share this article

أول عائق بيقف أدام أي حد بيحب السفر ونفسه يروح كل حتة في العالم هو الباسبور بتاعه والدول اللي الباسبور ده بيسمحله يدخلها، والمشكلة بتبقى أكبر بالنسبة لحد باسبوره أبيض أو لسه مسافرش حتت كتير، يا سلام بقى لو عايز يروح أوروبا وقرر يدخل دوامة الورق والمستندات المطلوبة ويكثف الدعاء هو وكل أصحابه وأفراد الأسرة عشان ياخد الفيزا في الآخر، واللي غالباً بتبقى على أد عدد أيام رحلته بالظبط متزيدش ساعة ولا تقل ساعة، بس في 2 فبراير ابتدت التعديلات الجديدة في اجراءات فيزا دول الاتحاد الأوروبي أو شنجن؛ وكان من ضمن التعديلات دي إن أي شخص بيقدم على الفيزا يقدر دلوقتي ياخد فيزا متعددة الدخول لمدة 5 سنين، دلوقتي بقى قرروا يشرحوا تفاصيل أكتر إزاي المواطن يتحصل على الفيزا دي وينسى همّ شنجن لمدة 5 سنين - لأ وكمان هتفتحله مجال يدخل بلاد تانية كتير اللي بتقبل دخول المسافر بفيزا شنجن حتى لو مش في أوروبا.

أول شرط قبل أي حاجة إنك لازم تلتزم بقاعدة الـ180/90 واللي معناها إنك متقعدش في الاتحاد الأوروبي أكتر من 90 يوم خلال فترة 6 شهور، كده هيبقى عندك كذا أوبشن للفيزا يا إما تاخدها دخول متعدد لمدة سنة أو سنتين أو 5 سنين بالشكل التالي:

1- عشان تاخد فيزا دخول متعدد لمدة سنة؛ لازم تكون أخدت شنجن قبل كده 3 مرات خلال السنتين اللي فاتوا واستخدمتها بدون أي خرق للقانون؛ يعني دخلت الاتحاد الأوروبي وخرجت في المدة المحددة ليك.
2- عشان تاخد فيزا دخول متعدد لمدة سنتين؛ لازم تكون أخدت شنجن قبل كده لمدة سنة واستخدمتها برضه خلال السنتين اللي فاتوا.
3- عشان تاخد فيزا دخول متعدد لمدة 5 سنين؛ لازم تكون أخدت شنجن قبل كده لمدة سنتين خلال الـ3 سنين اللي فاتوا.

يعني بمنتهى البساطة كل ما هتكون أخدت شنجن قبل كده واستخدمتها بشكل قانوني والتزمت بالقواعد وخرجت ودخلت في الوقت المحدد ليك؛ كل ما كانت فرصتك أكبر إنك تزود عدد السنين اللي هتاخد فيها الفيزا بعد كده، أي حد معاه فيزا صالحة بقى يحاول يعمل أكتر عدد سفريات ممكنة قبل ما تخلص عشان يستفيد بالفرصة لما يقدم تاني.

كل ده بالإضافة إلى إن المسافر لازم يكون عنده سبب مقنع بخليه يفضل رايح جاي كتير على دول الاتحاد الأوروبي؛ ومش موضحين هل السياحة فقط سبب كافي ومقنع بالنسبالهم إنك تسافر أوروبا كتير في وقت قليل ولا لأ، وغير إنك أكيد لازم يكون صحيفتك الجنائية نضيفة ومفهاش أي تعدّي على القانون في بلدك؛ ومتكونش كسرت أي فيزا قبل كده أو مالتزمتش بالقواعد بتاعتها، ولازم كمان تقدم ورقة التأمين بتاعة السفرية الأولى للفيزا اللي بتقدم عليها.

المصدر: Schengen Visa Info