share this article

مشهد سينمائي لراجل ببدلة وبالطو طويل قاتم؛ ومعاه شنطة سمسونايت وأوراق وماشي في المطار، وأول ما يطلع الطيارة المضيفة تقابله بإبتسامة وتاخد البالطو ولما يقعود يكون في كاس شامبانيا بيتقدمله على ما هو يخلص المكالمة المهمة، طبعاً دي درجة رجال الأعمال، وكلنا عندنا الحلم ندلع نفسنا في رحلة ونعيش الحياة دي، بس العين بصيرة والإيد قصيرة.

بس دلوقتي جزء من الحلم ده بقى ممكن لأن مصر للطيران عملت كراسي جديدة Comfort Class في طيارات Airbus A220-300، هي مريحة وحلوة وواسعة وفيها مساحة لرجلك، مع شوية مميزات زيادة واخدينها من درجة البيزنس، يعني هتقدر تعمل الـcheck-in بتاعك على الكونتر بتاع البيزنس وكده هيبقى أسرع طبعاً، ومسموحلك بشنطتين ممكن يوصل وزن كل واحدة فيهم 32 كيلو، وسعرها أقل من البيزنس.

الكراسي دي هتكون في الصفوف الأولى من الكراسي العادية، بالتحديد أول 3 صفوف، وبدأ النظام ده في الرحلات اللي رايحة بيروت، إسطنبول، الشارقة، موسكو، القسيم، عمان، إربيل، ومسقط، وفي الخطة إن خطوط زي أثينا وفيينا يتضافلهم الكراسي دي.

المصدر: Egypt Independent