share this article

الموضوع ده اتنشر لأول مرة على مشروع سفر، ويعاد نشره في Safareya بالإتفاق مع إدارة الويب سايت.

سنغافورة بلد مشهورة بنظافتها الشديدة ومعدل الجريمة المنخفض جدًا، في نفس الوقت فيه ناس بتسميها “Fine City” أو بلد الغرامات، بسبب كمية القوانين اللي بتخليك تدفع غرامات على كذا حاجة. لو إنت مسافر سنغافورة ماتخافش من الكلام ده لكن إعرف الحاجات اللي بيعاقب عليها القانون هناك، لأن في حاجات كتير تُعتبر عادية في مصر لكن هناك بيعتبروها تعدي على القانون وممكن تلاقي نفسك بتدفع غرامة.
دي بعض القوانين الغريبة اللي لازم تاخد بالك منها:

1 -غرامة ألف دولار على اللبان!
اللبان زي المخدراتمصدر الصورة: veracode
اه والله، اللبان هناك ممكن يتعامل معاملة الحشيش هنا. ممنوع إنك تدخل أي نوع لبان البلد وإنت جاي من المطار ولو اتمسكت بكمية لبان كبيرة ممكن تدفع غرامة 1000 دولار، طبعًا مستحيل حد يمسكك وإنت بتاكل لبانة ويدخلك السجن، بس لو اتمسكت بتبيع لحد لبان هتدفع غرامة كبيرة أو تتسجن. الموضوع ده جه بعد ما السنغافوريين كانوا بيلزقوا لبان في كل حتة، فلما اشتغل المترو بتاعهم اللي كلفهم 5 مليار دولار ولقوا ناس بتلزق لبان في المترو قرروا إنهم يمنعوا بيع اللبان في البلد كلها. 

2- هتدفع 20 دولار غرامة لو عديت الشارع من مكان مش مخصص للتعدية

زي ماهتلاقي في كل بلاد العالم المتقدمة، في مكان مخصص للمشاة عشان يعدوا، رغم إن مش كل البلاد بتدقق أوي في إنك لازم تعدي من المكان المخصص للمشاة، لكن في سنغافورة الموضوع مافيهوش هزار. ممكن تدفع غرامة 20 دولار على جريمة زي دي هناك.

3- لو ماشدتش السيفون هتدفع غرامة 150 دولار

صدق أو لا تصدق، لو نسيت تشد السيفون وحد خد باله هتضطر تدفع غرامة 150 دولار. الكلام ده في الحمامات العمومية أو حمام المطاعم والخدمات، فما بالك لو كنت مزنوق مثلًا وقررت تصرف نفسك في الشارع. الموضوع ده بيطبق عن طريق عناصر من البوليس متخفيين وممكن يشوفوا الحمام بعد ما تستخدمه. في واحد سنغافوري عمل حاجة إسمها منظمة المرحاض العالمية، لتعليم الناس أهمية نظافة المراحيض.

4 - من حق السلطات السنغافورية تعملك تحليل مخدرات في أي وقتمصدر الصورة:ST FILE
من حق السلطات السنغافورية إنهم يعملوا تحليل مخدرات لأي مواطن أو سائح جوة البلد بدون تفرقة بين مخدرات خدتها وإنت في بلدك أو في سنغافورة، فحاول تبعد عن أي نوع مخدرات قبل وأثناء السفر.

5 - الأكل والشرب والتدخين والتصوير في المترو

ممنوع تاكل، تشرب أو تدخن في المترو وكمان ممنوع تاخد صور. من الآخر ممنوع تعمل أي حاجة وإنت في المترو غير إنك تدخل وتستنى المحطة بتاعتك عشان توصل المكان اللي عايز تروحه.

6 - غرامة 300 دولار لو رميت حاجة في الشارعمصدر الصورة: emaze
الحكومة بتحاول تحافظ على شهرة البلد بكونها بلد نظيفة جدًا، فبالتالي لو رميت حاجة في الشارع لأول مرة واتمسكت، هتدفع غرامة 300 دولار وده لو رميت سيجارة أو ورقة شوكلاتة، أما لو رميت حاجة أكبر زي كانز بيبسي مثلًا، هتعتبر جريمة أكبر من إنك تدفع عليها غرامة وهيتحددلك معاد في المحكمة. 

مش معنى إن البلد فيها قوانين غريبة إنك ماينفعش تزورها، كل اللي عليك تعمله إنك تاخد بالك من القوانين دي وإنت مسافر وتحترم عادات البلد عشان تتجنب المشاكل، وكل بلد هتزورها هتلاقي فيها كام حاجة هتعتبرها غريبة بالنسبالك لكن بالنسبة لسكان البلد هي قوانين عادية كلهم ماشيين بيها كل يوم.