ما تركب وتبدأ تشوف السرعة في الشاشة اللي قدامك عمالة بتزيد واحدة واحدة لحد لما شفت 450 كم في الساعة وكوباية المياه اللي قدامي حتى مش بتتهز، الموضوع فعلا مبهر ويستحق التجربة.


عين تيانجين
مصدر الصورة: mycafecanvas

عين تيانجين معمولة علشان تكون شبة عين لندن، هي عجلة ضخمة جدا متثبت فيها كبسولات بتخليك تقريبا تشوف المدينة كلها، اللفة بتاخد حوالي ساعة، إحساس الطيران لوحده عظيم وأحلى لقطة لما بتكون في أعلى نقطة، سعر تذكرتها 60 يوان.

بيت الصيني مصدر الصورة: mycafecanvas

بيت الصيني (Porcelain House) كان بيت واحد من أغنياء الصين وكل جزء فيه متغطي بالبورسلين وأتحول لمتحف بعد ما سابه، المبهر في المبنى إنه بيضم تقريبا كل الصين في تصميمة اللي فعلا مبهر، سعر تذكرته 50 يوان.

الشارع الثقافي القديم
الشارع أتحول مؤخرا لشارع تجاري بس يعتبر أهم شارع في وسط المدينة وتقريبا فيه كل حاجة ما بين المطاعم والمولات والسينمات، الشارع بالكامل بين الأبراج وفي نهايته في قصر تيانهو.

معبد كونفوشيوس
طبعا كلنا نسمع عن الفيلسوف كونفوشيوس ومقولاته المشهورة لحد النهارده، بس اللي مكنتش اعرفه قبل ما أروح الصين إن له ديانة ومعتقدات، المعبد لطيف وتصميمه حلو بيتكلم عن تاريخ الديانة وكونفوشيوس نفسه، سعر التذكرة 30 يوان.

الشوبينجمصدر الصورة: justgola

الشوبينج بصراحة كان في بكين، فيها أكتر من سوق تجاري والمميز عندهم أن كل سوق متخصص في حاجة، بس عندهم مول ضخم اسمه بيرل ماركت pearl market، ده مول ٤ أدوار محتاج علشان تخلصه تقريبا 7 أيام واللي حرفيا فيه كل حاجة من الإبرة للصاروخ. ملحوظة مهمة، التسوق هناك في الصين يعتبر معقول ومقارنة بمناطق ثانية يعتبر رخيص، كل حاجة واخدة حقها وتقريبا لو معاك 10 آلاف دولار ممكن تخلصهم شوبينج بس. 

دي كانت تجربتي في الصين بكل التفاصيل الممكنة واللي هتساعدك لو بتخطط تسافر هناك قريب، لو عندك تجربة تانية في الصين أو لو عايز تسألنا على حاجة ابعتلنا.