share this article

كلنا متوقعين إننا لما نرجع لحياتنا الطبيعية بعد الحظر في حاجات هتكون اتغيرت، مش هتفضل زي ما هي، ده فيه ناس فينا بدأت تاخد على قعدة البيت دي ومش عارفين هيرجعوا تاني ينزلوا ازاي، احنا طبعا مش عارفين الوضع ده هينتهي امتى وعلى إيه بس كلنا بنحاول إنه ينتهي بأقل خساير واننا نتأقلم على الحياة بعده أو في ظل الكورونا.

من الحاجات اللي هتتغير بشكل كبير هي السفر، على ما كل البلاد تفتح تاني، وطبعا حركة الطيران ترجع، الموضوع هياخد وقت، وعلى لما نتعافى من كل الخسائر الإقتصادية اللي حصلت ونلاقي طرق نعرف نعوضها ونتغلب عليها هناخد وقت، وعشان يبقى السفر حاجة آمنة تاني شركة Aviointeriors شركة إيطالية لتصمبم الطيارات من جوا، عملت مقترحين لشكل الطيارات مع الكورونا، الهدف منهم سلامة الناس وتحقيق التباعد الإجتماعي، المقترح الأول إن يتركب بين الكراسي حواجز بلاستيكية شفافة، يعني الكراسي في وضعها الحالي الطبيعي جدا ونركب ما بينهم الحواجز دي، المقترح ده إسمه "Glassafe".

المقترح التاني وده محتاج حبة تخيل شوية، الطيارة بيكون فيها 3 كراسي، كرسي جمب الشباك وكرسي على الممر وكرسي في النص، سيب الممر والشباك زي ما هم تعالى بقى للكرسي اللي في النص، هيعملوا فيه إيه هيقلبوا الكراسي اللي في النص، يعني هتكون عكس الكرسين التانين، فالصف اللي في النص كله هيكون راكب بالعكس، ومش بس كده هيحوطوا حواجز شفافة عشان النفس، أو لو حد كح عطس أو بيتفتف وهو بيتكلم يكون كل ده معزول عن الركاب اللي حواليه، الحواجز دي سهلة التنضيف، المقترح ده اسمه "Janus" المقترحين دول في طريقهم لبراءة الإختراع وتطبيقها.

المصدر: Matador Network