share this article

من كام سنة حصلت حادثة مع حد من المدونين المشهورين في عالم السفر؛ اتعرض لسرقة في دولة من دول شرق أوروبا وعمل حملة هجومية كبيرة جداً ضد الدول دي، وفجأة بقى فيه تريند بيقول متروحوش يا جماعة دول شرق أوروبا عشان كلهم همج وحرامية، حتى المجر بقى اسمها "الغجر"!! وأنا الحقيقة من أنصار التريند المضاد اللي بيقول إن كل مكان في العالم وارد تحصل فيه حوادث سرقة أو عنصرية أو أي موقف من المواقف اللي مش مستنياك تسافر عشان تحصلك! ممكن تحصل تحت بيتك عادي!

وبناء عليه قررت أضم بودابست لجولتي الأوروبية، عشان تكون آخر محطة في الرحلة ولسبب اقتصادي بحت الحقيقة؛ وهو إنها المدينة الوحيدة اللي لقيت منها رحلة طيران رخيصة لمصر.

بودابست مدينة عتيقة بشكل جميل، شكل الشوارع وتقسيمتها والكباري الكتير اللي فيها، وأول حاجة بتعرفها عن البلد إنها مقسومة اتنين "بودا" و"بست" وبيفصل بينهم نهر الدانوب، ده لأنهم في الأصل كانوا مدينتين مستقلتين قبل ما يتلم الشمل ويبقوا بودابست، وإنت ماشي هتلاقي الشوارع اللي بتبقى أرضيتها صخر أو حجر؛ شوارع طالعة ونازلة بمنحدارت عالية، والمباني اللي كفاية أوي تمشي وتتفرج عليها؛ أشهرهم وأول حاجة هتشوفها هو مبنى البرلمان؛ المبنى اللي قعدوا 17 سنة يبنوه لحد ما التحفة المعمارية دي اكتملت سنة 1902، ورغم إنك هتشوفه كتير إلا أنه من كل زاوية هتلاقي متعة خاصة، من على مركب في نهر الدانوب غير لما تشوفه من الجنب وغير لما تشوفه من قريب بكل تفاصيله، وغير أكيد لما تشوفه من جوه، بس خد بالك إنك لازم تحجز من بدري جداً وهتلاقي جولات سياحية كتير أونلاين سعرها بيبدأ من 7000 فورنت مجري (تقريباً 380 جنيه).

الحلو في بودابست إنها مدينة صغيرة والدنيا فيها ملمومة ورخيصة، وسهل تتحرك سواء بالأتوبيس أو المترو أو مشي بين المزارات القريبة من بعض، كمان فيه فسحة لوحدها تقدر تعملها بالترام كإنك بتعمل hop-on-hop-off بس جوة الترام اللي طريقه معظمه على كورنيش نهر الدانوب، هيخليك تاخد فكرة عامة عن المدينة وتتفرج أو تنزل في المحطات اللي إنت عايز تستكشفها.

نصيحة عالماشي: احجز تذكرة لرحلة نهرية ومفيش أكتر منها هناك؛ هتلاقي كل الاختيارات والأسعار على مواقع كتير تحجز منها قبل ما تسافر، وممكن تكون رحلة فيها عشا أو غدا حسب وقتها من اليوم، أو رحلات تذوق أكل مجري .. الاختيارات حقيقي كتير وترشيحي الشخصي لأي رحلة وقت الغروب، جو تاني خالص!

بالنسبة للإقامة بقى؛ أنا شخصياً اخترت couchsurfing لمزيد من الإثراء لتجربتي الشخصية وإني أقابل ناس هناك، بس الهوستلز كتير جداً وسهل أوي تلاقي حاجة في وسط البلد قريبة من كل حتة وبأسعار بتبدأ من 120 جنيه في الليلة مثلاً.

ابتديت رحلتي بزيارة السوق الشعبي الكبير Great Market Hall .. أنا واحدة أول ما أوصل أي مكان أحب أشوف الـlocal market أو الأسواق الشعبية في المدينة دي، وده فعلاً أول مكان دوّرت عليه وروحته، عبارة عن دورين وفي الدورين دول كل حاجة من أول الفاكهة والخضار والأسماك الطازة بكل الأشكال والألوان والأحجام، لحد المفارش والديكورات المنزلية والمنتجات اللي عاملينها الستات بإيديهم، والجميل فيه إن التمشية لوحدها كفاية مش محتاج تشتري حاجة، مع إنه الموضوع مغري جداً وحلو كمان تاخد منه هدايا وحاجات تذكار وإنت ماشي ليك أو لأصحابك .. أكتر حاجة منتشرة ومعروفة إنها عليها "ختم بودابست" هي الشطة؛ مدمنين شطة، خدلك برطمان وإنت ماشي! وكمان العرايس الخشب الملونين، شبه بتوع روسيا بس دول مش بيتحطوا جوة بعض، كل عروسة مستقلة بذاتها.

مصدر الصورة: Flickr / Graham Vulliamyمصدر الصورة: World Travel Guideمصدر الصورة: heyyoupackedthecamera

بعد السوق وعلى بُعد 20 دقيقة مشي (أو محطتين مترو)؛ رحت كنيسة سانت ستيفين St. Stephen's Basilica، من الأماكن اللي متتفوتش هناك من أول المبنى نفسه برة، وبعدين كمية المنحوتات والزخارف الدهبي اللي على الحيطان وعلى السقف وفي كل مكان حواليك، ودخول الكنيسة نفسه ببلاش بس عشان تطلع فوق وتشوف منظر بانورامي لبودابست؛ هتحتاج تدفع تذكرة بـ500 فورنت مجري يعني 35 جنيه تقريباً، ورغم إن بودابست فيها أماكن كتير تقدر تشوف منها منظر بانورامي من فوق بس نصيحتي الشخصية إن متفوتش ولا واحد فيهم! كل مرة هتشوفها بشكل مختلف، غير إن المكان فوق مبيبقاش فيه زحمة سياح؛ الزحمة كلها بتبقى في الكنيسة نفسها.

مصدر الصورة: askideas

20 دقيقة مشي تاني من الكنيسة مع العبور على واحد من أشهر وأحلى الكباري في بودابست؛ كوبري سيشيني، فاكرين التريند بتاع كيكي؟ اللي خلى الناس كلها تنزل من عربياتها ترقص في الشارع، وبعدين جيه ويل سميث قرر يعلّي على الكوكب كله ويطلع سطح كوبري في بودابست يعمل تحدي كيكي هناك؟ هو ده بقى كوبري سيشيني، من أشهر المزارات في بودابست قبل وبعد ويل سميث الحقيقة.

بالمناسبة برضه كل اللي بيوصّل بين بودا وبست هما كباري كلهم أحلى من بعض، يمكن سيشيني بس الأجمد؛ بس أنا شخصياً بقيت في الرايحة والجاية اعمل حسابي كل مرة أعدّي من كوبري مختلف في سكتي.

مصدر الصورة: wheretostayinbudapest

وصلنا بعد سيشيني لحصن الصياد Fisherman's Bastion، مكانش عايش فيه صياد ولا حاجة بس اتسمى كده لأن الصيادين هما اللي كانوا مسئولين عن حماية الجزء ده من المدينة، ورغم إن الحصن معمول بطراز معماري كإنه من العصور الوسطى لكن هو اتبنى في القرن الـ19، والناس بتروحله مخصوص عشان حاجتين؛ أولاً عشان تتفرج على تفاصيل المبنى والـ7 أبراج اللي فيه بالتماثيل والتحف الفنية، بيعتبروه متحف في الهواء الطلق، وتاني حاجة وتالت ورابع وعاشر عشان الفيو، ده اللي بيخليه زحمة جداً وقت الغروب، بس كمان بالليل بيبقى المكان يجنن وإنت شايف المدينة كلها من فوق منوّرة وساحرة! آه والدخول ببلاش .. إلا لو حابب تطلع التراس العالي اللي فوق ده بس اللي بتذكرة.

مصدر الصورة: afar

تاني يوم ابتديته بقلق شوية لأن الدنيا غرقت مطر فجأة، بس عندهم عادي الحياة بتستمر مع المطر، شمسيتك في إيدك أو الـrain coat معاك وانزل وعيش يومك عادي، وبالفعل انطلقت إلى قلعة بودا اللي برضه كانت على بُعد ربع ساعة من مكان إقامتي، وطول الطريق مطر على دماغي وعلى ما وصلت الحمد لله المطر وقف؛ الشمس طلعت والدنيا آخر جمال!

من ضمن الحاجات اللذيذة عند قلعة بودا؛ الفونيكولار Funicular اللي هو عامل زي الأسانسير بس بيطلع بالجنب وبيمشي على سكة حديد متعلقة، فيو تاني عالماشي في سكتك كده مع إن فوق فيه مختلف أنواع الفيوهات البانورامية بس لأ برضه خد واحد زيادة ميخسرش!

القلعة نفسها صرح ضخم جداً من العصور الوسطى بجد بقى مش تصميم مستوحى وخلاص، زمان كان فيها القصر الملكي اللي عاش فيه كل الملوك اللي عدّوا على المجر، لكن دلوقتي بقت مقر المتحف الوطني المجري.

دخول المتحف بتذكرة بـ2400 فورنت (حوالي 130 جنيه)، بس القلعة وكل الساحات ذات المساحات الشاسعة اللي فيها دخولها مجاناً؛ ومفتوحة على مدار اليوم وده مخليها مزار حلو للتمشية في أي وقت من اليوم، وكمان فيه جزء كله أشجار وغابات صغيرة ناس بتستغلها عشان تعمل hike بسيطة كده بدل ما تطلع سلالم القلعة أو الفونيكولار.

مصدر الصورة: goodfon

النص التاني من اليوم كان في دار الأوبرا، واللي لما كنت لسه في مرحلة التخطيط عرفت إن فيه جزء منها مقفول وبيتجدد، المهم كان من ضمن النصايح اللي خبراء السفر بيقولوها إن مبنى الأوبرا هناك على أد ما هو حاجة محصلتش في تاريخ مباني الأوبرا في الكوكب؛ إلا إنه كمان الباليه هناك وعروض الأوبرا جميلة وهتخليك تعيش تجربة كاملة متكاملة في الأوبرا مش بس تتفرج على المباني وتمشي، وقد كان .. حجزت تذكرة لعرض باليه تصادف إنه لواحد من أفلامي المفضلة Billy Elliot وهو فيلم إنجليزي عن ولد صغير بيحب رقص الباليه؛ والفيلم بيتكلم كمان عن إضراب عمال المناجم في إنجلترا في التمانينات، كل ده بقى من خلال عرض باليه؛ وأينعم العرض باللغة المجرية بس بيبقى فيه شاشة فوق المسرح عليها ترجمة إنجليزي.

مصدر الصورة: CNN

بعد الأوبرا .. قلعت الكعب العالي ورجعت تاني للكوتشي؛ ورحت استكشف السهر في بودابست بما إننا في دخلة ويك إند والبلد كلها هتبقى في الشارع حيث الـpubs والـnight clubs، شايفاك ياللي عينيك لمعت وافتكرت صاحبك اللي راح هناك ورجع قالك بودابست من أحلى أماكن السهر في أوروبا، حقيقي فعلاً مكدبش، أنا رحت شارع بحاله اسمه ممر جوزدو Gozsdu Passage من أوله لآخر فيه ما لذ وطاب من الأماكن، كل أنواع المزيكا حسب مزاجك؛ أماكن غالية وأماكن نص نص وأماكن في الرخيص، أخدت الشارع من أوله لآخره تمشية من باب الفضول والعلم بالشيء وفي الآخر قعدت في مكان متوسط الصخب شوية عشان أنا واحدة لسه خارجة من الأوبرا وفيه راقصين باليه جوة دماغي!

مصدر الصورة: singletripadvisor

بس بعيد عن السهر بقى أنا شخصياً أفضّل حاجة تانية ألا وهي الأكل .. الأكل في بودابست كان من ضمن الحاجات اللي انبسطت بيها أوي لأنه كان فرصة إني أجرب أكل جديد بس مش بعيد أوي عن سكة الأكل اللي احنا متعودين عليها، يعني من ضمن الأكلات الشعبية المشهورة عندهم المحشي كرنب!! بس طريقته مختلفة شوية وطبعاً لازم شطة، شطة قليل أو شطة كتير المهم تكون موجودة!

وميمنعش من مفاجآة على الماشي مع طبق تقليدي تاني عندهم اسمه "جلّاش"، وقد يعتقد المواطن وهو بيبص على المنيو إنه إيه ده الله عندهم محشي كرنب زيينا وجلاش زيينا! ولكن يتضح إنه جلاش ده هو عبارة عن لحمة بالصلصة، بس ممكن يبقى عليه خضار أو بطاطس تحديداً.

مصدر الصورة: A Family Feast

الحلويات هناك اللي لذيذة وأشهرهم طبعاً الشيء الحلزوني اللي بنعرفه من الصور على طول chimney cake أو kurtos kalacs وبتلاقيه هناك كل 10 متر زي بياعين غزل البنات عندنا كده، أحلى حاجة في الموضوع إنك تقف تتفرج على البياع وهو بيلف العجينة على السيخ ويشويها، وبعدين يحط السكر والقرفة، وعلى حسب بقى ممكن تاكلها كده أو يحطلك حشوة جواها.

مصدر الصورة: Pinterest

هاا .. فاضل ايه تاني؟ هو فاضل حاجات كتير ممكن تتعمل هناك، وكل الحاجات اللي فوق دي أنا عملتها في يومين، وماشية بالعافية حاسة إني كنت محتاجة أزود يومين كمان عالأقل، بس أكيد مش هتكون آخر زيارة وأكيد أكيد عرفت دلوقتي إني كنت صح لما قررت مسمعش حُكم مش منطقي اختصر بلد وناس وأماكن في موقف واحد.