share this article

نبتدى منين يا سيريلانكا ؟ بيسموها سويسرا الأسيوية، لأنك هتلاقي فيها كل درجات الأخضر على مد الشوف، شوف نفسك في إيه وهتلاقيه، شلالات وجبال؟ موجود، شواطئ تجنن، فاكهة من الجنة، سفاري وأفيال هتلاقي، أحلى أنواع الشاي، كله موجود. ضيف على ده كله إن الناس طيبين بزيادة وأغلبهم بيتكلم إنجليزى، ودي حاجة طلعت مش سهلة بالمناسبة. بالنسة للعملة، الجنيه المصري ب 10 روبية سيريلانكى وكمان الفيزا سهلة بتطلعها اونلاين و سعرها معقول 35 دولار للفرد.
البلد جوها إستوائى يعنى مفيش شتا من اللي نعرفه، درجات الحرارة صيفية، وفيه أمطار طول السنة بكثافات مختلفة حسب المواسم، طبعا فيه مناطق أبرد شوية من غيرها بحكم الإرتفاع، لكن من تجربتى شهر فبراير اللى فات، زرت4 مدن مختلفة فى 10 أيام و كان منهم يومين فيهم مطر شديد، المطر ماعطلش برنامج الرحلة ولا ضايقنا فى حاجة.

سيريلانكا فيها مزج من طرز معمارية كتيرة، لأنها لمئات السنين كانت متقسمة مستعمرات، ما بين إنجليزية وهولندية وبرتغالية، وعلى الرغم من حصولها على الإستقلال من 70 سنة بس، وكمان مرورها بحروب أهلية من بعد التاريخ ده، إلا إنها قدرت تنهض بإقتصادها، وتكون من أكبر المصدرين للمنسوجات والشاى والتوابل -خاصةً القرفة- في العالم! ده غير إنها بقت من أشهر وجهات السياحة كمان، بصراحة يستاهلوا لأنهم بجد راقيين ومنظمين وبيفهموا يعنى إيه استقبال وخدمة زائر.
طيب نرجع لعنوان المقال بقى. أنا بحب الأوتيلات جداً، اصورها، اتصور فيها، أقرأ وأكتب عنها، وأوقات كتير أثناء البحث المكثف اللى بيسبق أى سفرية، ألاقى أوتيلات معينة بتشدنى، وبحس إننى شايفة نفسى بتصور فيها وبكتب عنها، لحد ما اشوف سعر الليلة، واضطر أروح لزرار الفيلتر الواقعى الجميل اللى بتقدر تحدد من خلاله كبيرك تدفع كام فى الليلة.
و بصراحة كمان مش من المنطقى إنى أدفع آلاف الجنيهات، فى مكان بنام وبفطر فيه بس! وباقى اليوم طبيعى إنك عندك برنامج و بتتفسح! بس فى رحلة سيريلانكا قدرت أحقق المعادلة الخيالية اللي فى العنوان: كلت وشربت واتصورت ونزلت البيسين 3 مرات فى 3 مدن فى 3 من أجمل و أغلى فنادق سيريلانكا بفلوس مش هاتصدقوها!! ها؟ شوقتكم؟

المحطة الأولى: كاندى Kandiالمصدر : The Miracle Island

"كاندى" كانت أول محطة لينا فى سيريلانكا، مكانها فى الإقليم الأوسط، وكانت آخر عاصمة ومقر للحكم فى عصر المملكة القديمة فى القرن ال16. 
خلينا فى المهم: الأوتيل إللى عملنا فيه الداى يوز اسمه The Elephant Stables أو اسطبلات الأفيال! أيوة هفهمكم ليه اسمه كده، الفندق ده عينى وقعت عليه وأنا بدور على Tripadvisor هنسكن فين، بعدين قريت التقييمات وشفت الصور و اتصدمت من السعر. وخلاص الموضوع كان يعتبر خلص على كده لكن فضل فى بالى أيام، هو من نوعية الفنادق اللى بتتصنف بوتيك وده معناه إنه صغير حجماَ، وفيه عدد محدود من الغرف، لكن الاستايل بتاعه فاخر جداً، وموقعه أعلى الجبل مع المنظر الوهمى اللى بيطل عليه حمام السباحة، يخلوا أي حد نفسه ينزل فيه! ده غير إن له تاريخ كمان إنه كان مقر إقامة السير "كودا راتواتى" أول حاكم سيريلانكى لكاندى! وكان حوالين البيت ده مزارع ضخمة بيرعي فيها أعداد كبيرة من الأفيال، ده طبعا السبب في تسميته اسطبلات الأفيال.
لما الفندق فضل فى خيالى وبالصدفة قريت كده على بلوج لكابل كانوا فى سيريلانكا، وبيحكوا علي داى يوز عملوه فى أوتيل تانى هناك، قررت ابعت لمكتب الحجز في الفندق، وأسأل عندهم داى يوز ولا لأ، خاصةً إن ده كان متاح كتير فى ماليزيا، ومع التجارب اللى بعد كده اكتشفت إن أغلب الفنادق فى أسيا فيها نظام الـ  pool pass

الفندق رد عليا بإنه متاح، والمفاجأة بسعر مصدقتوش ولا حد يصدقه!!
موقع الفندق: http://elephantstables.com/

سعر الليلة فى فبراير 2018 : 320 دولار أمريكى يعنى 5750 جنيه مصرى تقريباً.
رسوم الداى يوز للفرد وقتها: 1000 روبية سيريلانكى يعنى 100 جنيه مصرى للفرد!!
قلتلكوا مش هاتصدقوا - سوسة أنا - الرسوم دى بتتيح لك أنك تستخدم البيسين من الصبح لحد 9 بالليل و بيوفرولك فوط ومسموح تاخد أكل ومشروبات معاك عادى.
الإيميل إللى حجزت عليه: shimali@elephantstables.com

المحطة التانية: جول Galleالمصدر: Travel Srl Lnka with ContourlineTravvels & Tours

بعد كاندى، برنامجنا كان فيه 4 أيام فى "كولومبو" اللي المحليين جزء منهم بينطقها "كلامبو"، وجزء"كولامبا" فمتتخضوش، كولومبو هى أكبر مدينة فى الجزيرة، ومركز التجارة والمقر الإداري للحكومة، فيها المولات الكبيرة وسلاسل الفنادق العالمية زي موفنبيك وشانجريلا وغيرها.
كنا مرتبين يوم جولة فى المدينة وشوبنج ويوم هنروح جنينة الحيوانات، بعدها نتمشى وناكل من الأكشاك المحلية فى أجمل ممشى على البحر "جول فيس جرين"، ويوم كنا حاجزين رحلة اليوم الواحد لمدينة "جول".
"جول" موجودة على الساحل الجنوبى الغربى لسيريلانكا، وفيها أجمل شواطئ الجزيرة زي"بنتوتا" و"أناواتونا"، ودول مجهزين لسياحة الشواطئ وفيهم فنادق كبيرة ومنتجعات وشاطئ "ميريسا"، اللي لسه محتفظ بجماله البكر. وفيه بيوت استضافة وأكواخ بسيطة. هناك كمان قلعة جول اللي انشأتها البرتغال فى القرن الـ 16، واضافت لتحصيناتها الحربية هولندا في القرن ال17، بيحيط بيها بيوت أثرية بطرز برتغالية وهولندية وإنجليزية، اتحولت لفنادق ومطاعم وكافيهات، طبعا كل ده على البحر.

جول بيتعمل فيها كمان رحلة سفاري فى نهر مادو الموازى للساحل الجنوبى، وبيصب فى المحيط الهندى، بيعدى فيها القارب فى غابات مانجروف، اللي فيها فصائل طيور وزواحف نادرة، دي بتكون بديل ظريف للى مابيلحقش يعمل سفاري بري، عشان يشوف الأفيال والفهود.
ممكن توصلوا لمدينة جول بالقطر من كولومبو. الرحلة كلها مناظر طبيعية تجنن بتاخد حوالى ساعتين لتلاتة، والتذكرة بحوالى 1100 روبية، لكن لأن جدولنا لليوم ده كان مشحون جداً، فضَلت إننا نأجر عربية بسواق ينفذلنا البرنامج كله، حجزت العربية من نفس الشركة اللى كنت حاجزة معاها استقبالنا فى المطار عند الوصول، وتكلفة اليوم كامل لجول بكل تفاصيل البرنامج كانت 70 دولار.
احنا كانت خطتنا:
1 - نعدى في الطريق على شاطئ "بنتوتا" للراحة والتصوير. 
2 - بعدها نعمل رحلة السفارى بالقارب ولما نخلص.
3 - نروح الأوتيل اللي هاقولكوا عليه على شاطئ أناواتونا ننزل البيسين ونتصور.
4 - نزور القلعة وقت الغروب قبل ماناخد طريقنا للرجوع لكولومبو.

عملنا رقم 1 ولما رحنا لرقم 2 الدنيا ماظبطتش خالص، كنت سائلة على منتدى سيريلانكا على Tripadvisor على سعر رحلة السفاري، وأغلب الردود كانت 5000 روبية للمركب كحد أقصى،  لما السواق وصلنا للمكتب اللي بينظم الرحلة تقريباً شافونى محجبة قاللك امسك أثرياء عرب! فقالولنا الفرد ب 50 او 70 دولار مش فاكرة، طبعاً صدمة! المهم طيب ياجماعة الرحلة بتاخد وقت قد إيه؟ قالوا 3 ساعات، طبعا كده اليوم هيضرب مننا، وانا أصلاً كنت قلقانة شوية من موضوع الزواحف ده  فقررنا نلغى.

جينا لوقت الجد: أوتيل كلامندر أناواتونا بيتشالمصدر: Unawatuna Beach Resort
كنت برضه مكلماهم وسائلة على الداي يوز، الناس رحبوا وقالوا الفرد ب 1250 روبية، مقابل استخدام حمام السباحة والشاطئ والفوط والواى فاى، طبعا جميل جدا، الفندق مشهور بموقعه المتميز فى أخر الشريط الساحلى لشاطئ اناواتونا، بمنظر النخيل الإستوائى الشهير. غير الشاطئ الحقيقة الأوتيل كمان مشهور بحاجتين غير بعض خالص، حمامين سباحة واحد غريب ومريب جداً، لإن سيراميك الأرضية فيه أحمر فلكم أن تتخيلوا شكله مرعب ازاي، وفعلياً مكانش فيه حد خالص من نزلاء الفندق، وحمام سباحة تاني موازي للشاطئ، وبيطل على البحر وكمان حيطانه زجاجية، كل الجنسيات تقريباً كانوا مستمتعين بالهزار والتصوير للظاهرة اللى بيسببها انكسار الضوء، فبيخلى اي حد فى البيسين نصه اللى فوق المياه في حتة واللي تحت المياه في حتة تانية خالص.
المهم إننى كمان لما وصلت الأوتيل مكانش ليا مزاج أنزل المياه، ولما قلتلهم فى الريسبشن خدوا رسوم الداى يوز من جوزى بس، وبما إننا ماعملناش السفاري فكان فيه فايض فلوس من ميزانية اليوم، فقمت اتمشى وابص على المطعم، لقيت مطعم الأوتيل واسمه" الفرانده" عبارة عن تراس كبير على البحر بيقدموا بوفيه غداء هايل متنوع، فيه أكتر من ستيشن فيهم المقليات بتتعمل فريش وإنت واقف، وفيه سي فوود، وكل أنواع والنودلز، سعر الفرد كان 2200 روبية، فطبعاً اتغدينا هناك، بعد الغدا زرنا القلعة، وأكتر حاجة حبيتها كانت شكل الأطفال المحليين اللى بيلعبوا كريكيت (الرياضة الشعبية الأولى) فوق سطح المكان اللي كان فى يوم من الأيام حصن للمحتلين.

الفندق : Calamander Unawatuna Beach
http://www.unawatunabeachresort.com/
شركة السياحة اللي حجزنا منها السواق و العربية:Kanota Tours
اللى هايقرر يروح جول بالقطر لازم يحجز قبلها بيوم او إتنين فى قطر 6:30 الصح لإنه الوحيد اللى فيه عربية درجة اولى مكيفة وعدد مقاعدها 48 بس.

 المحطة التالتة: نيجومبوNegomboالمصدر: Jetwing Hotels
ده كان آخر يوم لينا فى سيريلانكا ، المفروض نسيب أوتيل كولومبو بعد الفطار، وطيارة العودة 9:30 بالليل، طبعاً بعد البحث لقيت الحل الأمثل إننا نقضى اليوم ده فى نيجومبو، ودى برضه مدينة شاطئية على بعد 20 دقيقة من مطار كولومبو، وفيها منتجعات 5 نجوم على البحر متاح فيها الداى يوز.

بعد التواصل مع الفندق اللي اخترته Jetwing Beach ولأن سفرنا كان يوم الأحد، بعتولى إن عندهم عرض خاص ليوم الأحد وهو مشروب ترحيبى + استخدام حمام سباحة وشاطئ + بوفيه الغدا + شاى وقت العصر بسعر 3750 روبية للفرد يعنى 375 جنيه. العرض كان حلو ومناسب وشامل وهنقضى هناك يومنا الأخير فى سيريلانكا في استرخاء لحد معاد الطيارة.
طلبنا أوبر بعد الفطار و طلعنا على نيجومو – الطريق حوالى 50 دقيقة لساعة – لما وصلنا الفندق لقيتهم فى الريسبشن بيقولولى إن الأوتيل فيه فرح على حمام السباحة، وده ممكن يعملكم إزعاج (معلش مايعرفوش المصريين) وعرضوا عليا نروح اوتيل تانى لنفس السلسلة جنبهم إسمه Jetwing Blue، بس بصراحة احنا حبينا فكرة إن أخر حاجة نشوفها تكون حفل زفاف سيريلانكى وعرفنا إن فيه حمام سباحة تانى هايكون أهدى و قررنا نستنى.

شاطئ الأوتيل ده من أنضف و أجمل شواطئ نيجومبو خاصةً، إن شواطئ نيجومبو مش بجمال باقي الشواطىء في المدن التانية، حمامات السباحة بتطل على البحر، الجزء اللي حضرناه من الفرح كانت حفلة ريسبشن نهارية، استمرت حوالي ساعتين مع فوتو سيشن للعرسان على البحر، والمفترض إنهم هيكملوا بحفلة تانية بالليل، حفلة الإستقبال دى إن مظاهر الفرح بين البشر عموما متشابهة، نفس القرايب وهزارهم، الصحاب اللى صوتهم وحش بس يمسكوا المايك ويغنوا، البوزات اللى بتتاخد فى الصور ، الستات الكبيرة اللى ملمومين على ترابيزات الهدايا التذكارية، كله كان موجود.


المصدر: يسرا الديب
بوفيه الغدا كان خرافي وفيه توافق تام بين الكم والكيف والتنوع والجودة، كل العاملين في الفندق بشوشين وبيساعدوا بإهتمام، لما جينا نمشى حاولنا نطلب أوبر لكن مكانش متاح خالص، سألنا على خدمة توصيل المطار من الفندق لقيناها غالية جداً، الوقت بدأ يمر وبدأنا نتوتر، وعمال الشنط حاولوا يتكلموا معانا و يعرفوا احنا منين، واحد منهم لما عرف إننا من مصر اتبسط قوي وقعد يقولنا إن حلمه يزور الأهرامات، فى وسط ما بنتكلم كان فيه توكتوك بينزل نزلاء على باب الأوتيل، جريوا العمال عليه نزلوا شنط الناس وثبتوه عشان يوصلنا المطار.
إيميل الحجز: resv.beach@jetwinghotels.com

نصيحتين على الماشى:
1 - سواء سيريلانكا أو أى وجهة أسيوية مسافرين ليها، خدوا معاكوا جبنة –آه والله– مثلثات، مربعات، مدورات، أي حاجة هاتنفع سناك، لو قدامكم برنامج زيارات مشحون أو جعتوا بالليل، والجبنة غالية جداً جداً فى أسيا.
2 - كلوا فاكهة على قد ما تقدروا وانتوا هناك – بالذات الأناناس والمانجة دول من عالم تاني – واشربوا جوز الهند، رخيص ولذيذ ومنعش ومفيش منه عندنا.
3 - مفيش فرق كبير فى سعر العملة بين المطار و مكاتب الصرافة هناك، بس أصلاً أوبشن الصرافة ده مش كتير يعنى، وفيه منهم أغلى من المطار كمان، يبقى غيروا نص الفلوس في المطار وقبل ما تسافروا اعملوا مكالمة للبنك بتاعكوا اخطروهم بوجهتكم عشان يشغلولكوا الكريدت كارد بره، ولما تعوزوا فلوس تانى اسحبوا من المكن في المولات.