share this article

لو متابع للرياضة فهتكون عارف إن الألعاب الأولمبية 2020 هتكون في طوكيو عاصمة اليابان، اللي فنادقها وهوستيلاتها اتملت على آخرها حجوزات لدرجة إنهم خصصوا سفينة على المرسى تأجر أوضها للسياح وقت الأولمبياد، ولو أنت ملكش في الرياضة فطبعاً مش عارف إيه هي دورة الألعاب الأولمبية، وهي من أعظم الأحداث الرياضية اللي كل الناس في العالم بتستناها؛ حاجة كده عاملة زي عيد ميلاد الرياضة، كل الرياضات بتتلعب في نفس البلد في نفس الفترة، وميداليات وأكاليل وأرقام قياسية بتتحقق، وطبعاً أبطال عالميين في كل الرياضات.

شركة الطيران اليابانية قررت إنها مش هتعدي الفرصة دي؛ فعملوا عرض العروض، قرروا يوزعوا 50,000 تذكرة طيران رايح جاي، الرحلات دي داخلية في اليابان، يعني سياحة فوق السياحة، ورحلتك تكون في الفترة مابين 1 يوليو لغاية آخر سبتمبر، كل اللي هتعمله إنك هتخش على الموقع بتاع الشركة وتملى الأبلكيشن اللي هتلاقي جواه 4 وجهات مختلفة، بس بعد 3 أيام هيردوا عليك وتعرف أنت رايح فين، العدد محدود جداً، هم بس 100,000 كرسي يعني 50,000 رحلة رايح جي، عشان كده فيه احتمال إن يكون فيه إقبال على مدن وأماكن معينة في اليابان والكراسي المخصصة ليها تخلص فتبطل تكون متاحة، والرحلات كلها هتطلع وترجع لمطار طوكيو.

التسجيل هيبدأ في أواخر فبراير 2020، وممكن تخنار معاد السفر قبلها بأسبوع، ومعاد الرجوع ميكونش بعدها بأكتر من 10 أيام، الموضوع ده متاح بس للناس اللي مش عندهم باسبورت ياباني، ولا إقامة، بس لازم تكون مشترك في نظام اللي بيحسبلك الأميال بتاع الشركة اللي تقدر تلاقيه عندهم على الموقع برضه، خلي بالك التذاكر هتكون بأسبقية الحجز. 

المصدر: Daily Hive