share this article

طبعاً دي مش أول مرة نكتب إن مصر في قائمة من قوائم السفر والوجهات لـ2020، لأن هي كانت موجودة في قوائم Lonely Planet، BBC، والـCNN، وقوائم كتير جداً، وطبعاً ده هيخلينا مترقبين أعداد كبيرة من السياح السنة الجاية وبنجهز وبنستعد أهو نستقبلهم بمطارات ومتاحف وشغل عالي.

إيه بقى اللي بيفرق القائمة دي عن غيرها وليه الناس بتستناها؟ وليه فيها 52 مكان؟ القائمة دي فكرتها إنها بتختار الوجهة لمدة أسبوع، بحيث إن السنة فيها 52 أسبوع كل أسبوع في مكان، ومصر دورها في الأسبوع الـ17 من السنة، غير كمان إنها الدولة الوحيدة اللي موجودة من منطقة الشرق الأوسط في القائمة دي في 2020، اللي كان فيها في الأسبوع الأول واشنطن وفي الأسبوع التاني جزر فيرجن البريطانية والتالت كان لمدينة روريناباك في بوليفيا.

في القائمة دي قايلين إن اختيار مصر طبعاً بيرجع -سبب من الأسباب يعني- للافتتاح اللي كل الناس مستنياه، أيوه المتحف المصري الكبير، اللي بقالنا سنين وسنين شغالين عليه، وإن المتحف ده هيكون فيه 100,000 قطعة أثرية، منهم 5,000 لتوت عنخ آمون لوحده، كمان الإكتشافات اللي عملناها وخصوصاً المقبرة الملونة في سقارة، وبيطمنوا الناس إن القاهرة بقى الوصول ليها أسهل بما إن بقى عندنا مطار تاني شغال، مطار سفنكس، متابعينا جامد الناس دول. 

المصدر: New York Times