share this article

أفلام ومسلسلات كتير بتبقى السبب إن معجبيها يدوّروا على المواقع اللي اتصورت فيها عشان يزوروها لما يسافروا، وواحد من أشهر الأفلام دي هو فيلم Star Wars اللي لسه نازل منه جزء جديد في ديسمبر اللي فات؛ وكانت بالمناسبة دي الخطوط البريطانية عاملة طيارة مخصوص بتصميم مستوحى من الفيلم الجديد، ولأن مشاهد كتير من الأفلام دي اتصورت في تونس؛ فتقدر دلوقتي تروح تقضي إقامتك في منتجع جديد عملوه الإطلالة بتاعته كلها هي المواقع اللي اتصور فيها شوية من أشهر مشاهد Star Wars.

المنتج الجديد اسمه "أنانتارا توزر" Anantara Tozeur موجود في جنوب تونس وسط الصحرا في مدينة "توزر"، عبارة عن 50 أوضة و43 فيلا على أعلى وأشيك مستوى، ده غير إن توزر معروفة بالمناظر الطبيعية اللي فيها لأن جزء كبير منها هو واحة، بالتالي حتى لو إنت مش رايح كواحد من معجبي Star Wars أو مش فارق معاك مشاهد ايه اتصورت فين؛ تقدر تنبسط بالمكان نفسه والـviews اللي عبارة عن ميكس صحرا على نخيل ووديان.

أما بقى عن أسعار الإقامة عندهم فتبدأ من أول 359 دولار في الليلة (حوالي 5700 جنيه) للأوضة الديلوكس، وبيوصل لـ1570 دولار لو فيلا بأوضتين وحمام سباحة خاص.

المصدر: Hospitality News Magazine