share this article

في الوقت اللي فيه دول بتعمل مجهودات مهولة عشان تنعش السياحة؛ دول أوروبية كتير بتعاني من السياحة المفرطة، وده اللي بيحصل لما يجيلهم عدد سياح كبير جداً للدرجة اللي بتأثر بشكل سلبي على المدن والمزارات، بتعمل زحمة مبالغ فيها تخلي الحكومات مش قادرة تسيطر على المزارات دي، ولا حتى السياح نفسهم بيعيشوا تجربة حلوة في البلد اللي ضاربين مشوار أد كده عشان يشوفوها، ده اللي خلانا نشوف على مدار السنة اللي فاتت غرامات كتير بتفرضها روما مثلاً على السياح بتوصل لـ7400 جنيه لبعض المخالفات، وفي فينيسيا وصلت لدرجة إنهم غرّموا سياح 17 ألف جنيه عشان عملوا قهوة في الشارع.

أمستردام ولأنها بتعاني من نفس المشكلة قررت مع بداية سنة 2020 إنها تفرض ضريبة جديدة على الـ17 مليون سائح تقريباً اللي بيزوروها كل سنة، واللي هيدفعوا 3 يورو زيادة عن كل ليلة هيقضوها في المدينة، ده لو الشخص قاعد في فندق، إنما لو مأجر شقة من Airbnb ساعتها هيدفع ضريبة 10% من قيمة الإيجار، أما بقى لو كامب أو معسكر هتبقى الضريبة 1 يورو زيادة، كل ده غير الضريبة السياحية العادية اللي بياخدوها من قبل كده اللي هي 7%، وبكده هتبقى أمستردام بتاخد أعلى ضريبة سياحية في دول أوروبا كلها.

المصدر: Lonely Planet