share this article

كل حاجة كانت طبيعية جدا، والفيس بوك أمنه مستتسب مشغول بمسلسلات رمضان وإعلاناته. لغاية ما صحينا في يوم لاقينا ناس بتتراشق بالبوستات، اتجوز وسافر.. لا متتجوزش وسافر. والموضوع فضل يكبر ويوسع وبقى تريند وفي هاشتاجز، كل الآراء المكتوبة دي اتنشرت الأول على جروبين هم Traveller Experience وTravel Secrets Club، واستأذنا أصحاب القصص إننا نشاركها هنا. الفكرة كلها جاية من التفكير النمطي عن الجواز بإنه قفص وبيربط الشخص على الأقل بشخص تاني. لغاية ما يشرفوا الأطفال في ديل بعض وتختفي الفلوس وتظهر في هيئة بامبرز ولبن وحاجات كتير مش بتخلص. وإن الفلوس والأرقام الخزعبلية اللي بتتحط في القاعة والفرح وكرش وهز وسط المعازيم، ده غير فلوس الشقة والعفش والأجهزة، أحسن تسافر بيها وتنبسط بدل ما تصرفهم على الكلام ده. وعشان تبقى مواكب للحدث إحنا جمعنا أراء الناس من وجهتين النظر واللي كل واحد فيهم عنده أسبابه المقنعة، لكن اللي الكل اتفق إن السفر قبل أو بعد أو أثناء أو في أي وقت حلو وممتع بكل أشكاله.

ومتقلقيش إنتي مش مضطرة أبدا تستني لغاية الجواز عشان تسافري. وده واضح في وجهات نظر البنات اللي كانت بتشجع على السفر ومش رافضين فكرة الجواز لا. وهتلاقي الناس دول بيقلوا لك إزاي تسافر وبيجوبوا على لغز أجيب منين:
1 - هشام أحمد
اتجوز وسافر.. الجوازة بتيجي برزقها

أكتر حاجة كانت مخوفانى من الجواز إنى مش هعرف أسافر بعد ما اتجوز، عشان من أكتر الحاجات اللى بحبها فى حياتى هي السفر. وهو للأسف فعلا في مصر محدش بيعرف يجمع بين الإثنين، بس مش عيب فى الجواز ولا فى السفر، العيب فى ستايل الجواز الروتينى والممل فى مصر، والعادات اللى اتربينا عليها وبقينا نعملها من غير ما نفكر. وإن أي اثنين متجوزين بيتعاملوا كزوج وزوجة مش أصحاب ممكن يفكروا ويحوشوا مع بعض لأى حاجة نفسهم فعلا يعملوها. 
لو عايز تجوز وتسافر لازم تغير أولوياتك ويبقى عندك قدر من البراح النفسى إنك متقلدش الناس فى كل حاجة بتعملها من غير ما تفكر إنها ممكن ما تفيدكش بنكلة.  لو عايز تجوز وتسافر لازم تدور على واحدة مستعدة تلغى فرحها وتسافروا بثمنه. واحدة ممكن تديلك فلوس النقطة بتاعتها وتقولك يلا نكملهم عشان نسافر تانى. واحدة ممكن تستغنى عن الايفون وموبايل بعشرميت جنيه عشان توفر الفلوس دى ونكمل عليها ونطلع نسافر تالت. واحدة مستعدة تتنازل عن الفنادق الغالية والتاكسيات وتنزل معاك فى أوض تحت السلم وتمشى معاك فى السفرية كل يوم 8 و 10 كيلو من غير ما تشتكي.
عشان تجوز وتسافر وتفضل تسافر مع مراتك طول عمرك غير فكرك، شوف ايه مناسب ليك وايه مش مناسب، شقلب استايل الجواز الروتينى ومتطالباته اللى فيها جزء مهم لازم، وفيها جزء ملوش اى لازمة.

 

2- آية فحام
سافر الأول بعدين اتجوز.. السفر بيحط كل معتقداتنا وأفكارنا في اختبار حقيقي.

1- نسافر الاول لآن السفر هيبين لنا "نفسنا الحقيقية" من "نفسنا ال Fake"
السفر هيورينا حاجات مكناش متخيلين انها موجودة أصلا، هنقابل ناس مكناش نحلم نشوفهم، هنعمل حاجات ونخوض تجارب كنا متخيلين إننا أضعف من إننا نعملها، هنحب حاجات كنا متأكدين إننا مبنحبهاش وهنكره حاجات كانت المفضلة بالنسبه لينا!

2- السفر بيخبط في لُب كل معتقداتنا وأفكارنا.
السفر بيحط كل معتقداتنا وأفكارنا في اختبار حقيقي.. فبنقدر نفرق بين معتقداتنا الحقيقية واللي بجد مؤمنين بيها وهنلتزم بيها أيا كان احنا فين ومع مين. وبين الأفكار اللي يعتبر وارثينها بس عن المجتمع، واللي 100% هتسقط في أول اختبار حقيقي مهما حاولنا نكابر ونمثل. عشان كده محدش يفتكر إن عنده "values" معينة غير لما يحطها في اختبار حقيقي !

3- مقدار التعلم في مكانك محدود .
ربنا ماخلقش الكواكب والمجرات اللي لا حصر لها عشان حضرتك تفضل قاعد في مكانك ماتتحركش منه!

كلنا في بلدنا مهما كنا منفتحين ومتعلمين فمقدار التجارب والناس والفكر محدود. لكن أول ما هتسافر وتحتك بناس من أفكار وأيديولوجيات وأديان وموروثات وأعمار مختلفة عنك هتكتشف إنك كنت موهوم بأفكار ومسلمات كتير لا أساس من الصحة، آه والله. وإن الحقيقية نسبية متغيرة حسب الشخص والمكان اللي إنت فيه.

4-  بتكون بني آدم أقل عنصرية وأكثر تسامح وحب وتقبل لنفسك وغيرك.
لما بتسافر بتكتشف إن الدنيا فيها بلاوي وخير كمان كتير أوي. وإن ناس حلوة أوى بترتكب ذنوب كبيرة أوى، وناس وحشة أوي بتعمل خير كتتتير أوي. فتبتدي تبص لنفسك وتكتشف إنك زيهم كلهم بالظبط مليان بحب الخير وفعل الشر- مهما ربنا سترنا ومهما حاولنا نمثل الفضيلة -  فنبتدى نحب كل الناس ونفسنا بغض النظر عن كل الحاجات القميئة. ونوصل للحقيقة الأكثر أهمية إن احنا بشر مش آلهه دورنا نحب بعض بدون أحكام وتنظير ونسيب الأحكام لصاحب الحكم والملك !
نسافر ازاي واحنا معناش فلوس ؟
1- لازم تتكلم وتتعلم انجليزى، لازم أيوة!! لازم!
2- في منح كتير على النت كلها كاملة وشاملة تذاكر طيران .. أنا نفسي اول ٣ سفريات ليا كانت منح كلها شاملة تذاكر الطيران.
For9a.com .. heysuccess.com .. opportunitydesk.com
3- اتطوع في أي مكان واي بلد، وهتدفع بس تذاكر الطيران ودلوقتي في تذاكر طيران بـ 1000-2000 جنيه.
4- سافر بري أو بالعبارة أو بأى وسيلة تانية غير الطيران لو الميزانية لا تسمح.
5- سافر لوحدك داخلي لحتت بعيدة غير معتادة في مصر وأقعد مع أهل المكان الحقيقين مش مع صحابك. " بدو في سيناء " " الامازيغ في سيوة"، أهل الواحات، النوبين .. الخ
6- وفر فلوس السجاير/الكافيهات/الخروج/الهدوم الي ملهاش لزمة.. إلخ في إنك تحوشها وتسافر بيها.

المهم إنك تسافر أي حتة وأي مكان مش بس بهدف الفسحة على قد ما هي بهدف التعلم وتوسيع نطاق الفكر والحياة.
الجواز حلو جدا أكيد وياريت الكل يتجوز. بس اختيارتنا لأي شخص بتكون غير ناضجة كفاية لحد ما نعرف نفسنا الحقيقية من نفسنا ال Fake، ونفهم عايزين ايه من الدنيا وايه values بتاعتنا وايه "our calling in Life". لما نكتشف كل ده عن عالمنا الداخلي، نقدر نختار حد متوافق ومناسب لنفسنا الحقيقية، مش حد مناسب من وجهة نظر ماما، أو مناسب لجيبي أو مناسب لشكل اجتماعى معين!

الحقيقة المرة الأخيرة :
انا لقيت شغفي في اليوجا وتعليمها للناس، غيرى لقاه في التصوير وغيره في الرسم وغيره في المزيكا وغيره في الكتابة.. الخ. بس إنت مش حتقدر تطبق أي قصة من قصص الناس على نفسك لان ببساطة محدش قصته ولا موهبته ولا طريقه ولا حياته المفروض تبقى زي قصة اي حد تاني في الحياة ودي من نعم ربنا علينا وبالتالي القصة الحقيقية الوحيدة هتبدء من وحي نفسك الحقيقية مش ال Fake. فمن الآخر سيبك من الي انا وغيرى بنكتبة عن قصصنا وحياتنا دور على نفسك، سافر أي حتة لوحدك عشان تلاقي نفسك وضالتك في الحياة!

 

3-نورهان طارق
اتجوز وسافر.. بعد ما بقينا في بيت واحد لقينا عندنا إدمان مشترك هو السفر

احنا اتجوزنا من أربع سنين، وزي أي اتنين شباب عافرنا علشان نتجوز. بس بعد ما بقينا في بيت واحد لقينا عندنا إدمان مشترك هو السفر. بنشتغل ونحوش القرش على القرش علشان نسافر. وفعلا مفيش شريك سفر أحسن من إنك يكون عندك صديق مهووس بالسفر زيك بالظبط، ويا سلام لو صديقك ده جوزك أو مراتك. بتلاقوا نفسكم بتتشاركوا علشان تقرروا هتعملوا إيه، وبتقضوا وقت تتناقشوا فيه وتشيلوا من بادچيت كذا علشان تحطوا في كذا. و تبدأوا تتخانقوا، فتقسموا المهام مين هيقرأ عن البلد ومين هيدور على حجوزات كذا. ده غير إن هتلاقي اللي يصورك صور متعجبكيش، وتفضلي تقوليله لا مش عاوزاها كده، لحد ما تتصوري في المكان خمسين الف مرة ولا صورة منهم عجباكي. بس بجد حقيقي لو في حياتكم حد مدمن سفر زيكم اتجوزوه على طول.
إحنا يوم ما اتجوزنا كانت امكانياتنا يادوب تتمم الجوازة، ومكناش متخيلين إن بعد أربع سنين هنكون زرنا 12 بلد سوا منهم بلاد سافرناها كذا مرة!

4-أسماء مودن
سافر الأول بعدين اتجوز.. إذا السفر معلمكش انك تحترم الآخر، فمفيش داعي تضيع وقتك وفلوسك وتسافر.


كل إنسان عنده نمطه الخاص في الحياة. هناك أناس يعشقون السفر ويعتبرونه من الأساسيات. وفي ناس بتسافر فقط عشان البرستيج، وفي ناس السفر ما بيعنيلها. أنا شخصيا من الناس اللي تحب تسافر وحدها وبتستمتع كتير، هو في الحقيقة مش لوحدي بيرافقني في كل سفرياتي بَطريقِي Yoli

أول سؤال ينطرح عليا: انتي غنية، منين بتجيبي فلوس عشان تسافري؟
الجواب جد سهل. كل شخص فينا عنده نمطه الخاص اللي بيعيش بيه. في بنات، بيحبوا يشتروا ذهب. و في بنات بيحبوا الشوبينج. في شباب يحبوا يغيروا موبايلاتهم كل ما يطلع موبايل جديد، بس لو وفرتوا االفلوس رح تعملو أحلى سفرية في حياتكم. وبالنسبة للناس اللي بتحب كثير السفر. إذا السفر معلمكش انك تحترم الآخر، بِغَضّ النظر عن دينه، أو عرقه، أو ميولاته الجنسية، أو أو أو... فمفيش داعي تضيع وقتك وفلوسك وتسافر.
الرسالة اللي بدي أوصلها هي إنه السعادة لا تكمن فقط في السفر والتجوال. إذا كنت مهموما، فالهم سيرافقك أينما حللت وارتحلت. أهم شي انك تكون إنسان متصالح مع ذاتك، وسعيد بحياتك. لأنه السعادة تنبع من الداخل، وليس من الخارج.

5-محمود الحديدي
اتجوز وسافر.. واتبسط واعمل مغامرات. الجواز عمره ما يكون عائق لأحلامك وطموحك


من شهر انا وزوجتي لفينا جنوب سينا بالعربية من القاهرة، وهي اللي كانت سايقه طول الرحلة "دهب - نوبيع - سانت كاترين - رأس شيطان - محمية طابا"، غير الأماكن اللي وقفنا فيها. بداية الرحله لما كنا عايزين نطلع زي أي اتنين عاديين بالباص ولكن قررنا اننا نروح بالعربية. وبالفعل حزمنا أمتعتنا، حضرنا السندوتشات، ونزلنا الساعه 7 الصبح عدينا النفق، وانطلقنا لحد ما وصلنا دهب عن طريق سانت كاترين. داخلنا في طرق كتير جدا تحت الإنشاء وكنا لوحدنا حرفيا لمدة لا تقل عن ٣ ساعات لحد ما وصلنا دهب. مفيش حته مروحنهاش ده حتي دخلنا الجبل بالعربية.

بعد ما خلصنا كل مكان في دهب، وكان اهل البلد مبسوطين اننا رايحين بالعربية اللي بنسيبها في أي مكان مفتوحة ومحدش يقرب منها، لإن جنوب سينا كلها امان بفضل البدو والقبائل. طلعنا علي نوبيع اتغدينا وانبسطنا، وبعدين روحنا رأس شيطان قررنا نبات هناك ليله في مكان فوق الخيال. بعدها كنا هنكمل علي طابا بس لظروف ما قولنا مرة تانية. نقوم نروح لا طبعاً يلا سانت كاترين واحنا راجعيين. وقاعدنا يومين في سانت كاترين في كامب وطلعنا جبل موسي، وزرنا دير سانت كاترين، ومقام النبي هارون، وجبل المناجاة. بس اللي بسطنا مش إننا عرفنا أماكن جديدة وسط سيناء غير اللي نسمع عنها، احنا كمان اتعرفنا علي البدو من قبائل مختلفه وعرفنا اماكن ووديان جديدة في طريقنا. الرحلة دي كلها لمده ٨ ايام كلفتنا بنزين 1100 جنيه فقط لاغير يعني اوفر من المواصلات وأريح.

اللي قالك متتجوزش وسافر غلطان. لا اتجوز وسافر واتبسط واعمل مغامرات. الزواج عمره ما يكون عائق لأحلامك وطموحك وأي حاجه نفسك تعملها، لازم تشجعوا بعض علي كل حاجه الطرف التاني عايزها. مش لازم تسافروا اسكندرية كل سنة اعملو مغامرات تحكوها لأولادكم وأحفادكم قربوا من بعض عن طريق السفر والمغامرة هتفهموا بعض اكتر. 

6-جيهان الإدريسي
سافر الأول بعدين اتجوز.. الواحدة مش هتحط ايديها على خدها مستنيه فارس الأحلام اللي هييجي عشان يسفرها ويلف بها الدنيا

انا غير متفقة مع الناس اللي شايفه الزواج أهم من السفر. ولا مع اللي بتقول سافر ومتتجوزش. لأن ببساطة الزواج رزق والواحدة مش هتحط ايديها على خدها مستنيه فارس الأحلام اللي هييجي عشان يسفرها ويلف بها الدنيا.
اشتغلوا، حوشوا، وسافروا، اتعرفو على ناس جديده، ثقافات جديدة، واكتسبوا خبرات ودروس هتفيدكم في حياتكم. ومش لازم عشان اسافر اختار فندق غالي، أو بلد فيزتها صعبة، انت ممكن على حسب ميزانيتك تنظم بروجرام بسيط ومميز وحاول متسافرش في فترات الاعياد والعطل. ابتدي ببلدك، كل بلد لها جمالها وسحرها الخاص. ولما تحب تتجوز اختار كويس جدا، شوف اللي شبهك، لكم نفس الاهتمامات والاحلام، وكملوا طريقكم مع بعض (عشان متتجوزوش وتنكدوا على بعض بعد كده)

7-أحمد السمان
اتجوز وسافر..  لما تعامل مراتك علي إن هي صاحبك اللي لما تحب تتجنن هتتجنن معاه، صدقني فكرتك السلبية عن الجواز هتتغير.


من ٦ سنين كانت أول سفرية أعملها لوحدي بالكامل، وكانت أول تجربة شنجن ليا، قبل الـ ٦ سنين بشهر قررت أنا ومراتي نقدم علي الشنجن، بعد تجربة الرفض في سفارة أمريكا، وبعد التقديم في سفارة إسبانيا كنا حاجزين رحلة لشرم الشيخ في شهر يناير، وقلنا لما نرجع بقي نبقي نستلم الجوازات من السفارة، لكن اللي هي ما كانتش تعرفه وقتها إن الجوازات أنا استلمتها وكان عليها التأشيرة. من هنا قررت ألغي رحلة شرم واستبدلها بمدريد من غير ما هي تعرف، ولأن تاريخ الرحلة كان يوافق عيد ميلادها ، فحسيت إن دي أحسن مفاجأة ممكن أعملها ليها. ابتديت اشتغل علي الخطة الجديدة، روحت مكتب مصر للطيران وقعدت أسأل علي تواريخ أنا كنت عامل عليها سيرش قبل ما اروحلهم، وفعلاً لقيت عرض ساعتها ب 2300 جنيه للتذكرة، ويصادف إن في الوقت ده واحد صاحبي كان شايل معايا فلوس سيراميك شقته اللي بيشطبها للجواز، كلمته وسألته إنت محتاجهم بعد قد ايه؟ قالي بعد شهر، قمت دافعهم وحاجز التذاكر في ساعتها وانا مش عارف هسددهم منين.

يوم السفر دخلنا المطار وهي كل ده فاكرة إن إحنا رايحين شرم الشيخ، وبتشاورلي علي مكان دخول الرحلات الداخلية، وأنا أقنعتها أن لأ، طيارتنا من الناحية التانية، وهي بينها وبين نفسها بتقول هو مش عارف يعني ايه Domestic ولا إيه؟ خليتها دخلت التفتيش قبلي وقلتلها هاتي الشنطة، في الوقت ده كان أمين الشرطة بيسألني مسافر فين، وانا برد عليه وانا قافل شفايفي عشان ماتخدش بالها وبقوله مدريد، طلب مني الجوازات، قمت مديها ضهري وطلعتهم من الجاكيت في الوقت اللي هي كانت بتاخد حاجتنا من علي السير، ودخلنا وقفنا في طابور الcheck-in كان ساعتها شغال لكذا رحلة من ضمنهم مدريد، وهي تبص علي الشاشة وتسألني بس هنا مش مكتوب شرم، وانا اقولها اصل اللوحة بتتبدل كذا رحلة أنا شفتها. 
لحد اللحظة بتاعت الcheck-in والموظف بيسألني مسافرين فين قلتله مدريد، لقيتها بكل عفوية بتقوله لا لا إحنا شرم، وبعدين بتبص لي وتقول لي إيه مدريد دي، قمت مطلع الجوازات مسلمها له، لقيتها بتبص للجوازات وبتقولي ايه اللي جاب دول هنا فطلعت برنامج الرحلة اللي كنت طابعه وكاتب علي أول صفحة فيه كل سنة وانتِ طيبة، وأجهشت في البكاء.

حالة من العياط الممزوج بضحك، والموظف بيتفرج علينا وبيقول في نفسه إيه العالم الهبلة دي، وفتحتلي محضر الجوازات دي جت ازاي وحجزت امتي؟ يعني احنا دلوقتي مش رايحين شرم؟ طيب رحلة شرم راحت فين؟ يعني انا دلوقتي مسافرة إسبانيا؟ وطلعت التليفون وبدأت تكلم أهلها ومعارفها، يابا انا مسافرة إسبانيا يابا (بصوت هنيدي). والحظ خدمنا وإحنا هناك، وكان في ماتش بين ريال مدريد وبرشلونة وعرفنا نجيب تذاكر، وهي كانت مشجعاني عشان بتشاركني اهتمامتي وحضرت معايا أهم ماتش في العالم من الاستاد.

الفكرة ان في رجالة ممكن تشوف ده أوڤر، بس انا شايف ان المفروض ده يكون هو الطبيعي. لما تعامل مراتك علي إن هي صاحبك اللي لما تحب تتجنن هتتجنن معاه، صدقني فكرتك السلبية عن الجواز هتتغير، و من ساعتها لحد النهاردة سافرنا مع بعض ١٣ دولة.

8-يحيى ماجد 
سافر الأول بعدين اتجوز.. تكون كسرت الرهبة اللي جواك وخرجت بره الصندوق وعرفت فعلا انت عايز ايه.

 سافر لوحدك الاول واتبسط واتشقلب واعرف ناس جديدة، جايز تكون فتاه احلامك وسطهم، خد كفايتك ومتعتك من السفر علي الاقل تكون كسرت الرهبة اللي جواك وخرجت بره الصندوق وعرفت فعلا انت عايز ايه، و بعدها اتجوز و سافر تاني مع اللي بتحبها، اكيد السفر مع شريكه حياتك هيكون رائع، بغض النظر عن انه مكلف الضعف (بس ربنا بيكرم)، علي الاقل هتكون فاهم الدنيا ماشيه هناك ازاي من الخبرة اللي عندك، مش هتبقي لبخة، وعشان لو لبست في جوازه من بتاعت خد كيس الزباله وانت نازل ومتنساش البامبرز تكون فعلا حققت جزء من bucket list بتاعتك.

 

9-أمنة أبو شيبا
اتجوز وسافر.. إنك تعمل عيلة وتشارك معاهم جميع لحظاتك المزيانة حاجة حلوة برشا.

ممكن تجمع المال، تتجوز، تخلف، وتسافر عادي. إنك تعمل عيلة و تشارك معاهم جميع لحظاتك المزيانة (الحلوة) حاجة حلوة برشا ومختلفة، السفر وحدك ليه نكهة لكن ممل، والسفر مع الأصدقاء كمان ليه نكهة لكن ممكن يجيب جلطة اذا اختلفنا في البرنامج أو في المواضيع المصيرية شبه (وين نقعدو؟؟ وين ناكلو؟؟ وين نمشيو، ناخذو وسيلة مواصلات أو نتمشى؟؟). الحوارات والاختلافات هاذي ما تصيرش وقت تسافر مع عايلتك الصغيرة، لأنكم عايشين مع بعضكم و فاهمين طباع بعضكم

بالنسبة للسفر مع بيبي، فاحتياجات البيبي معروفة:
1- النوم، لازم ينام في أوقاته اللي متعود ينام فيها، يعني انت لازم تبرمج يومك على هذا الأساس. مثلا بنتي تصحى 8 نروح نتمشى ونفطر، بعدها ترجع تنام من 11 ل 12:30 و بعدها يبدأ يومنا ونزورو المناطق السياحية.

2- عربة البيبي مهمة، و الأفضل تكون عربة رخصية و خفيفة، لأن البيبي محتاج ينام أحيانا، إضافة للbaby carrier. لو بيبي صغيرالأكل، والشرب، والحليب، الأحسن يأكل وجبات صغيرة 6 مرات في اليوم، قطعة خبز، موز، تفاح، بسكويت.

3- اللعب، البيبي لازم يلعب، لو بيبي يحبي خليه يحبي حتى لو في الشارع عادي. بعدها نظفولوا ايديه بمناديل او بمطهر، و لو يمشي خليه يتمشى ويلمس أي حاجة من غير عقد هكا البيبي يكون عنده مناعه أكبر، المهم اتمشى جنبوا وراقبوا لو ما لعبش أكيد هيعيط. الموضوع مش محتاج مجهود، هو مع الوقت هيكون روتينك الطبيعي و يسهل عليك التعامل مع البيبي.

 

10-نسرين عز
سافر الأول بعدين اتجوز.. احلى سفرية عندي كانت مع نبع الحنان.

 

قبل الجواز سافري مع امك. أنا جربت السفر مع صحابي وسافرت لوحدي بلدان كتير. بس احلى سفرية عندي كانت مع نبع الحنان. الأم دي كانت معانا في فرحنا و تعبنا. اول شخص هبقى عاوزة انبسط معاه، ألف، اضحك، أسهر، وآكل هي امي. قبل ما تدخلي القفص الذهبي استغلي الفرصه إنك سنجل و سافري مع والدتك اللي لحظة بس معاها ما بتتعوضش.
 السفرية دي كانت مفاجاة ليها، أخدت تيكيت وكل حاجه وقلتلها قبل معاد الطياره بيومين. مصدقتنيش غير لما بعت لها تيكيت. عشان عندي إخواتي صغار دايما، لما بتجيلها فرصه تسافر معايا، بتتحج بيهم وأنا كنت حاطه في دماغي عاوزه اسافر مع امي ولو مرة في العمر، انا وهي بس. فرحة مع صدمة الحمد لله عدت على خير. عمري ما شفت امي ناسية الدنيا وهمومها وبتضحك طول اليوم غير لما سافرنا مع بعض. ربنا يقدرني و أشتغل وأسفرها لأماكن تانية في الدنيا، ويبعتلي ابن الحلال أسافر معاه ومع أمي وأمه، وننبسط كلنا مع بعض مرة واحدة.

 بعد الكلام ده مفيش حجة، هم مش أبطال ولا خارقين، هم بس بصوا للجواز على إنه مش عقبة ولا قفص هيخنق ويغير الحياة، بالعكس، هم استغلوا الجواز عشان يشاركوا شغفهم وحبهم للسفر مع الشخص اللي بيحبوه، وده طبعا ضاف لمغامراتهم كتير، وخلا التخطيط أسهل لأنه مقسوم على اتنين. أعتقد الخلاصة إنه سافر قبل ما تتجوز واستمتع واكتشف نفسك والدنيا، ولما تتجوز شارك كل ده مع حد تاني.