share this article

بعد تطورات انتشار فيروس كورونا؛ وكجزء من الإجراءات الوقائية أعلن رئيس الوزراء د. مصطفى مدبولي الأسبوع اللي فات إنهم قرروا يوقفوا حركة الطيران تماماً في كل المطارات المصرية من أول يوم الخميس 19 مارس ولحد يوم 31 مارس، والنهارده مع سلسلة القرارات اللي أعلن عنها في المؤتمر الصحفي واللي كان من ضمنها حظر التجول؛ قالوا إنهم هيمدّوا قرار وقف الطيران أسبوعين كمان، يعني بدل ما كان هيخلص في آخر مارس؛ مكمّل معانا لحد نص أبريل. 

طبعاً الموقف اللي حاصل بيفرض تغييرات كتير كل شوية وخطط جديدة ماكانتش في الحسبان، بالذات للناس اللي بالفعل مسافرين بلاد تانية أو مش عارفين يرجعوا وكانوا عاملين حسابهم إن الطيران واقف أسبوعين بس، لكن على الناحية الرسمية هتلاقي وزارة الهجرة بتتابع مع المصريين اللي اتعلقوا في النص سواء مسافرين أو في المطارات، وخصصوا ليهم أرقام تليفونات واستمارات تسهل من عملية المتابعة، وعلى الناحية الشعبية هتلاقي هاشتاج #احنا_في_ضهرك على الفيسبوك، واللي فيه المصريين المقيمين برة البلد بيفتحوا بيوتهم وبيعرضوا على أي حد متعلق في المطار؛ مش عارف يسافر، رحلته اتلغت ومش عارف يلاقي رحلة تانية، أو لو موجود في بلد أو مدينة فيها حضر تجول؛ لو مش لاقي حجز فندق، أو حتى لو حد مش معاه فلوس ومش عارف يتصرف، هيلاقي واحد مصري فاتحله بيته في البلد دي وهيساعده.

المصدر: RT