share this article

الوقت ده من السنة هو الوقت اللي كل المسافرين بيستنوه عشان بناء على كل المعلومات اللي بتطلع من مجلات ومواقع السفر وقوائمهم وترشيحاتهم للدول والمدن اللي المسافرين لازم يزوروها في 2020؛ بيقدروا يكوّنوا خطط واضحة عن الأماكن اللي مينفعش تتفوت، خصوصاً لو حصل عليها إجماع أو ظهرت في أكتر من ليستة.

المصدر: The National

من ضمن القوائم دي قائمة Condé Nast Traveller لأفضل الوجهات للأجازات في 2020، واختاروا الرباط في المغرب عشان تكون رقم 17، اللي مش بس تبقى عاصمة المغرب لكن كمان اليونسكو أعلنتها كموقع للتراث العالمي، الرباط مدينة أحدث شوية من مراكش لكنها كمان أهدى وزحمتها أروق من كازابلانكا، بس من أجمل معالم المدينة هي الحدائق الأندلسية والشواطيء، الجميل كمان إن ده مش أول ظهور للمغرب في قوائم 2020 لكن كمان كانت ضمن قائمة Lonely Planet وقائمة Euromonitor، فواضح كده إن المغرب لازم تتزار في 2020.

المصدر: The National

أما بيروت واللي من فترة قريبة قدرت إنها تكون في أول قائمة CNN لأهم 100 مكان لازم تزورهم في 2020، جات في المرتبة الـ13 في ليستة Condé Nast Traveller، ومهما قعدنا نحكي في جمال لبنان مش هيكفي، أصل تاريخ وآثار هتلاقي، طبيعة وجمال أعتقد دي حاجة واضحة مش محتاجين نتكلم عنها، فن وثقافة، يعني لغاية دلوقتي بيملوا الدنيا كلها بفنهم، شياكة وذوق ولباقة وشعب مفيش أهضم من هيك، وكل ده محطوط في خليط من الأديان والمعتقدات مخلي التجربة كلها أغنى وأحلى، يعني أكيد لبنان لازم تكون ضمن القائمة دي من غير تفكير.

من الدول التانية بقى كيرجيزستان كانت في المركز التالت ودي برضه مش أول مرة تكون فيها في قوائم مجلات السفر والمواقع لـ2020 لأن هي كانت الأولى في قائمة Lonely Planet، الأولى كانت باكستان.

المصدر: Condé Nast Traveller