share this article

التعامل مع المصالح الحكومية في مصر مش أسهل حاجة في الدنيا، مبتبقاش عارف ايه الورق المطلوب وغصب عنك بتروح وتيجي كذا مرة لنفس المصلحة الحكومية. بالنسبة لجواز السفر في كلام كتير بيتقال، بس متقلقش، جمعنالك كل الي هتحتاج تعرفه عشان تطلع جواز جديد.

 

الأوراق المطلوبة عشان تطلع جواز سفر جديد أو تجدد جواز قديم أو تطلع بدل تالف أو بدل فاقد

  • لو عايز تطلع جواز جديد، هتحتاج بطاقتك الشخصية وصورة منها، لو هتجدد خد معاك الجواز القديم أو البايظ.
  • 4 صور حديثة (4x6) بخلفية بيضاء.
  • لو جوازك ضايع هتحتاج تعمل محضر وتاخده معاك عشان تطلع بديل.
  • التكلفة 335 جنيه للباسبور الجديد أو لو هتجدد و458.50 جنيه للبدل فاقد/بدل تالف.

    أوراق إضافية:
  • للرجالة من سن 19 وإنت طالع، أوراق الحالة التجنيدية (في سن التجنيد، معفي، واخد تأجيل، إلخ)
  • للطلبة، شهادة إثبات قيد في مدرسة أو جامعة.
  • للقاصر تحت 16 سنة، شهادة ميلاد إلكترونية ونسخة، وبطاقة الأب أو الأم وتكون صالحة، واعمل نسخة منها برضه.
  • للستات، إثبات الحالة الإجتماعية –قسيمة جواز لو متجوزة أو البطاقة لو مش متجوزة.
  • لو محتاج تجدد المهنة أو الشهادة في جواز السفر، هتحتاج الأول تجدد بطاقتك بالمهنة\شهادة دي عشان هتاخد البطاقة معاك.
  • اتأكد إن معاك نسخة من كل ورقة معاك احتياطي.

الخطوات

  • هتروح لفرع مكتب الهجرة والجنسية والجوازات اللي أنت تابع ليه واسحب استمارة الجواز المجانية من مكتب الاستعلامات واملاها.
  • لو عايز اسمك بطريقة معينة بالإنجليزي اكتبه إنت.
  • بعد ما تملا الاستمارة وتقدمها مع الورق المطلوب هتاخد وصل.
  • روح تاني بعد 3 أيام –احنا بننصح تعمل حسابك على 5 احتياطي- ومعاك الوصل وهتستلم الجواز.

 

باسبورك في إيدك، تأشيرتك في جيبك، لسه ما طلعتهاش؟ طيب احنا هنقولك تطلع تأشيرتك ازاي للدول اللي عايز تروحلها.