share this article

خلينا متفقين إن أكتر حاجة الموظف بيدور عليها بعد المرتب هي الأجازات، ونفسه يكون الشهر فيه أجازة أكتر من الشغل نفسه لوعليه. بس الأجازات دي صراع دائم بيكسبه الأذكى اللي بيعرف يظبط أجازاته ويطلبها امتى وازاي، أوعى تكون فاكر الموضوع سهل لا ده محتاج تخطيط وترتيب وحنكة في التنفيذ، ما هو مش أي وقت نخش للمدير نطلب أجازة. لكن لو أنت معندكش المهارات المطلوبة فالقدر السنة دي واخد صفك وإحنا كمان هنساعدك ونقوللك مقدمًا على كل الإجازات والأيام اللي هتحتاج تقدم عليها عشان تتحول لموظف فرفوش.

في قواعد لازم نتفق عليها من الأول:

  • أي يوم اثنين أجازة بتاخد الأحد معاه.
  • أي يوم أربعاء أجازة بتاخد الخميس معاه.
  • أي يوم ثلاثاء أجازة بيكون قدامك الإختيار ما بين أنك تاخد أربع وخميس، أو أحد واثنين.
  • أي مناسبة جاية في يوم أصلا أجازة، بنستنى تتعوض بيوم أحد أو خميس فياريت تكون نيتك صافية.

نبدأ بقى في الجد، بص يا سيدي نسخن كده في يناير عالهادي، أول حاجة 7 يناير (عيد الميلاد القبطي) جاي يوم اثنين فممكن تاخد الأحد أجازة و كده من أول أسبوع في السنة معانا أربع أيام أجازة من غير أي مجهود. بعد كده 25 يناير جاي يوم جمعة وكلنا أمال عريضة يتعوض بخميس أو أحد أهو ينوبنا أي جانب من أي حاجة.

سيبك من فبراير ومارس معلش وركز بقى على أبريل. معاك يوم 25 (عيد تحرير سيناء) جاي يوم خميس طبعا أنت في سرك دلوقتي قولت هاخد أنا الأحد، برافو عليك بس في مفاجأة أن الإتنين كمان أجازة لأنه شم النسيم أنت بقى هتزود كمان يوم الثلاثاء والخميس لأن الأربع أجازة 1 مايو عيد العمال وكده تبقى من الخميس 25 أبريل لغايت الجمعة 4 مايو واخد 10 أيام بتوعك. إلحق بقى قدم على فيزا واحجز تذاكر طيران من بدري وسافر 10 أيام في أي مكان.

بعد الأجازة الجميلة دي مايو هيمر مرور الكرام ويونيو هيرجع الدلع مع دخول جميل بالعيد الصغير من الثلاثاء 4 يونيو لحد الخميس، فنعتبر الجمعة والسبت عيدية مقبولة ونبقى طلعنا ب5 أيام إجازة وإحنا قاعدين عادي لكن بما إن البحر يحب الزيادة ممكن تضربلك أحد واثنين قبليها ويبقوا 9 أيام بدل 5. في كمان 3 أيام اجازة في أخر الشهر بما أن 30 يونيو جي يوم أحد.

23 يوليو جاي يوم تلات، لو أنت قريت القواعد اللي في الأول هتعرف أنت هتعمل ايه، بس الفطرة بتقول دلع نفسك وألضم الثلاثاء مع الويك إند سواء بيومين قبليه أو بعديه وتبقى من يوم واحد أخدت 5 أيام إجازة وعملت من فسيخ يوم التلات شربات.

أغسطس هيكون طويل وممل زي كل سنة وماشي ببطء وكل الدنيا بتجري من حواليه لحد يوم السبت 10 وقفة عرفات، أيوة فيها 5 أيام أجازة بس تفتكر هنسكت؟ لا طبعا، أنت هتاخد الخميس اللي بعد العيد وكده يبقى قفلت 8 أيام وكمان الجمعة اللي قبل الوقفة يبقى الحمد الله طلعنا بتسع أيام وأنت ومزاجك تقضيهم العيد فرحة أو تفكس لمدام صفاء أبو السعود تماما وتسافر وبلاش تسافر في مصر عشان هتلاقي العيد فرحة في كل حتة فبكرامتك حضر فيزا وتذاكر وكأنك بتدي نفسك عيدية. واضح أن أغسطس حس بالذنب فبيحاول يحسن صورته معانا وفي أخره كمان رأس السنة الهجرية بس يوم سبت فياريت يلحق نفسه ويتعوض بأحد.

سبتمبر هيعدي عادي من غير أي شخلعة. 6 أكتوبر جاي يوم أحد فخدلك long weekend لذيذ أهو. وأخر حاجة المولد النبوي الشريف يوم السبت 9 نوفمبر وبحسب القواعد فوق كلنا أمال عالية أنه يتعوض ويبقى long weekend لذيذ هو كمان. ديسمبر نلحق بقى نعمل بلقمة عيشنا قبل السنة ما تخلص.

كده أنت أخدت 9 أيام من أجازاتك ففاضل 12 تتشقلب فيهم براحتك. بس في الواقع أنت معاك 45 يوم أجازة دا غير ال weekends اللي مش في الأجازات دي. تقريبا كده يطلعوا بتاع 100 يوم تاني، يبقى كده بنتكلم في أكتر من تلت السنة أجازة.
دلوقتي بقى دي النتيجة كاملة بكواليتي الطباعة تقدر تطبعها، وتلزقها في مكتبك أو في أوضتك أو على التلاجة، عشان يبقى فيه حاجة قدام عينيك بتفكرك دايما بإنك محتاج تسافر، أنت مدين لنفسك بده!