share this article

بعد انتشار فيروس كورونا في بلاد كتير وبعد القرارات اللي اتاخدت فجأة سواء في مصر بوقف الطيران أو في بلاد تانية زي السعودية والأردن والكويت، بتحصل حالة شلل في المطارات للمسافرين المتعلقين مع رحلات بتتلغي أو بتتأجل مواعيدها، للسبب ده كانت وزارة الهجرة أعلنت من كام يوم عن أرقام تليفونات واستمارات أونلاين للمصريين اللي مش عارفين يرجعوا البلد، بحيث يقدروا يتواصلوا مع الوزارة من خلال التليفونات أو الواتس آب، لكن المبادرات الفردية أو الجدعنة في المواقف اللي زي دي فرضت نفسها، والناس مقعدتش ساكتة؛ اتحركوا عشان يساعدوا أي حد برة البلد ومش عارف يرجع مصر.

حملة انتشرت بهاشتاج #احنا_في_ضهرك واللي بدأت على جروب بيجمع كل الناس اللي بتسافر وبتحب السفر على فيسبوك وهو جروب "Travel Secrets Club"، واللي فيها المصريين المقيمين برة البلد بيفتحوا بيوتهم وبيعرضوا على أي حد متعلق في المطار؛ مش عارف يسافر، رحلته اتلغت ومش عارف يلاقي رحلة تانية، أو لو موجود في بلد أو مدينة فيها حضر تجول؛ لو مش لاقي حجز فندق، أو حتى لو حد مش معاه فلوس ومش عارف يتصرف، هيلاقي واحد مصري فاتحله بيته في البلد دي وهيساعده، وطلبوا كمان من الناس المقيمة في أي دولة وتقدر تساعد مغترب إنهم ينزلوا بوست بتفاصيل مكان إقامتهم وإزاي يقدروا يساعدوا.

وفي خلال ساعات قليلة كان الهاشتاج منتشر على فيسبوك كله، وبيوت مصريين مفتوحة في بلاد زي فرنسا وإيطاليا وتايلند مستعدين يساعدوا أي حد هيوصلهم، افتحوا الهاشتاج وشوفوا بنفسكم ردود وتعليقات الناس اللي هتلاقي فيها جرعة مكثفة من الأمل والتفاؤل وسط كمية التشاؤم والكآبة المنتشرة على السوشيال ميديا الفترة دي.

المصدر: Facebook - Travel Secrets Club