share this article

كارل .. مليونير ألماني عمل ثروته من القهوة الساقعة، آه زي البيبسي والكوكا كده بيبيع قهوة في كانز وساقعة، المهم إنه في سنة 2000 اشترى ولاية في نيوزيلندا اسمها "أواكينو" وبقيت بتاعته، وقعد 10 سنين يوضب ويجدد فيها، من حقه برضه ده اللي بيشتري حتة أرض في التجمع ولا أكتوبر بياخد فيها خمس سنين على ما يخلص، ويفضل فيها حاجات ناقصة.

كارل عمل الجزيرة تليق بمقامه حاجة شغل مليونيرات بصحيح، فهتلاقي إسطبلات خيل وخمارات عنب لا مش بتاعة فريد شوقي لا، دي بتعمل نبيت عادي يعني في بلادهم، وطبعاً المناظر المبهرة لأن الولاية على البحر، هو بقى بيدور على 10 أفراد يملوا عليه الولاية اللي مساحتها 540 فدان، في البر الغربي لشمال نيوزيلندا، العشرة دول هيعيشو كل 2 في بيت، والخمارة دي مكان مشترك للكل للنشاطات الإجتماعية يعني، وكارل عمل إعلان في "New Zealand Herald’s holiday accommodation section"، وبيشجع الناس لو عندهم أحصنة ييجوا بيها، شروطه للمتقدمين إنهم ما يكونوش فوق الـ70 سنة، ومش خايفين من فكرة إنهم يعيشوا بعيد عن المدن، لأن أقرب حاجة على بُعد 90 دقيقة، بس الولاية فيها أنشطة تقدر تعمل شوبينج وتصطاد، وتستمتع بالطبيعة والحيوانات.

المصدر: Matador Network