share this article

قبل حكايتي مع روما خليني أديكم نبذة مختصرة عني في سياق الحكاية، أنا واحدة طول عمري أحب البيتزا البان، البيتزا الرفيعة دي شيء مش مفهوم سبب وجوده في الحياة بالنسبالي! أحب المكرونة مستوية مليش في الـal dente والكلام ده، سيب يا عم المكرونة تتسلق للآخر زي ماما مابتعملها! ومليش في الفن والمتاحف واللوحات، ايه بقى اللي يودّيني روما؟!! بس لأ دي أول طلعة لأوروبا وميصحش برضه منعديش على واحدة من أهم المدن الأوروبية .. نروح روما.

المصدر: Italiarail

روما بتتوصف دايماً إنها متحف مفتوح، طول مانت ماشي هتعدّي على مبنى أو شارع أو نافورة أو تمثال أو حتى حنفية مياه أثرية، وفي الكام سنة اللي فاتت وصلوا لدرجة إنهم بقوا خايفين على الآثار والمزارات بتاعتهم من كتر عدد السياح اللي بيجيلهم كل سنة، ورغم إني لسه قايلة من 30 ثانية إني مليش في الفن والمتاحف واللوحات؛ بس هو كل ده اتغير بعد أول متحف دخلته وأول لوحة وقفت أدامها ربع ساعة اتفرج عليها ولا أجدعها ناقد فني.

إزاي تروح روما؟ وتقعد فين؟المصدر: Claudio Hirschberger

أنا كنت واخدة الفيزا بتاعتي من فرنسا فدخلت فرنسا الأول لفيت فيها شوية وبعدين بأتوبيس Flixbus عدّيت من مارسيليا في فرنسا لفلورنس في إيطاليا، يوم في فلورنس وبعدين أتوبيس برضه من فلورنس لروما (رحلة 3 ساعات في أتوبيس آخر شياكة بـ10 دولار تقريباً)، عموماً سهل تلاقي أتوبيسات كتير وقطر من أي حتة في أوروبا لروما، وسهل كمان لو بتخطط من بدري تلاقي تذاكر طيران من القاهرة لروما أو ميلان من أول 3500 جنيه.

أما بقى الإقامة فأنا اخترت الهوستل بتاعي في واحدة من أحلى مناطق روما؛ تراستيفري Trastevere، وهو هوستل للبنات بس اسمه Orsa Maggiore؛ كان سعر السرير فيه 250 جنيه في الليلة تقريباً، وبسبب موقع الهوستل اللي قريب من كل حاجة في روما؛ قضيت السفرية كلها تمشية ومحتجتش أركب مواصلات غير مرتين تلاتة مثلاً، غير كمان إنه أكتر مكان اتصاحبت فيه على ناس لأني كنت قاعدة في أوضة فيها 3 سراير، طول الـ3 أيام بتوعي كان بيعدي عليا بنات جايين يوم ليلة واحدة ماشيين، يعني فعلياً مشيت من الهوستل متعرفة على 9 بنات من بلاد كتير، غير البنات اللي بيشتغلوا في الهوستل نفسهم واللي رشحولي شوية أماكن أكل مش هنساها في حياتي .. هنتطرق لموضوع الأكل كمان شوية مش هنسيبه!

ميدان وكنيسة القديس بطرس - St. Peter's Basilica المصدر: Daniel Kelly

بداية رحلتي كانت لأقرب مزار من الهوستل، مشي 20 دقيقة وصلت لميدان القديس بطرس، الساحة الكبيرة اللي الناس بتتجمع فيها يوم الأربع عشان تشوف بابا الفاتيكان وتتبارك بيه، تصميم الساحة ده اتعمل أصلاً بحيث يبقى شكله بيضاوي كإن فيه ايدين طالعين من كنيسة القديس بطرس بتحتضن كل الناس اللي جايين، وفيه مسلة مصرية في النص، كان أكتر مكان محستش فيه بالطابور لأني طول مانا واقفة قاعدة اتفرج على التفاصيل الكتير أوي حواليا!

خلصنا الطابور ودخلنا الكنيسة؛ كنيسة سانت بيتر اتبنت في عصر النهضة وبتعتبر أشهر صرح مبني على الطراز المعماري بتاع العصر ده، غير كمان إنها أكبر كنيسة في العالم، وتخيل إن دخول أكبر كنيسة في العالم من غير فلوس! بس هتحتاج تدفع تذكرة عشان تطلع جوة القبة وتشوف المنظر البانورامي من فوق للمكان من برة، ودي سعرها 8 يورو؛ بتدفعهم عشان تطلع في الأسانسير للتراس وبعدين تطلع حوالي 300 درجة سلم.

متحف الفاتيكانالمصدر: Nada Abdrabou

فيه آلاف وآلاف من البشر بيزوروا متحف الفاتيكان يومياً، متخيل شكل الطابور ممكن يبقى عامل إزاي؟ أنا محاولتش أتخيل الحمد لله وحجزت التذكرة أونلاين قبل السفر عشان الإنتظار فعلاً مأساوي مهما حاولت تروح بدري، بس هو من الأماكن اللي زحمتها بتتنسي مع أول رسمة على أول سقف بتشوفها أو أول تمثال من إبداعات مايكل أنجلو عينك بتعدي عليه!

ملحوظة عالماشي: متحف الفاتيكان بيبقى مقفول يوم الأحد ما عدا آخر أحد في الشهر بيبقى مفتوح ومجاني كمان، وحاول تتجنبه يوم الأربع عشان الجماهير الغفيرة بتملى الساحة في اليوم ده عشان تشوف بابا الفاتيكان.

المصدر: Lonely Planet

جوة الفاتيكان مفيش تفصيلة بتمر مرور الكرام، هو من الأماكن اللي فضلت متنحة فيها من أول ما دخلت لحد ما خرجت، ومش فاكرة إني حاولت أركز في الخريطة أو أشوف أنا ماشية إزاي أو رايحة فين، لأ زي ما رجلي واخداني أنا بتفرج ومستمتعة وخلاص.

كنيسة سيستينا - Sistine Chapel المصدر: Lonely Planet

الزحمة اللي فوق مستوى الإزدحام بقى كانت في كنيسة سيستينا Sistine Chapel، ولأن المكان صغير فمش مسموحلك تدخل جوة تقعد كتير، لأ تدخل تتفرج شوية وتخف رجلك وتخرج عشان بقية الأمم، أنا فاكرة إني أول ما دخلت ضيعت كام دقيقة بحاول أستوعب كمية البشر لدرجة إني كنت هنسى أرفع عيني للسقف وأبص على أهم حاجة اللي كلنا هنا عشانها! لوحة "بداية الخلق" أو Creation of Adam اللي رسمها مايكل أنجلو في جدارية من أعظم وأشهر الجداريات في العالم.

فاكرين في أول المقال لما قلت إني مليش في الفن واللوحات والمتاحف!!! كُنتُ مغفلٌ (بصوت عبد المنعم مدبولي)

كاتدرائية Sant'ignazioالمصدر: Nada Abdrabou

الكنيسة دي مكانتش من ضمن الأماكن اللي خططت أروحلها في روما، كنت بتمشى عادي لقيت مبنى شكله حلو والدخول ببلاش قلت أدخل أبص بصة، مكنتش متخيلة إني هشوف أحلى كاتدرائية عديت عليها، يمكن أكتر من سانت بيتر كمان أو يمكن فيه حالة كده حصلت بيني وبين المكان، أو يمكن المرايا المحطوطة اللي بتخلينا نتصور Mirror Selfie مع السقف؟ مش عارفة! بس هي مكان لازم يتراح وأكيد مش هتعدي من غير ما تتصور مع السقف .. مش كل يوم بنعدي على سقف زي ده وكمان كتّر خيرهم so cool حاطين مرايا عشان رقبتنا متتلوحش.

ميادين ونوافير .. ونوافير وميادين المصدر: Nada Abdrabou

لما وصلت الهوستل؛ موظفة الإستقبال ادتني خريطة مطبوعة ملونة وحلوة أوي، وبقلم جاف عملت دواير على كل المزارات الأساسية وقالتلي إن كلهم مسافات قريبة من بعض أتمشاهم، ابتديت بميدان فينيزيا Piazza Venezia ومنه كملت على نافورة تريفي، النافورة المشهورة اللي الناس بترمي فيها فلوس وتتمنى أمنيات، واللي بالمناسبة مش مستاهلة خالص تعجن نفسك في الزحمة عشانها، ومنها للسلالم الأسبانية وبرضه نفس الزحمة الفظيعة لدرجة إن حتى فكرة وقوفك عشان تتصور في المكان مش هتطلع بصورة حلوة في الآخر، كمية بشر حواليك بتلغي ملامح المكان.

المصدر: Nada Abdrabou

اللي كان لطيف بالنسبالي هو ميدان نافونا Piazza Navona لأنه واسع أوي فالزحمة مش بتخنق المكان، غير إن الموود نفسه هناك حلو أوي وكله ناس بتعزف مزيكا أو بتغني أو بترسم أو بترقص وتعمل حركات سحرية، وحظي الحلو إن رحلتي في روما كانت وقت ويك إند، ف كده كده الشوارع كلها على يوم الجمعة بالليل بقت عبارة عن ناس بتتفسح في الشارع وأغاني ومزيكا في كل حتة.

حدائق فيلا بورجيزي Villa Borghese المصدر: Nada Abdrabou

بعيد شوية عن موود المتحف المفتوح في روما؛ فيه حدائق فيلا بورجيزي، ودي مساحة كبيرة جداً حوالي 8 كيلو جنينة مفتوحة للتمشية وفيها بحيرات وطبعاً لازم يكون فيها تماثيل وقطع أثرية؛ إحنا في روما يعني مبعدناش! دخول الجنينة ببلاش وحلوة أوي في الوقت اللي قبل الغروب لو عايز تتمشى بس أو تقعد على البحيرة عند Temple of Aesculapius -مشيت أكتر من ساعة عشان أوصل هناك بس ممكن تكتب المكان على جوجل مابس لو عايز تدخل من البوابة اللي جنبه على طول- وفيها كمان جنينة الحيوانات بتاعة روما، ده غير إن فيها سينما مفتوحة في الهوا كده وبيتعمل فيها ايفينتات وأنشطة كتير دوّر عليها قبل سفريتك.

الأكل الإيطالي .. اللي على أصوله!  المصدر: Nada Abdrabou

هنا بقى أحب أنسف كل الكلام اللي بدأت بيه الحكاية، وأقر إني رجعت من روما مش قادرة أنسى كل بيتزاية رفيعة أكلتها هناك، أو الكالزون calzone اللي هي البيتزا اللي بتبقى مقفولة، افتكرت وقتها فيلم "Eat Pray Love" وأدركت إن مكانش ينفع استاذة جوليا روبرتس تختار مكان تاني غير إيطاليا عشان تغرق جوة عالم الأكل، في روما كنت حاسة إني عايزة آكل كل ساعة، سلايس بيتزا وراه طبق باستا، الجيلاتي ده تقريباً مسبتش محل في أي شارع أو زقاق غير وجرّبته!

بالمناسبة إيطاليا من البلاد اللي محتاجتش أشتري فيها مياه خالص، كان معايا إزازة فاضية وطول مانا ماشية فيه حنفيات مياه في الشارع ساقعة وجميلة، كل شوية أملأ إزازتي منها، وفيه منهم حنفيات حتى أثرية وشكلها لوحده كإنه مزار سياحي صغير في سكتك.

دي ترشيحاتي الشخصية اللي متتفوتش:

  • Dar Poeta 
    د كان أساسي في يومي إني أروح آكل بيتزا هناك وبقية اليوم أجرب حاجات تانية من أي حتة، وعندهم كالزون حلو محشي نوتيلا وجبنة ريكوتا .. عظيم!
  • La Salumeria
    بما إني شخص يعشق الخبز بكل أنواعه يبقى لازم أجرب البانيني في بلد المنشأ بتاعته، و "لا سالومريا" كان أعظم مكان ممكن تاكل فيه ساندوتشات، مجرد ترصيصة الجبنة بكل أنواعها وأشكالها واللحمة المدخنة والبسطرمة في دخلة المحل كده تفتح النفس، وممكن تطلب ساندوتش أو cheese board اللي بيبقى عبارة عن تشكيلة من عينات الجبن.
  • Da Gildo
    ده كان مطعم صغير وشبه مطاعم وسط البلد القديمة بتاعتنا، في منطقة Trastevere ودخلته لما لقيت ريفيوز لطيفة عليه وزحمة ناس كتير رغم إن جنبه مطاعم تانية كتير، وده كان المكان اللي جربت فيه الباستا الـal dente وبدأنا صفحة جديدة؛ مش عارفة أنا حبيت الباستا اللي مش مستوية أوي عشان أكلتها في روما من إيد شيف إيطالي كُبّارة وقديم ولا أنا حبيت الباستا الـal dente عموماً .. اسئلة وجودية مش مهمة بس المهم إن الأكل جميل!

 المصدر: Nada Abdrabou

روما كانت تجربة جميلة، ورغم إني عادة لما أسافر بحب المدن الصغيرة أكتر، بس ممكن أقول إن روما كانت من الأماكن اللي حبيت زحمتها، وحبيت الدوشة اللي فيها لأنها دوشة غالب عليها المزيكا والفن والأصالة في كل حتة حواليك حتى لو في حنفية مياه في الشارع.