share this article

جهود الحكومة المصرية مكملة في مواجهة انتشار فيروس كورونا، والنهارده وزيرة الهجرة السفيرة نبيلة مكرم قررت تطلع في فيديو لايف على فيسبوك عشان ترد على استفسارات المصريين المتعلقين في مطارات وفي بلاد برة مصر ومش عارفين يرجعوا، وفي اللقاء المباشر ده أعلنت الوزيرة إنهم نسّقوا مع السلطات البريطانية والكويتية والسعودية والإماراتية عشان يعملوا رحلات استثنائية للمصريين اللي عايزين يرجعوا.

الوزارة نسقت مع السلطات البريطانية عشان يعملوا رحلتين طيران بكرة الخميس 26 مارس من لندن للقاهرة تحديدًا من مطار "جاتويك"؛ عشان يرجّعوا المصريين الموجودين في المملكة المتحدة على الطيارتين دول، واللي عايز يحجز لازم يدخل في أسرع وقت على موقع: www.flyaircairo.com. الوزيرة قالت إن الرحلتين دول أرقامهم هما "SM 4456" اللي هتتحرك الخميس 26 مارس الساعة 16:30، والرحلة التانية "SM 2458" اللي هتتحرك الخميس برضه الساعة 19:45.

وبالنسبة للكويت فهيبقى فيه رحلة يوم الثلاثاء 31 مارس، للمصريين الموجودين في الكويت ومش معاهم إقامة في البلد، أما بالنسبة للإمارات فحتى الآن مفيش رحلات راجعة لكن السلطات الإماراتية أعلنوا إنهم هيمدّوا الفيزا لكل المصريين المقيمين والسائحين الموجودين في البلد، وفي السعودية لسه الوضع تحت الدراسة عشان يشوفوا هيقدروا يعملوا رحلات طيران ولا لأ.

أما بقى بالنسبة لأمريكا؛ فيه احتمال يبقى فيه رحلتين على مصر للطيران من واشنطن ونيويورك، بس ده في حالة إن فيه عدد 140 مصري عايزين يرجعوا من هناك.

وفي آخر كلامها الوزيرة رجعت أكدت تاني إن طرق التواصل مع الوزارة مفتوحة، وطلبت من كل الناس المتعلقين في المطارات إنهم يسجلوا بياناتهم في اللينك ده: https://docs.google.com/forms/d/e/1FAIpQLSfKRxP4OoLfJlbB7xbYX-I2fxFalP4HSgQULhjBtAOiBH-w8Q/viewform

أو من خلال البريد الإلكتروني: egyexpcare2020@gmail.com

أو ممكن برضه عن طريق الواتس آب على الأرقام: 01062437210 - 01069613755

المصدر: وزارة الهجرة المصرية