share this article

الشعب اللبناني يحب يبسط نفسه ويدلعها وطبعاً في العطلات مبيتوصاش، وتقريباً مش محتاجين المقدمة دي وهدخل في الموضوع على طول عشان منضيعش وقت، في السطور الجاية هنقولك إيه الأجازات اللي في 2020 وإزاي تطولهم أكتر بـbridges من غير ما تستخدم أيام كتير من الأجازات السنوية بتاعتك، وطبعاً فيه قواعد متعارف عليها في قاموس الأجازات ألا وهي:

  • أي يوم ثلاثاء أجازة بتاخد الاثنين معاه.
  • أي يوم خميس أجازة بتاخد الجمعة معاه.
  • أي يوم أربعاء أجازة بيكون أدامك الإختيار ما بين أنك تاخد اثنين وثلاثاء، أو خميس وجمعة.
  • أي مناسبة جاية في يوم أصلاً أجازة، بنستنى تتعوض بيوم تاني قبل أو بعد.

ولأنك تعبت أوي السنة اللي فاتت فهنبدأ السنة بعطلة لطيفة 6 أيام كده، وبسهولة جداً لأن الأريع 1 يناير/كانون التاني أجازة كده كده، كل اللي هتعمله إنك هتاخد الخميس والجمعة أجازة وتبقى وصلت للويك إند، والمفاجأة الحلوة بقى إن الإثنين 6 يناير/كانون التاني أجازة عيد الميلاد، أول ست أيام في السنة بتوعك محدش جيه جنبهم.

بعد كده هيكون عيد مار مارون في 9 فبراير/شباط بس للأسف ده يوم أحد، بس يوم 14 ذكرى الشهيد الرئيس رفيق الحريري، ولأنه يوم جمعة فكده هيكون عندك ويك إند طويلة تشحن شوية طاقة حلوين لغاية يوم 25 مارس/آذار عيد البشارة، وبما إنه يوم أربع يبقى عندك اختيار بين الويك إند اللي قبله أو اللي بعده، كده كده هتاخد يومين أجازة عشان تحقق هدفك وتضم العطلة مع الويك إند وتبقى 5 أيام.

ييجي أبريل/نيسان ومعه بييجي العيد، 10 أبريل/نيسان بيكون الجمعة العظيمة بحسب الكنيسة الكاثوليكية، وأكيد الأحد هو حد القيامة، ويك إند طويلة أهو، بس كمان اللي بعده بيكون نفس الموضوع عشان العيد حسب الكنيسة الأرثوذكسية، يعني اتنين ويك اند طويلة ورا بعض، واحدة من الجمعة 10 نيسان، واللي بعدها الجمعة 17 نيسان.

فيه كمان لونج ويك إند لعيد العمال يوم الجمعة 1 مايو/أيار، تقدر تروح عالضيعة تشوف العيلة، أو تكزدر شوية ببيروت، ويوم 3 مايو/أيار هيكون يوم الشهيد لكنه يوم أحد، ونفس الموضوع يوم عيد المقاومة والتحرير اللي هيبقى يوم أحد 10 مايو/أيار، بس فيه بقى أجازة حلوة يوم 24 اللي بيكون عيد الفطر وهيخلص يوم التلات 26، يعني كده معاك 4 أيام أجازة رسمي، بس تقدر تاخد bridge معاهم بقية الأسبوع أيام 27-28-29 مايو، وتبقى أجازة طويلة 9 أيام.

يونيو/حزيران بيجي وبيخلص من غير أي أجازات غير الويك اند العادية، وبعده يوليو/تموز اللي آخره هاتيجي وقفة عرفات بالتحديد يوم الخميس 30 يوليو، ومعها عيد الأضحى 4 أيام، الأجازة دي هتكون 5 أيام بس، لكن كمان فيه فرصة تزودها لو أخدت bridge قبلها أيام 27-28-29 يوليو، وكده تبقى أخدت أجازة 10 أيام.

يوم 15 أغسطس/آب عيد صعود السيدة العذراء، لكن يوم سبت يعني عطلة أصلاً، بس يوم 20 هيكون رأس السنة الهجرية وده يوم خميس، كده عندك 3 فرص، يا إما تاخد bridge أيام 17-18-19 أغسطس وتبقى أخدت أجازة 6 أيام، أو الفرصة التانية إنك تاخد bridge يوم واحد اللي هو 21 أغسطس وتبقى أجازة 4 أيام من 20 لـ23 أغسطس، يا إما تطلع الطلعة الكبيرة وتاخد أجازة من يوم 15 أغسطس ليوم 23 أغسطس .. 9 أيام تانيين، ومش فاضل في أغسطس غير أجازة أخيرة يوم 29 بس هيكون يوم السبت عاشوراء.

بعد شهرين بالظبط ويوم 29 أكتوبر/تشرين الأول هيرجع الدلع مع 4 أيام عطلة بمناسبة المولد النبوي الشريف، هو هيكون يوم خميس وطبعاً عارفين هنعمل ايه؛ الاختيار الأول bridge أيام 26-27-28 أو bridge يوم 30 أكتوبر، أو أجازة طويلة من 25 أكتوبر لحد يوم 1 نوفمبر.

الأجازة اللي بعدها هتكون يوم 22 نوفمبر/تشرين التاني هيكون عيد الإستقلال لكنه كمان يوم أحد، هتضظر بقى تنتظر الكريسماس يوم 25 ديسمبر/كانون الأول، ولأنه يوم جمعة هتكون ويك إند طويلة هدية لطيفة تحت الشجرة.

لو مشيت على المكتوب فوق هتقدر تستغل أيام كتير غير أيام الأجازات الرسمية، وغير كمان أيام أجازاتك السنوية اللي تقدر تاخدهم براحتك بقية السنة.

تقدر تطبع الصورة من اللينك ده وتعلقها عندك عشان تبقى شايف الأجازات طول السنة