share this article

أغلب مهاويس الست اللي عرفتهم كان بابهم على عالمها السفر، السكة الطويلة، والقعدة بالساعات على كرسي صعب تتحرك من عليه، سواء كنت في عربية ولا قطر ولا طيارة، بتخلي الحركة الوحيدة المسموح بيها هي حركة الأفكار والمشاعر جواك.

والست أرض واسعة تجري فيها ورا أحاسيسك لفين ما تاخدك رجليك، وتؤنب روحك وتحاسبها حساب الملكين، وتندم، وتعاتب، وتشكي، وتهجر. صوتها هو المكان الوحيد المتاح ليك فيه توصل لأعلى درجات الضعف والارتباك، مفيش أحكام مسبقة، لدرجة إنك تخاصم وتصالح نفس الشخص مليون مرة وإنت قاعد على كرسيك متحركتش.

"خاصمتك بيني وبين روحي
وصالحتك.. وخاصمتك تاني
وأقول أبعد يصعب على روحي
تطاوعني ليزيد حرماني"



بداية طريق أم كلثوم

كنا بنروح بلدنا دايمًا بعربية عمي، واحد من سميعتها التُقال أوي، أول ما نستلم الطريق الصحراوي تستلمنا أم كلثوم. هو والست وطريق مرسوم بريشة رفيعة على لوحة ألوانها متدرجة من الأصفر للبني، تلال رملة في كل اتجاه ظاهر منها صخور قليلة، وجبال اتشكلت على مهلها عشان تغسل عين المسافرين بأجمل شروق بيطلع من وراها.


المصدر- Ranong Payakapan

من أغانيها كنت أعرف موده، لو "ألف ليلة" لا ده احنا نهزر ونضحك ونقف في ستلاف ريست، لكن لو "دارت الأيام" فمتفكرش تطلب ريست، لإنك ممكن تكمل السكة جري. في بداية مراهقتي، لما استلمت الهرمونات عجلة القيادة ووقعت في أول قصة حب، كنا مسافرين للبلد، وسمعتها بتقول:

"حبيبي لما يوعدني تبات الدنيا ضحكالي
ولما وصله يسعدني ما افكر في اللي يجرالي"

طب هو في كلام يعبر عن الرحلات اللي بتبتديها وإنت مش عارف هتكون إيه نهايتها زي الجملتين دول؟ خصوصاً لما يجي وراهم كلمتين يحيروا؟

"ولما طبعه يتغير وقلبي يبقى متحير
مع الأفكار أبات في نار وفي حيرة تبكيني"

فأرجع من البلد أرددهم في خشوع وألم، بس الاستفادة إني عرفت إن الرحلة زي الحب كده، مش هتعرف نهايتها غير لما تاخد الريسك وتبتديها.


الكره لما يتقلب لحب وفتنة

الغريب إني مكنتش من عشاق الست، في طفولتي كانت بالنسبة لي جلسات كهربة مجبر عليها طول ما "الحاج صاحب البيت" قاعد. مرة حذفت قناة روتانا زمان من على الريسيفر عشان أخلص، تصرف كلفني إني أقعد زي الشاطر أنزلها تاني، وأعيد ترتيب المحطات "في 6 ساعات". بس مع الوقت وكًتر السفر خلى عندي فضول أعرف إيه سر الحب ده، إيه الجميل يعني في واحدة بتكرر الجملة 100 مرة؟! 
اللي اكتشفته إن الست مش بتكرر، لإن كل إعادة لكوبليه قصة مستقلة بذاتها، وإحساس مختلف، ودفعة الدم اللي هتجري بسببها في شرايين دماغك وتخليك تسرح وتسافر معاها غير الدفعة اللي قبلها، كل الحكاية إنك محتاج مسافة طويلة تقطعها، عشان ميكونش وراك أي حاجة غير إنك تسمع وتسيبلها ودنك.

ولأني كنت ساكن في محافظة بعيدة عن القاهرة طول الوقت كنت بستخدم القطر، فبقى بيني وبين الست اتفاق مش مكتوب، أنا أشحن موبايلي والباوربانك كويس قبل السفر، وأجيب الهاند فري معايا، وهي تمسك المايك وتتولى تقصير المسافات. حريفة هي في ملاطفة كل حاجة بتظهر قدام عينيك من شباك القطر، الشجر، والشمس، والقمر، بس ما فيش ألطف من مناغشتها للنيل في سؤالها "يا حبيبي إيه أجمل من نيل وإتنين عاشقين؟!"



والنيل في بلادنا أكتر حاجة مراوغة، مش بيتبرع بالإجابات بسهولة، ساعات يظهر على يمين سكة القطر، وأوقات يهرب على شمالها، وفي أحيان كتر يفترق عنها، ويتدارى ورا الخضرة والنخيل والصحرا، فتتندم الست وتندمك معاها على البعد والجفا:

"كنت بشتاق لك أنا وإنت هنا
بيني وبينك.. خطوتين
شوف بقينا ازاي أنا فين
يا حبيبي وإنت فين؟!"



لما بقالي في مصر خليل

وبعد سنين لما بقالي أحباب في القاهرة بشتاق لهم، اتعلمت حساب الوقت بالدقايق على لقا قريب، بقيت أقعد في كرسي القطر أفرك مستني محطة الوصول، ومبقاش بيعلق في دماغي قد أغنية "على بلد المحبوب".

"يا مسافر على بحر النيل
أنا ليا في مصر خليل
من حبه ما بنام الليل
على بلد المحبوب وديني"



جمعت في بلاي ليست "سيدة المسافات الطويلة" أجمل كوبليهات وموسيقى في أغاني أم كلثوم. الليست بيبتدي بكام تراك عليهم عزف منفرد لأفراد من فرقة الست بيعملوا حاجات إعجازية هزت وقار أم كلثوم شخصيًا. بالترتيب: الناياتي سيد سالم، والكمنجاتي أحمد الحفناوي، ودكتور المخ والأوتار محمد القصبجي. نسيب بقى الست تقول بعدهم تفاريدها، أحلى كام جملة قالتهم في أغانيها، حاجة كدا من اللي بتعلي كهربة الدماغ، 22 كوبلية بالظبط. في ضهرهم على طول أفضل 29 أغنية ليها بناءً على تفضيلي الشخصي، واسقيني واملا واسقيني تاني، من الحب منك، من نور زماني.