share this article

مفيش مصري بيحب يروح مشوار لمصلحة حكومية -ده يعني لو ربنا كرمك وخلصت اللي محتاجه في مشوار واحد بدل 5- علشان كده غطينا هنا أي معلومة عن الورق والتصاريح اللي هتحتاجهم عشان تسافر بره مصر.

عندنا نوعين من التصاريح لو هتسافر بره، النوع الأول اسمه تصريح سفر وده الجيش اللي بيطلعه للرجالة في سن التجنيد (19–30). النوع التاني من التصاريح اسمه تصريح أمني وده بيطلع لمجموعة من الدول ووزارة الداخلية اللي بتطلعه.

تصريح السفر

لو واخد إعفاء نهائي من الجيش (إعفاء طبي أو علشان ملكش إخوات ولاد) مش هتحتاج تصريح سفر، بس المفروض تثبت في جواز السفر إنك معفي من الخدمة، وده تقدر تعمله بإنك تاخد شهادة الإعفاء وتروح لمكتب مصلحة الجوازات و الهجرة و الجنسية اللي تبعك وتجدد جواز سفرك وتثبت إنك معفي من الجيش. لو معملتش كده هتضطر تسافر ومعاك شهادة الإعفاء -بقى ليها شكل جديد دلوقتي، عبارة عن كارت صغير- بس مش هتحتاج تصريح سفر برضه. احننا بننصح تثبت لو أنت معفي نهائي في الجواز عشان تتفادى أي مشاكل في الجوازات وأنت مسافر.

 

لو دخلت الجيش ولسه في قوات الاحتياط، الكلام هيختلف، لازم تطلع تصريح سفر لكل سفرية هتسافرها بره مصر. تصريح السفر هتطلعه من واحد من الأماكن دي:

  • مجمع خدمة المواطنين في الزيتون -أكتر حتة منظمة وسريعة- وده عنوانه شارع جسر السويس تحت كوبري التجنيد، حلمية الزيتون، القاهرة.
  • مكتب التجنيد الخاص بيك حسب مكانك فين.

 

في حالات تانية ممكن تحتاج فيها تصريح سفر:

  • لو واخد إعفاء مؤقت من الجيش.
  • لو واخد استثناء مؤقت من الجيش.
  • لو راجل وعمرك أقل من 19 سنة.
  • الطلبة اللي واخدين تأجيل مؤقت عشان بيدرسوا بره.

 

-علشان تاخد التصريح هتحتاج تروح واحد من الأماكن اللي فوق ومعاك المستندات دي:

1) شهادة إنهاء الخدمة لو خلصت جيش أو شهادة االمعاملة التجنيدية في الحالات التانية.

2) بطاقة شخصية

3) إيضاح موقف فرد الاحتياط من الاستدعاء وده ممكن يتجاب من مكتب التجنيد أو مجمع خدمة المواطنين.

4) بالنسبة للطلبة، لازم يقدموا شهادة إثبات قيد في جامعة أو مدرسة والرقم الثلاثي للبطاقة العسكرية  (6 جند)، وبياخدوا إذن سفر لمدة أجازة نص السنة أو أخر السنة. مفيش تصريح سفرللسياحة للطلبة في السنة النهائية من الدراسة.

5) جواز السفر مش مطلوب بس خده احتياطي.

6) لو طالب عايز يسافر بره يدرس هيحتاج جواب من  الإدارة العامة للبعثات والإشراف العلمي بوزارة التعليم العالي.

 

زي ما قلنا قبل كده، خد معاك نسخ من كل حاجة عشان متضمنش الموظف ممكن تطلب معاه ياخد نسخ ولا ايه.

تصريح السفر في العادي بيطلع في يومها، غير حالات معينة لدول من اللي بتحتاج تصريح أمني ممكن ياخد لحد 3 أسابيع.

مكاتب تصاريح السفر شغالة 24 ساعة.

 

التصريح الأمني

للأسف مفيش قاعدة ثابتة عن ازاي تطلع التصريح الأمني، عادة التعامل بيبقى حالة بحالة فالموضوع بيبقى على حسب تقدير الجهة اللي بتطلعها. احنا جمعنا أكتر حاجات متفق عليها من خلال تجارب وخبرات ناس كتير علشان نساعد قدر الإمكان في العملية دي.

التصريح الأمني بيطلع من مجمع التحرير وهو مطلوب من سن 18–40 بس لمجموعة الدول دي:

  • ماليزيا
  • تركيا
  • إندونيسيا
  • الأردن
  • سوريا
  • كوريا الجنوبية
  • لبنان
  • جنوب أفريقيا والدول المجاورة
  • جورجيا
  • تايلاند
  • اليمن
  • العراق
  • إسرائيل
  • السودان
  • ليبيا

عشان تطلع التصريح الأمني، اطلع على مجمع التحرير وخش اوضة 15 في الدور التاني لظابط الإتصال ومعاك الحاجات دي:

  • جواز سفر ساري ويفضل مهنتك تكون مكتوبة فيه.
  • جواب من شركتك (لو شغال) يثبت شغلك.
  • بطاقة شخصية.
  • فيزا البلد اللي هتسافرها
  • استمارة تقديم، اكتبها بالراحة كده وأتأكد إن معاك اسم والدك الرباعي وتاريخ ميلاده.
  • نص جنيه فكة.
  • اعمل 3 نسخ من الجواز والفيزا والبطاقة.

 

  • في حالة تركيا وجورجيا هتحتاج تصريح أمني في كل الأحوال بس عندنا حالتين:
  • لو عندك وظيفة مثبتة في الجواز غالبًا هتاخد التصريح من غير مشاكل.
  • لو الجواز مكتوب فيه الشهادة (مثلًا حاصل على بكالوريوس هندسة) أو لو مكتوب إنك طالب، هتحتاج دعوة من حد جوه البلد عشان تاخد الفيزا وهتبقى فيزا زيارة مش سياحة.لو بنت مسافرة مع جوزها أو أبوها اللي هياخد التصريح ممكن برضه تاخد فيزا مُرافق.

 

  • للبلاد التانية زي ماليزيا وإندونيسيا ولبنان والأردن و...عندنا حالتين برضه:
  • لو عندك وظيفة مثبتة في الجواز أو مؤهل عالي غالبًا مش هتحتاج تصريح أمني، بس لو معاك المؤهل بس يُفضل تاخد إثبات أنك شغال في شركة. احننا بننصح تعمل حسابك على أسبوع وتنزل تتأكد أنك مش محناج التصريح للدولة اللي إنت رايحها.
  • لو في جواز السفر مكتوب أنك طالب أو عامل (طباخ، نجار، سواق،..) غالبًا هتحتاج تصريح سفر ودعوة من البلد اللي رايحها عشان تطلع الفيزا.
  • لو بنت ولسه طالبة ومتجوزة، ممكن تسافر مع جوزها من غير تصريح، بس لازم يبقى معاهم قسيمة جواز. برضه لو بنت مسافرة مع أهلها مش هتحتاج تصريح سفر.

 

  • التصريح بيبقى صالح لمدة شهرين بس.
  • لازم تقدم عليه وتستلمه بنفسك.
  • بياخد من 4-7 أيام.
  • لازم يطلع من مجمع التحرير بغض النظر عن مكانك في مصر.
  • حاول تروح على 11 علشان الدنيا بتبقى زحمة الصبح.