share this article

من أعظم وأسهل طرق السفر في العالم هو سفر التطوع، وده لأن الفيزا بتكون فيه مضمونة بنسبة كبيرة طول ما أنت منسق أوراقك كويس واتقبلت في المكان اللي هتروح تتطوع فيه، وبكده تكون جمعت بين حبك للسفر وكمان قدمت حاجة مهمة جدا لنفسك ولغيرك كمتطوع.

الألعاب الأولمبية حدث عالمي كان بيحصل كل 4 سنين قبل ما يتقسم ويبقي ألعاب صيفية وشتوية، ويبقى بيتعمل كل سنتين بالتناوب. سنة 2020 هتكون في مدينة طوكيو في كوكب اليابان الشقيق. في 26 سبتمبر اللي فات لجنة التطوع للأولمبياد فتحت باب التطوع واللي بيتم في خطوات سهلة ومتاح لحد بداية شهر ديسمبر 2018، واللي نتيجته هتبدأ تظهر من أول يناير 2019 لحد يوليو القائمة النهائية، بس خلي بالك لازم يكون عندك 16 سنة أو أكبر.

الورق اللي لازم تجهزه قبل ما تقدم

  • نسخة من الباسبور وتكون معاك علي اللابتوب.
  • أي شهادة تثبت مستواك في أي لغة درستها زي TOEFL وIELTS في الإنجليزي وزيهم في أي لغة تانية.

الخطوات

  • تقدر تقدم علي التطوع من خلال موقعهم واللي منه بتعمل بروفايل جديد وبتملي البيانات المطلوبة كلها
  • بيظهرلك الصورة دي اللي ممكن تسجل فيها بالفيسبوك أكونت بتاعك أو جوجل أو لاين أو من تحت خالص بتعمل أكونت جديد

بعدها بيظهر صفحة البيانات اللي بيكون فيها 6 خطوات:

  • املأ بياناتك الأساسية (الأسم، السن، الجنسية، إلخ)
  • دخل عنوانك وتفاصيل بلد الإقامة.
  • اكتب عن خبراتك السابقة في التطوع، يعني لو اتطوعت في مسابقات قبل كده أو خبراتك في التطوع بشكل عام.
  • هتقول اللغات اللي بتتكلمها أو درستها ويفضل يكون معاك شهادة بتثبت بيها مدي قدرتك علي دراستك ليها زي TOEFL وIELTS، وكمان لو بتلعب اي لعبة أو عندك خبرات سابقة فيها.
  • هتكتب كمان نوع التطوع اللي تحب تشارك فيه سواء في الترحيب باللاعبين والتواجد داخل ساحات الألعاب أو التطوع في المدينة لإرشاد الزوار الموجودين.
  • اتأكد إنك قرأت كل الشروط المطلوبة وعرفتها.
  • بعد ما بتخلص بيجيلك ايميل وبتأكد إنك استلمته وتستنى النتيجة.
  • ودي صورة بتوضح كل الخطوات بإختصار من أول ما تقدم لحد لما تبقى معاهم في اليابان

مصدر الصور الموقع الرسمي للجنة التطوع في أولمبياد 2020

مدة التطوع

أنت لو اتقبلت جهز نفسك أنك لازم تكون هناك قبل الألعاب الأولمبية بحوالي 10 أيام علشان التدريبات اللي هتاخدها وكل المعلومات اللي هتفيدك أثناء توجدك هناك، وبرضه اعمل حسابك علي 10 كمان زيهم بعد الأولمبياد ما تخلص ممكن يقلوا أو يزيدوا حسب الجدول والمواعيد.

  • فترة الإعداد متوقع تبدأ أول إبريل 2020
  • الألعاب الأولمبية هتكون من الجمعة 24 يوليو إلى الأحد 9 أغسطس، والألعاب البارا أولمبية هتكون من الثلاثاء 25 أغسطس إلى الأحد 6 سبتمبر2020.
  • أيام شغلك هناك هيبقوا 5 أيام في الأسبوع و8 ساعات عمل من خلالهم وقت الراحة في النص.

حاجات لازم تتأكد منها قبل ما تبدأ

  • تكون اتولدت قبل أو في ١ إبريل ٢٠٠٢
  • لازم يكون عندك حق الإقامة في اليابان (سواء كانت فيزا أو إقامة أو إقامة مؤقتة للدراسة أو الشغل)
  • لازم تكون بتتقن اللغة الإنجليزية أو اليابانية (واحدة من الإتنين ضروري)
  • ولازم يكون عندك فكرة عن إيه هي الألعاب الأولمبية، علشان تبقي عارف هتعمل ايه هناك.

هتصرف إيه وفين؟

  • مصاريف الطيران والفيزا عليك.
  • مصاريف الإقامة.
  • ومصاريفك الشخصية.

اللجنة هتوفر اللبس ووجبة غداء لكل المتطوعين في وقت تواجدك في الأنشطة، وبرضه هيدوك مبلغ لمواصلاتك من وإلى المكان اللي متطوع فيه، (حوالي 1000 ين ياباني/9 دولار أمريكي في اليوم).

لو سافرت ما تنساش تحكيلنا عن تجربتك هناك.