share this article

آخر كام أسبوع في السنة بيتقسم لقوائم تختصرلك أحداث سنة فاتت، وقوائم تانية فيها ترشيحات وتوقعات سنة جديدة، واللي مهتم بالسفر والسياحة مينفعش يفوّت الـ10 قوائم اللي بتعملهم مجلة Lonely Planet لأهم وأفضل وجهات سياحية، واللي قدرت 4 مدن ودول عربية إنها تاخد مكان في 3 قوائم مختلفة منهم.

نبتدي بالمغرب؛ اللي جات في المركز التاسع ضمن أفضل 10 دول لازم تزورهم في 2020، والحقيقة إنهم قالوا أسباب كتير خليتهم يختاروها في القائمة دي ما بين تنوع شكل الأنشطة والأماكن اللي ممكن أي حد يزورها هناك، الألوان واختلاف الثقافة والمعمار والطابع اللي بيميز كل مدينة، يخليك تشوف في مراكش حاجة غير فاس غير الصوّيرة، ده غير التطور اللي عملوه في البنية التحتية في البلد، وإنهم الوحيدين في أفريقيا اللي عندهم قطار سريع تقدر تروح بيه من الدار البيضاء لطنجة في ساعتين بس.

مكمّلين في المغرب العربي بس هنروح لتونس؛ اللي Lonely Planet اختاروها تبقى في المركز التامن في قائمة أكتر دول فيها سياحة حلوة بتكلفة معقولة، ده يخليك تقدر تستمتع باختيارات كتير كلها أحلى من بعض في الشواطىء والمدن الساحلية زي سيدي بو سعيد مثلاً، أو تروح للمدينة القديمة وقرطاج؛ أو تنقل على موود تاني مختلف تماماً في الصحراء والسفاري ورحلات الجمال وسط الكثبان الرملية.

وعلى مستوى المدن اختارت Lonely Planet مدينتين عربيتين هما القاهرة ودبي ضمن أفضل 10 مدن تزورها في 2020، يعني كده بقى عندك 4 اختيارات كلهم قريبين نسبياً من بعض لسفرياتك في السنة الجديدة؛ يادوب تبتدي تخطط!

المصدر: Lonely Planet