share this article

لما خلصت ثانوية عامة كنت فاكرة إني عشان أعرف أسافر لازم أكون مخلصة مدرسة، وأقدم على ماجستير مثلًا، بس في الحقيقة إن فرصة سفرك كطالب في المدرسة أو الجامعة أكبر من المتخرجين. لكن من ناحية تانية بيبقى أصعب بالنسبة لينا كطلبة من ناحية الفلوس وموافقة الأهل، لكن كله هنحله.

هنبدأ من فين ولا فين:

أسهل وأوفر طريقة للسفر هي إنك تقدم علي برنامج تبادل ثقافي/منح دراسية أو تشترك في عمل تطوعي.

فكرة التقديم علي المنح محتاجة منك كشخص إصرار، ورغبة حقيقية من جواك في إنك تسافر وإنك تتعلم من السفر، رغبتك في الهرب وحدها مش كفاية. لازم كمان تصدق في إن عملية قبولك أو رفضك في أي منحة أو فرصة تطوع مبتكونش لها علاقة دايماً بإنك شخص مش كفؤ، في ناس ملهاش أي علاقة بهدف السفرية وبتتقبل. عادي ما تزعلش بتحصل في أحسن العائلات.

طب إيه أصلاً التبادل الثقافي ده:

مهم تشوف الإجابة دي عشان ترد بيها على الأسئلة اللي أهلك هيسألوها: التبادل الثقافي هو برنامج بتنظمه الدول الكبيرة الغنية اللي معاها فلوس ياما زي أمريكا و بريطانيا وأوربا، فبيعملوا المنح دي للدول النامية عشان ييجوا عندها يتعلموا ويكتسبوا خبرات من خلال التعرض لثقافة مختلفة والاحتكاك المباشر مع التقاليد والعادات للدولة دي، أو يبعتوهم لدول نامية أكتر عشان يرتقوا بحالتهم، ويتقدملهم الدعم وفي الغالب بيكون في ( الصحة والتعليم) .

وده بيتم في إطار الشغل في أماكن بسيطة زي مطعم او عامل في ملاهي أو تشتغل في المخيمات الصيفية أو مراكز ثقافية بيكون هدفها الأساسي هي توعية شعب البلد اللي إنت رايحها  بثقافة تانية وإزاي تتعامل مع الصدمات الحضارية والتغلب علي الحواجز اللغوية. و بكده دي أكتر إيجابة منمقة ممكن تقنع بيها أهلك مؤقتاً.

إيه اللي المنح دي بتوفره :

إنت بس اتقبل وطاقة السعد هتتفتحلك، هم هيتبنوك ويتكفلوا بكل مصاريفك.

  • تكاليف التقديم علي فيزا.
  • تذكرة الطيران رايح جاي.
  • إقامتك هناك.

في منح بتوفر:

  • Pocket money.
  • مرتب للشغل اللي بتعمله فترة إقامتك هناك.
  • أكلك و شربك.
  • مواصلاتك الداخلية.

إيه طلباتهم :

لو فاكر إنهم هياخدوك عشان طلتك البهية ولا سواد عيونك فلأ، إنت غلطان، هم بيدفعوا الفلوس دي كلها و بينئوك من ضمن أعداد مهولة وفقًا للحاجات دي:

- ممكن تكون المنحة لها أبليكشن وفي الغالب بتكون أبليكشن طويلة ومعقدة، ممكن تحتاج فيها مساعدة وده عادي، هتملى الأبلكيشن كويس، وخد وقتك المهم يطلع بأفضل شكل.

- شهادة قيد من الجامعة تطلعه بالإنجليزي أو تترجمه.

-بيان درجاتك بالإنجليزي.

-الـ CV 

-ممكن يطلبوا منك Personal statement  أو  Motivation letter

-إمتحان TOEFL أو IELTS درجة بتتراوح من 5.5 ل 6.5 علي حسب نوع المنحة.

أهم موقعين في الوطن العربي تكون دايما بتدور فيهم علي فرصة التبادل الثقافي/المنح الدراسية اللي تناسبك هم:

-مرجع: هو موقع عليه كل المعلومات اللي تخص المنح الدراسية والغير الدراسية بشكل منظم جدا، بيكون متوضح عند كل منحة هي مفتوحة لأنهي دولة من الدول العربية ولا مفتوحة ليهم كلهم، زائد شروط المنحة وبتوفرلك إيه والديدلاين إمتي. ودي صفحتهم علي الفيسبوك

- فرصة: ده برضه موقع لطيف جداً بيتعرض عليه كل المنح بس قبل الديدلاين بأيام قليلة، الأحسن تتابع صفحات المواقع دي علي الفيسبوك لأنك في أغلب الوقت بتكون بتستخدمه أكتر.

الموقعين دول أنا قدمت فيهم كتير علي منح وإتقبلت في إتنين وسافرت من خلالهم، فمفيش أي قلق خالص من إنهم يكونوا بينزلوا معلومات غلط أو إنهم يلبسوك في حيطة. أنت في أيدٍ أمينة.

مواقع تانية ممكن تدور فيهم علي أنواع منح مختلفة:

  • منحة: منصة عربية بتقدم منح مختلفة لجميع الأعمار.
  • معهد أوستيولو مهتم أكتر بمنح السفر الأكاديمي لألمانيا.
  • Hot Courses: ده برضه للمنح الأكاديمية والتواصل مع الجامعات الأجنبية.
  • Hey Success : هتلاقي عليه كل أنواع المنح بس خلي بالك في حاجات بتكون تمويل جزئي مش كامل.
  • Scholarship positions: ممكن تدور فيه بإسم البلد اللي إنت عايز تروحها ونوع المنحة.
  • Scholars 4 Dev: شكله مش منظم جدا بس هو مهم وبينزل منح عظيمة، يارب إوعدنا نتقبل في واحدة منهم!
  • Scholarships for Africans: بتكون منح ممولة بالكامل للأفارقة ، زينا كده.

أمثلة لمنح التبادل الثقافي اللي مفتوحة حاليًا:

  • لو مهتم بالسفر لأمريكا ممكن عن طريق الزمالة برنامج حلول المجتمع (Community Solutions Program) هو برنامج تطوير مهني لمدة سنة للأشخاص اللي بيشتغلوا علي تحسين مجتمعاتهم من خلال معالجة القضايا المتعلقة بالبيئة والتسامح وحل النزاعات والشفافية والمساواة والمرأة والجنس.
  • منحة كينيدي – لوجر للتبادل الثقافي والدراسي لطلاب المدرسة (تالتة إعدادي/ اولي ثانوي/تانية ثانوي) لقضاء عام دراسي كامل والإقامة لدى أسرة مستضيفة بالولايات المتحدة الأمريكية: لو مهتم، فمن هنا تفاصيل أكتر عن المنحة.
  • منحة ممولة جزئيا للفنانين في النمسا (Visual arts – Art- photography Media art – Composition --new music, electro acoustic music, experimental music Literature Literature for children and young people -Literary translation-Cultural education)، تفاصيل أكتر عن المنحة من هنا

الخطوات اللي بتعدي عليها الأبليكشن بعد تسلمها:

أول ما بدأت أهتم بالقصة دي وطبعا لأني مصرية والمصري فهلوي بغريزته، فكنت بفكر إنه قشطة عادي ممكن أكتبلهم أي حاجة في الأبليكشن وأفشر يعني وهم هيعرفوا منين ، بس تراااا مفاجئة ، هيعرفوا عشان أصلاً لو ورقك اتقبل بيكون في بعديها إمتحان English و Communication  بعدين إنترفيو ، فإنت لو عديت من واحدة مش هتعدي من التانية ،ده أصلاً لو ورقك عدى من أول مرحلة يعني.

لأ متشغلش دماغك لمصلحتك .

و ممكن تتابع مع المؤسسات الأساسية اللي بتقوم بتمويل المنح دي زي:

  • CIEE: و دي مؤسسة أمريكية بتسهل السفر وبتقدم منح وأنا سافرت معاهم قبل كده علي منحة اسمها SWT (Summer Work Travel Program)
  • Better World Foundation: دي منظمة غير حكومية تبع الإتحاد الأوربي وفيها فرص كتير أوي للتبادل الثقافي.
  • MIHI: مؤسسة شبابية بتوفر منح لأوربا بس فرص قليلة شوية للمصريين.

لو طلع ملكش في السفر عن طريق التبادل الثقافي، مش مهم.. نبدأ ندور في الفرص التطوعية .

الفرق بين الفرص التطوعية  والتبادل الثقافي إن شروطها بتكون أسهل بكتير بس في المقابل إنها مش بتوفر ليك نفس صلاحيات منح التبادل الثقافي، بمعنى إيه؟

التطوع في الغالب بيتكلف ب:

-الإقامة

- الأكل والشرب

باقي الإجراءات وتذاكر الطيران و مصاريفك هناك بتكون علي نفقتك إنت الشخصية.

إيه هو العمل التطوعي :

العمل التطوعي ده إنك تسافر بره مصر في أمكان فيها مغامرة زي أسيا أو أفريقيا، وبتكون تذكرة الطيران علي حسابك الشخصي، بس بتروح هناك بقى على Host Family عيلة من أهل البلد، بتعيش عندهم وبتاكل وبتشرب معاهم ودي فرصة كويسة أوي إنك تشوف الثقافة الحقيقية للبلد، بس في المقابل إنت بتشتغل في البلد دي، أو تكون بتساعد الأسرة في احتياجاتهم اليومية، بس ما بتاخدش مقابل ده أي عائد مادي، زى ما تقول كده بتشتغل عندهم بلقمتك بس في واقع الأمر إنت بتشتغل عندهم مقابل إنك تسيب جلدك و تطلع بره تتفرج و تشوف و تعيش حياة جديدة.

إزاي تدور علي فرص للتطوع بره مصر :

*من خلال فرصة و مرجع برضه

- الأمم المتحدة :بينزل عليه فرص تطوعية  وفي الغالب بتكون لدعم اللاجئين

-Volunteer Match  - - VolunteerHQ Global Volunteers- universalgiving: منظمة غير هادفة للربح بتوصل المتطوعين بالمنظمات.

-Idealist :الموقع ده لطيف لأن في مكان تقدر تدور فيه علي إيه مكان اللي إنت عايز تطوع فيه و تطوع في أنهي مجال.

Hands on Network-: الموقع ده أحسن حاجة فيه إنك تقدر تقرأ قصص ناس سفرت قبلك و إنك تشوف مغامرتهم وتشوف هم إستفادوا إيه وإيه المصاعب اللي ممكن تقابلها.

-work away:ده بقي مجمع كل أنواع  وأماكن التطوع، يعني عايز تجرب حاجة جديدة وتطوع في مزرعة أو مع الحيوانات هتلاقي عايز تروح تعلم الأطفال في المدارس وتشتغل في المنظمات الغير حكومية برضه هتلاقي.

Wwoof-: التطوع في مزارع عضوية حول العالم على حسب المكان اللي إنت عايز تزوره. وأنا اتطوعت معاهم وكانت تجربة ثرية وجميلة. تقدروا تعرفوا عنها من المقال ده.

-Project Abroad: المميز فيها إن فيها مجالات تطوع مش موجودة في المواقع التانية زي مثلاً الطب والصحافة.

Volunteer4Africa-: التطوع فى الموقع ده مختصر علي أفريقيا بس.

WorldTeach- : بتقدم فرص لتعليم الأطفال في جنوب أفريقيا وأمريكا اللاتينية.

تكلفة الإشتراك في المواقع:

 عشان تقدر توصل لتفاصيل طبيعة عملك التطوعي هناك وعشان تعرف تتواصل مع Host family وتعرف إنت رايح فين وهتعمل إيه، بتحتاج تدفع حاجة زى الإشتراك للموقع، قيمة الإشتراك بتختلف من موقع للتاني.

 كده باقي نصايح عامة عشان نتغلب على مشكلة الفلوس وإن الأهل مش هيوافقوا ندور علي منحة ماتكونش شروطها صعبة فنسافر ومن غير ما ندفع فلوس كتير أو من غير ما ندفع فلوس خالص.

- ندور علي حاجة تسمح لينا إننا ناخد خبرة بره مصر في شهور الأجازة الجامعية  وتضيف للـ CV بتاعنا .
- الزن علي الأهل والزن أمر من السحر و بعدين نخش من حتة انتوا مش هتدفعوا حاجة ودي منحة وحرام ! مستقبلي بيضيع وكده! أنا مجربة الفكرة دي لحد دلوقتي 3 مرات ومشيت زي الفل بعد قليل من الزرجنة.

أتمني لكم الحظ في التقديم علي المنح  و في إنها تصيب وتسافروا .وبنستني نشوف مغامرات الناس اللي جربت تسافر في منح تبادل ثقافي او في العمل التطوعي بره مصر قبل كده. ونحب  تبعتولنا مغامرتكم على الإيميل .